تۇركيا سيرياعا شابۋىل جاسادى
بۇل تۋرالى ر ي ا نوۆوستي سەنبى كۇنى كەشتە اسكەري دەرەككوزگە سىلتەمە جاساي وتىرىپ حابارلادى.
وسىنداي وقيعانى تۇرىك بيلىگىندەگى دەرەككوز Reuters اگەنتتىگىنە دە ايتىپ بەرگەن. ال تۇرىكتىڭ مەملەكەتتىك اگەنتتىگى Anadolu ءوزىنىڭ اسكەري دەرەككوزىنە سىلتەمە جاساي وتىرىپ، تۇركيا قارۋلى كۇشتەرىنىڭ سيريالىق ارميانىڭ مينومەتپەن اشقان سوققىسىنا جاۋاپ رەتىندە سيريالىق ۇكىمەت جاساعىنا وق اتقانىن حابارلادى.
دەرەككوزدىڭ مالىمەتىنشە، سيريالىق جاساقتار سيريانىڭ سولتۇستىك بولىگىندەگى شەكاراسىنداعى حاتاي ەلدى مەكەنىندە تۇرىك پوليتسەيلەرىنە وق اشقان. اگەنتتىكتىڭ دەرەككوزى تۇركيانىڭ ناقتى قانداي سوققىمەن جاۋاپ بەرگەنىن حابارلاماي وتىر، - دەپ جازادى ر ب ك.
تۇركيانىڭ پرەمەر- ءمينيسترى احمەت ءداۋىتوعلى كۇردتەردىڭ پوزيتسياسىنا سوققىنىڭ جاسالعانىن راستادى. ول تۇرىك ارمياسىنىڭ سيريالىق كۇردتەردىڭ «دەموكراتيالىق وداق» پارتياسىنا قارسى اسكەري وپەراتسيا جاساي الاتىنىن ايتتى، سەبەبى انكارا بۇل پارتيانى لاڭكەستىك دەپ سانايدى. ءداۋىتوعلى سيريالىق كۇردتەردى ازاز قالاسىنىڭ ماڭىنداعى تەرريتوريادان شۇعىل كەتۋگە شاقىردى.
«ءبىز ولاردىڭ ءاربىر باسقان قادامى ءۇشىن كەك الامىز»، - دەپ مالىمدەدى ءداۋىتوعلى تۇرىك تەلەارنالارىنىڭ بىرىنە بەرگەن سۇحباتىندا.
«كەشە جانە بۇگىن تەررورلىق ۇيىم رەسەيلىك بومبالاۋشىلاردىڭ قولداۋىمەن ازاز قالاسىنا شابۋىل جاسادى... وسى شابۋىل كەزىندە ءبىزدىڭ شەكارامىزعا قاۋىپ ءتوندى، بۇعان شۇعىل ەرەجە قولدانۋ قاجەت بولدى. ءبىزدىڭ تاراپىمىزدان قاجەتتى جاۋاپ بەرىلدى. دجو بايدەن تەلەفون ارقىلى تىلدەسكىسى كەلدى، ونىڭ بارىسىندا مەن ونىڭ ەسىنە مۇنداي ۇيىمداردىڭ اشىق قاتەر سالىپ، ءتۇسىندىردىم. ءبىز ولارعا قارسى شارا قولدانامىز»، - دەپ كەلتىرەدى رەن ت ۆ تەلەارناسى ءداۋىتوعلىنىڭ ءسوزىن.
«ءبىز يراكتا قولدانعان شارالاردى سيريادا دا قاجەت بولسا قولدانامىز»، - دەپ كەلتىرەدى تۇركيا پرەمەر- ءمينيسترىنىڭ ءسوزىن Agence France-Presse. ول كەزدە 2015 -جىلى تۇركيا اۋە كۇشتەرى كۇردستاننىڭ جۇمىسشىلار پارتياسىنىڭ پوزيتسيالارىنا سوققى جاساعان بولاتىن.
Kaz.tengrinews.kz
