اتاقتى «قارا مايور» ب. كەرىمبايەۆقا پاۆەل سۋدوپلاتوۆ اتىنداعى مەدال تابىس ەتىلدى
سالتاناتتى شارا بارىسىندا كەڭەس وداعىنىڭ باتىرى گريگوري بويارينوۆ اتىنداعى ماسكەۋلىك قوردىڭ وكىلى اۋعان سوعىسىنىڭ ارداگەرى، جاۋىنگەرلەر اراسىندا «قارا مايور» اتانعان، بۇگىندە ق ر قارۋلى كۇشتەرىنىڭ وتستاۆكاداعى پولكوۆنيگى بوريس كەرىمبايەۆقا «پاۆەل سۋدوپلاتوۆ اتىنداعى مەدالدى» تابىس ەتتى.
ءوز سوزىندە بوريس توكەن ۇلى وسىنداي جوعارى دارەجەگە ماراپاتقا يە بولعانى ءۇشىن ماسكەۋلىك قوناقتارعا ريزاشىلىعىن ءبىلدىردى.
«اۋعانىستان مەنىڭ جانىمنان، ەسىمنەن ەشقاشاندا كەتپەيدى. مەن سانا-سەزىمىممەن ۇنەمى سول جاقتا جۇرەمىن. اۋعان جەرى، پاندشەر شاتقالى تۇسىمە كىرەدى. بۇل اۋعاندىق سيندروم عوي. «اۋعاندىقتاردىڭ» بارلىعى وسىنداي كۇي كەشەدى. ءبىز «اۋعاندىقتار» ءبىر-ءبىرىمىزدى ەشقاشاندا ۇمىتپايمىز. ۇنەمى قولداۋ كورسەتىپ وتىرامىز. كەزدەسىپ تۇرامىز. بۇگىن مىنا ماراپاتقا يە بولعانىما ريزاشىلىعىمدى ءبىلدىرەمىن. راحمەت»، - دەدى ب. كەرىمبايەۆ.
ايتا كەتەلىك، گريگوري بويارينوۆ - كەڭەس وداعىنىڭ باتىرى، 1979-جىلى اۋعانىستان پرەزيدەنتى حافيزوللا ءاميننىڭ سارايىنا قارسى شابۋىل وپەراتسياسىنىڭ جەتەكشىسى. وسى وپەراتسيا بارىسىندا قازا تاپقان. ال پاۆەل سۋدوپلاتوۆ - كەڭەستىك بارلاۋشى، ك س ر و ءى ءى م گەنەرال-لەيتەنانتى. 1941-جىلى العاشقى ارنايى ماقساتتاعى جاساقتاردىڭ نەگىزىن قالاۋشى جانە قۇرۋشى.
بوريس توكەن ۇلى كەرىمبايەۆ 1948-جىلى 12 قاڭتاردا الماتى وبلىسىنىڭ جامبىل اۋدانىندا دۇنيەگە كەلگەن. 1970-جىلى ۆ. ي. لەنين اتىنداعى تاشكەنت اسكەري ۋچيليشەسىن ءتامامداعان. 1980-1983-جىلدارى اۋعان سوعىسىنا قاتىسىپ، ارنايى تاپسىرمالاردى ورىندايتىن مۇسىلمان باتالونىنىڭ كومانديرى بولدى. ساۋاتتى باسشىلىقتىڭ ارقاسىندا باتىر كومانديردىڭ ساربازدارى از شىعىنعا ۇشىراپ، كوبىنەسە جەڭىسكە جەتىپ وتىرعان. پاندشەر شاتقالىندا مودجاحەدتەردىڭ اتاقتى قولباسشىسى احماد شاح ماسۋدتىڭ اسكەرىمەن سوعىسقان. ونىڭ ەرلىگى اڭىزعا اينالىپ «قارا مايور» دەگەن لاقاپ اتى كۇللى ايماققا جايىلعان.
1992-جىلى دەنساۋلىعىنا بايلانىستى پولكوۆنيك شەنىمەن وتستاۆكاعا شىقتى.
باتىر تۋرالى «قارا مايور» فيلمى تۇسىرىلگەن.
اۆتور: جاپپاربەرگەن ايبوتا
