ق ر پرەمەر- ءمينيسترى اعىمداعى اپتانىڭ بارىسىندا بيۋدجەتكە تۇزەتۋلەردى دايارلاۋدى تاپسىردى
بۇنداي شارالار جاقىندا وتكەن كەڭەيتىلگەن ۇكىمەت وتىرىسىندا مەملەكەت باسشىسىنىڭ بەرگەن تاپسىرمالارى اياسىندا اتقارىلماق.
«الداعى سەيسەنبىدە قابىلداۋ ءۇشىن وسى اپتاداعى ماقسات - بيۋدجەتكە وزگەرتۋلەردى دايارلاۋ. ياعني بۇل جۇمىستار قارجىنىڭ بارىنشا تەزىرەك ەكونوميكاعا باعىتتالۋى ءۇشىن قاجەت»، - دەدى ك. ءماسىموۆ ۇكىمەت وتىرىسىندا.
بۇدان بۇرىن حابارلانعانداي، ۇكىمەت مەملەكەت باسشىسىنىڭ 2016 -جىلعى 10 - اقپانداعى ۇكىمەتتىڭ كەڭەيتىلگەن وتىرىسىندا بەرگەن تاپسىرمالارىن ورىنداۋ ءۇشىن 2016 -جىلعا ارنالعان داعدارىسقا قارسى قوسىمشا جەدەل شارالار جوسپارىن ازىرلەدى. داعدارىسقا قارسى قوسىمشا جەدەل شارالار 4 باعىت بويىنشا قالىپتاستىرىلدى.
اتالعان باعىتتاردىڭ ءبىرىنشىسى اقشا- نەسيە ساياساتىنىڭ تيىمدىلىگىن ارتتىرۋ جانە قارجىلىق تۇراقتىلىقتى قولداۋعا نەگىزدەلگەن.
ەكىنشىسى، «نۇرلى جول» مەملەكەتتىك باعدارلاماسى شەڭبەرىندە ەكونوميكانى قولداۋ جونىندەگى شارالاردى كەڭەيتۋدى كوزدەيدى.
ءۇشىنشى باعىت شاعىن جانە ورتا بيزنەستى جانە ەكونوميكانىڭ نەگىزگى سالالارىن قولداۋعا ارنالسا، ال ءتورتىنشىسى - ىسكەرلىك بەلسەندىلىك پەن حالىقتى جۇمىسپەن قامتۋدى قولداۋدى قاراستىرادى.
اۆتور: رۋسلان عابباسوۆ
