قىسقى جاسوسپىرىمدەر وليمپياداسىندا ە. تۇرسىنبايەۆا قىسقا باعدارلاما بويىنشا ەكىنشى ورىندا تۇر

 استانا. قازاقپارات - نورۆەگيانىڭ ليللەحامەر قالاسىندا جاسوسپىرىمدەر اراسىنداعى قىسقى وليمپيادا ءوتىپ جاتىر، دەپ جازادى alaman.kz سپورت سايتى.

مانەرلەپ سىرعاناۋدان قىزدار اراسىنداعى سىننىڭ قىسقا باعدارلاماسى بويىنشا قازاقستاندىق ەليزابەت تۇرسىنبايەۆا 59,11 ۇپاي جيناپ، ەكىنشى ورىندا كەلە جاتىر. كوش باسىندا 60,87 ۇپايمەن جاپونيالىق يۋنا شيرياۆا تۇر. ۇزدىك ۇشتىككە لاتۆيالىق ديانا نيكيتينا ەنگەن، ۇپايى 58,81.

قىزدار اراسىنداعى سىننىڭ نەگىزگى باعدارلاماسى 16 - اقپاندا وتەدى. جەڭىمپاز وسى كۇنى انىقتالادى.

قازاقستان ازىرگە بۇل وليمپيادادا ءبىر قولا مەدال يەلەندى. ونى بياتلونشى ارينا پانتوۆا جەڭىپ العان ەدى.