رەسەي ۋكراين ازاماتتارىنان اسكەر جاساقتاپ جاتىر

استانا. قازاقپارات - ۋكراينا قاۋىپسىزدىك قىزمەتىنىڭ ءتوراعاسى ۆاسيلي گريتساك رەسەي ۋكراينامەن شەكارادا ءۇشىنشى ارميا كورپۋسىن قۇرىپ جاتقانىن مالىمدەدى.

گريتساكتىڭ ايتۋىنشا، جاڭا قۇرىلىم روستوۆ وبلىسىندا وتكەن جىلدىڭ جەلتوقسانىنان بەرى نەگىزىنەن ۋكراينا ازاماتتارىنان قۇرالىپ جاتىر دەپ جازادى «ازاتتىق».

«بۇل قۇرىلىمنىڭ ەندىگى باسشىسى دا تاعايىندالىپ قويعان» دەگەن گريتساك «ينتەرفاكس» اگەنتتىگىنە.

قىركۇيەكتە Reuters اگەنتتىگى رەسەي ۋكراينانىڭ لۋگانسك وبلىسىمەن شەكارادان 25 كيلومەتر قاشىقتىقتاعى بەلگورود وبلىسىندا ۆالۋيكا اسكەري قالاشىعىن جوبالاپ، تۇرعىزا باستاعانىن حابارلاعان. Reuters ول كەزدە رەسەي ۇكمەتى سايتىندا جاريالانعان تەندەر قۇجاتتارىنا سىلتەمە جاساعان. قۇجات بويىنشا، قالاشىقتا ءۇش مىڭ اسكەرگە ارنالعان كازارمالار، زىمىران-ارتيللەريا قارۋ-جاراعى مەن وق-دارىلەر ساقتاۋعا ارنالعان قويمالار، ۇلكەن جاتتىعۋ كەشەنىن سالۋ جوسپارلانعان.

كەيىن ۋكراينامەن شەكارادا ەكىنشى ءىرى اسكەري بازا قۇرىلىسى باستالعانى حابارلانعان. Reuters- ءتىڭ مالىمەتىنشە، بۇل بازا ۆورونەج وبلىسىنىڭ بوگۋچار قالاسى ماڭىندا ورنالاسادى.

اقپاننىڭ باسىندا ۋكراينا پرەزيدەنتى پەتر پوروشەنكو نەمىستىڭ Bild باسىلىمىنا ۋكراينا اۋماعىندا سەگىز مىڭعا دەيىن رەسەي ساربازى جۇرگەنىن، ال شەكارا ماڭىندا اسكەري بازالار ورنالاستىرىلىپ، اسكەري جاتتىعۋلار وتكىزىلەتىنىن ايتقان.

كيەۆ پەن باتىس ەلدەرى ماسكەۋدى ۋكراينا شىعىسىنداعى قارۋلى قاقتىعىسقا كيلىكتى، سەپاراتيستەردى قولدادى دەپ ايىپتايدى. ءبىراق رەسەي مۇنى جوققا شىعارادى.