رەسەي جالداپ كەلگەن پوليگونداردى قايتارۋ تۋرالى باستامانى قازاقستان جاسادى - م. التىنبايەۆ
بۇل تۋرالى بۇگىن سەناتتىڭ حالىقارالىق قاتىناستار، قورعانىس جانە قاۋىپسىزدىك كوميتەتىنىڭ كەڭەيتىلگەن وتىرىسىندا سەناتور مۇحتار التىنبايەۆ ءمالىم ەتتى.
ەسكە سالايىق، وتىرىستا «1996 -جىلعى 18 - قازانداعى قازاقستان رەسپۋبليكاسى مەن ر ف اراسىنداعى سارى شاعان سىناق پوليگونىن جالداۋ تۋرالى شارتقا وزگەرىستەر مەن تولىقتىرۋلار ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسى تالقىلانعان بولاتىن.
ايتا كەتەرلىگى، قازىرگى تاڭدا قازاقستان رەسەيگە سارىشاعان پوليگون اۋماعى ءۇشىن 8 ميلليون 325 مىڭ گەكتاردى جالعا بەرىپ وتىر. بۇل اۋماقتار كولەمى قىسقارتىلۋ ۇستىندە.
«جالداۋعا بەرىلگەن جەرلەردى قايتارىپ الۋ، ەڭ بىرىنشىدەن، ەلىمىزدىڭ ەكونوميكالىق مۇددەلەرىنە سايكەس كەلەدى. ءبىز رەسەي تاراپى جالداۋدان شىعاراتىن جەر ۋچاسكەلەرىن تاعى دا ناقتىلاي وتىرىپ، ونى پايدالانۋ ءتارتىبىن دە جەتىلدىرە ءتۇسۋىمىز كەرەك. تۇتاستاي العاندا، رەسەي قازاقستاندا پوليگون ءۇشىن جالداپ وتىرعان جەر ۋچاسكەلەرىن قىسقارتىپ جاتىر، كەلەشەكتە دە قىسقارتىلۋى مۇمكىن. بۇل ولارعا تۇسكەن ەكونوميكالىق قيىندىقتارمەن دە بايلانىستى شىعار. دەگەنمەن، پوليگوننىڭ جەر ۋچاسكەلەرىن قىسقارتۋ تۋرالى باستامانى قازاقستان تاراپى كوتەردى. ەلباسى تاپسىرما بەرىپ، ونى ءتيىستى وبلىس اكىمدىكتەرى مەن مۇددەلى مينيسترلىكتەر قولدادى. وسىنى ەسكەرۋگە ءتيىسپىز»، - دەدى م. التىنبايەۆ.
ونىڭ ايتۋىنشا، جالعا بەرىلىپ وتىرعان اسكەري پوليگونداردى تەك رەسەيدىڭ مۇلكى رەتىندە قاراۋعا بولمايدى. سەناتور پايىزدىق ۇلەسكە سالسا پوليگوننىڭ باسىم بولىگىن قازاقستاننىڭ ءوزى پايدالانىپ جاتقانىن ءمالىم ەتتى. «ونىڭ ۇستىنە سارى شاعان اۋماعىن كەلەشەكتە حالىقارالىق پوليگون رەتىندە دە قولدانۋ ماسەلەسىن ويلانا بەرگەن ابزال. ويتكەنى، ءدال وسىن سارى شاعان سەكىلدى اتۋ ۇزاقتىعى جاعىنان بىرەگەي پوليگون رەسەيدە دە، قىتايدا دا جوق. سونىمەن قاتار، زاماناۋي زىمىراندى كەشەندەردى دە وسى اۋماقتا سىناۋ قولايلى. بۇل ينفراقۇرىلىمدى كەلەشەكتە دە دامىتا بەرگەن دۇرىس»، - دەدى م. التىنبايەۆ.
تالقىلاۋ بارىسىندا سەناتور نۇرتاي ابىقايەۆ رەسەي جالداپ وتىرعان نەمەسە جالدان شىعارعان پوليگوندى قازاقستان ءوزى دە بەلسەندى تۇردە يگەرىپ، ونى كەڭىنەن پايدالانۋ تۋرالى ماسەلە كوتەردى. «ءبىزدىڭ رەسەيمەن اسكەري ىنتىماقتاستىق تۋرالى شارتتارىمىز بار. سونىمەن قاتار، بۇل پوليگونداردى رەسەيمەن بىرلەسىپ قازاقستاننىڭ دا اۋە قورعانىسى كۇشتەرى رەتىندە ودان ءارى پايدالانۋدى جالعاستىرۋعا ءتيىسپىز»، - دەدى ن. ابىقايەۆ.
اۆتور: قانات مامەتقازى ۇلى
