بەلگىلى قالامگەر قالي سارسەنبايدىڭ «شال مەن شىندىق» اتتى جاڭا كىتابى جارىققا شىقتى
32 باسپا تاباقتان، 600 بەتتەن تۇراتىن بۇل كولەمدى ەڭبەكتىڭ ءتورت ءبولىمى بار. «ءسوز ساۋلەسى» اتتى العاشقى ءبولىمى قالامگەردىڭ ءار جىلدارى جازعان ءپالساپالىق ويلارىنان قۇرالعان.
سونىڭ ىشىندە قوعامداعى الۋان ءتۇرلى وقيعالاردى ساراپتاي كەلە، قالامىنان شىققان «دەرت پەن سەرت»، «تاريح قالاي قايتالانادى؟»، «اقيقات ايتىلعان جەردە ءوزىڭدى ادام سەزىنەسىڭ»، «ءبىزدى قادىر قۇتقارىپ ءجۇر»، «كەڭدىكتى تەڭدىك دەپ تۇسىنەتىندەر بار»، «دومبىرا ۇستاي بىلگەن بالا ەلدى دە ۇستاي بىلەدى»، «تەلەديدار تويحانا ەمەس»، «ونەردىڭ تۇبىنە ولەرمەندىك جەتەدى» جانە باسقا دا وسىنداي وي سالاتىن تاقىرىپتارداعى كوسەمسوزدەرىن وقۋعا بولادى. كەلەسى بەتتەردى پاراقتاساق، «ونىڭ ارى 1986-جىلى ءولىپ قالعان»، «ءسوز اداسىپ ءجۇر»، «كىسىنى كەدەيلىك بۇزادى»، «ونەرگە سالعان اقشا ولمەيدى» دەگەن وي تولعامدارىن كەزدەستىرەمىز.
كىتاپتىڭ ەكىنشى ءبولىمى «وقي وتىرىڭىز» دەپ اتالادى. بۇل توپتاماداعى «پارتيالار الدىمەن ابايدى وقىسىن»، «شال مەن شەنەۋنىك»، «تۇلەن تۇرتكەندەر مەن تۇندە كولەڭكە ىزدەيتىندەر»، ءداستۇر ساقتالماعان جەرگە جىن-شايتان ءۇيىر»، «دوسى جوق زامان»، «تۇلعا توپقا ەمەس، ۇلتقا قىزمەت ەتەدى»، «كوررۋپتسيانىڭ كۇرەتامىرىن ءتىلىپ جىبەرەتىن ءبىر وتكىر الماس كەرەك» اتتى جازبالارى تاقىرىپتارى ايتىپ تۇرعانداي، زاماننىڭ ءۇنىن، قوعامنىڭ تىنىسىن، ادامداردىڭ بەينەسىن اشىپ كورسەتەتىن دۇنيەلەر ەكەنى داۋسىز. سونداي-اق «شىركىن، شىندىق؟!». ءسىز اقيقاتتى ايتاسىز، ءبىز ءالى كۇنگە شىندىقتىڭ كىرىسپەسىن جازىپ جۇرگەن جوقپىز با؟» دەپ باستالاتىن پايىمدارى قاي وقىرماندى دا وي تەڭىزىنە قاراي جەتەلەيتىنى ءسوزسىز.
«تۇلعا تانۋ» اتتى ءۇشىنشى بولىمدە قازاق ەلىنىڭ بۇگىنى مەن كەلەشەگى ءۇشىن قىزمەت جاساعان، ۇلتتىڭ رۋحاني بايلىعىن ساقتاپ قالۋ جولىندا كۇرەسكەن قايراتكەرلەر تۋرالى سىر شەرتىلەدى.
اۆتور: «الاش قايراتكەرلەرى قىزمەتكەرلەردى «ءبىرى ۇلتقا جانى اشيتىندار دا، ءبىرى ورتالىق نە ايتسا، سوعان باس شۇلعي بەرەتىن ءجاي شەنەۋنىكتەر» دەپ ەكىگە ءبولىپ قاراعان. بۇل پىكىر كۇنى بۇگىنگە دەيىن ماڭىزىن جوعالتقان ەمەس. دەمەك، تۇلعا ۇلتىنا جان-تانىمەن قىزمەت ەتۋشى» دەگەن ويلارىمەن بولىسەدى.
وسى بولىمدە بەكەت اتا تۋرالى جولجازبامەن تانىسۋعا بولادى. سونىمەن قاتار، مۇحتار اۋەزوۆ، شاكەن ايمانوۆ، وزبەكالى جانىبەكوۆ، زەينوللا قابدولوۆ، قادىر مىرزا ءالى، تۇمانباي مولداعاليەۆ، ءسابيت ورازباي، ءاسانالى ءاشىموۆ، عازيزا جۇبانوۆا، شەرحان مۇرتازا، اقسەلەۋ سەيدىمبەك، وسپانحان اۋباكىر ۇلى، ءازىربايجان مامبەتوۆ جانە باسقا دا قازاقتىڭ تانىمال تۇلعالارى تۋرالى اۆتوردىڭ ءار كەزەڭدە جازعان ماقالا، وچەركتەرىن وقۋعا بولادى.
قالامگەر ەندى بىردە «جۋرناليست بولۋ وڭاي دەيمىسىڭ؟..» دەپ ءتىل قاتادى.
«بۇكپەسىز اڭگىمە» اتتى ءتورتىنشى تاراۋعا قالي سارسەنباي ۇلىنىڭ ونەر جانە مادەنيەت قايراتكەرلەرىمەن جۇرگىزگەن سۇحباتتارى توپتاستىرىلعان.
اۆتور: ايدىن بايمەن
