قاسىم حان مەن احمەت ياسساۋي تۋرالى فيلم كەرەك - س. ەلۋباي
بۇل تۋرالى بۇگىن الماتىدا دوستىق ۇيىندە زيالى قاۋىم وكىلدەرىنىڭ ق ر مادەنيەت جانە سپورت ءمينيسترى ارىستانبەك مۇحامەدي ۇلىمەن كەزدەسۋى بارىسىندا بەلگىلى جازۋشى سماعۇل ەلۋباي ءمالىم ەتتى.
«قازاق حاندىعىنىڭ 550 جىلدىعىنا ارنالعان تەلەحيكايا ءتۇسىرىلىپ جاتىر. كوپ ۇزاماي جۇرتشىلىق نازارىنا ۇسىنىلادى. ۇلى دالا تاريحىنا لايىقتى ماتەريال بولىپ كەلە جاتىر. بۇل دا بولسا داعدارىس كەزىندە ۇلكەن ابىروي. تەلەحيكايا 10 سەريادان تۇرادى. ءبىراق، قاسىم حاننىڭ تاريحى جايىندا وعان تاعى 10 سەريا قوسۋ كەرەك دەپ ويلايمىن. ويتكەنى، قاسىم حان - جوشىدان كەيىنگى الەمدەگى ەڭ ۇلكەن ايماقتى بيلەگەن يمپەراتور. ول جاۋعا قارسى 300 مىڭعا جۋىق اسكەر شىعارا الاتىن ۇلى حان بولعان. سوندىقتان، ونى ۇمىتۋ كۇنا بولار ەدى. قازاقستاننىڭ قازىرگى اۋماعى ءدال وسى قاسىم حاننىڭ تۇسىندا قالىپتاسقان بولاتىن»، - دەدى جازۋشى.
سونىمەن قاتار ول، بۇكىل تۇركى جۇرتىنا يماندىلىق نۇرىن شاشقان ۇلى ءدىني قايراتكەر، ءپالساپاشى، اقىن ازىرەتى سۇلتان قوجا احمەت ياسساۋي جايلى فيلم ءتۇسىرۋ كەرەكتىگىن ايتتى.
«قوجا احمەت ياسساۋي ۋاعىزدارىن وقىعان كەزدە ونىڭ الدىندا تەك مۇسىلماندار عانا ەمەس، حريستياندار دا، زاراتۋشترا ءىلىمىن ۇستانۋشىلار دا بولعان. ولار دا ياسساۋيدى وزدەرىنىڭ ۇستازى ساناعان. ياسساۋي تۋرالى كۇنى بۇگىنگە دەيىن كينو تۇسىرىلمەگەنى - تۇسىنىكسىز جاعداي.
ەگەر ءبىز ەرتەرەك قيمىلدامساق، ول باسقا ەلدىڭ وڭ جامباسىنا ءتۇسىپ كەتۋى ىقتيمال. ويتكەنى، ياسساۋي - بۇكىل تۇركى الەمىنە ورتاق تۇلعا. سوندىقتان، ول تۋرالى فيلم تۇسىرسەك، بۇل تەك تۇركى الەمىن عانا ەمەس، بۇكىل الەمدى ەلەڭ ەتكىزەر ەدى»، - دەدى س. ەلۋباي.
اۆتور: جاپپاربەرگەن ايبوتا
