قازاق دزيۋدوسىنىڭ جۇلدىزى ەسە قايتارعىسى كەلەتىن باستى قارسىلاسىن اتادى
بۇل تۋرالى Pro سپورت گازەتى حابارلايدى.
- ەلدوس، ءسىزدىڭ دزيۋدو سپورتىنا كەلۋىڭىزگە كىم نەمەسە قانداي جاعداي تۇرتكى بولدى؟ العاشقى جەڭىسىڭىز ەسىڭىزدە مە؟
- 5 جاسىمنان سپورتقا قىزىقتىم. مەنى ەشكىم قولىمنان ۇستاپ اكەلىپ، وسى سپورتپەن اينالىساسىڭ دەگەن جوق. مۇنىڭ ءبارى اللانىڭ قالاۋىمەن بولدى دەپ ويلايمىن. جالپى كۇرەس ۇنايدى. ەسىمدە قالعان ەڭ العاشقى جارقىن جەڭىسىم - 1998-جىلى الماتىدا وتكەن رەسپۋبليكالىق چەمپيوناتتا جەڭىمپاز اتانعان ەدىم. ەندى وسىدان كەيىنگى جەتىستىكتەر كوز الدىڭىزدا بولدى، 2010-جىلى جاستار اراسىنداعى الەم بىرىنشىلىگىندە چەمپيون اتاندىم، 2013-جىلى ازيا چەمپيوناتىندا قولا جۇلدەگەر بولدىم. ال ەڭ باستى جەتىستىگىم - الەم چەمپيوناتىنداعى التىن.
- ءوز سالاڭىزداعى ۇلگى تۇتاتىن تۇلعاڭىز كىم؟
- قازاقتان شىققان سپورتشىلار كوپ قوي: اسحات جىتكەيەۆ، سالامات وتاربايەۆ، ايدىن سماعۇلوۆ، اسحات شاحاروۆ، دومباي بازاربەك دەگەن اعالارىمىز. سول كىسىلەرگە قاراپ وستىك. ال الەمدىك دەڭگەيدە الاتىن بولساق جاپون پالۋانى نومۋرانى ايتار ەدىم، سەبەبى ول بالۋان سپورت تاريحىندا ەڭ جوعارعى ناتيجەگە قول جەتكىزگەن. وسى پالۋانداردىڭ كۇرەسىنە قىزىعا قاراپ وستىك.
- الەمدىك دەڭگەيدە ءوزىڭىزدىڭ باستى قارسىلاسىڭىز كىمدى دەپ سانايسىز؟
- نەگىزى ءبىزدىڭ باستى قارسىلاستارىمىز - جاپونيالىقتار. ال جەكە باسىما كەلەتىن بولسام، مەنىڭ باستى قارسىلاسىم ول جاپون بالۋانى ناوحيسا تاكاتا. ونىمەن بىرنەشە رەت بەلدەسكەنمىن، تاجىريبەلى ءارى مىقتى سپورتشى.
- بارىمىزگە بەلگىلى 2015-جىلى استانادا وتكەن الەم چەمپيوناتىنىڭ فينالىندا وزىڭىزگە جاقسى تانىس دوسىڭىز، كوماندالاسىڭىز رۋستام يبرايەۆپەن بەلدەستىڭىز، ەندى سول جايلى ايتا كەتسەڭىز.
- رۋستام يبرايەۆ اقتوبە وبلىسىنىڭ تۋماسى. ۇلتتىق قۇرامانىڭ مۇشەسى. وتە تاجىريبەلى، ۇلكەن دودالاردا توپ جارىپ جۇرگەن بالۋان. سپورت بولعان سوڭ، تاتاميدىڭ ۇستىندە دوستىق دەگەن جوق. ەندى بارلىق كۇشىمىزدى سالىپ كۇرەستىك، بۇيىرعانى سول بولدى.
- بىلتىرعى 2015- جىل ءسىز ءۇشىن جەمىستى بولدى. بيىلعا قانداي جوسپار- ماقساتتارىڭىز بار؟
- 2016-جىلى وليمپيادا ويىندارى كەلە جاتىر. بارلىق سپورتشىلار ءتورتجىلدىقتىڭ باستى دوداسىن اسىعا كۇتۋدە. جوسپارىمىز باسەكەدە التىن الۋ، كوك تۋىمىزدى جەلبىرەتىپ، قازاعىمىزدىڭ نامىسىن قولدان بەرمەۋ.
- سپورت سالاسىندا ويىپ الارلىقتاي ورنىم قالدى دەپ ەسەپتەيسىز بە؟
- ول جايىندا ويلاماپپىن. ەگەر وليمپيادا چەمپيونى اتانىپ جاتسام، مۇمكىن ءىزىم قالار. ماقتاۋ، ماداقتىڭ ءبارى اللاعا عانا ءتان.
سۇحباتتاسقان دياس تالعات ۇلى
