قانداستارىمىز قىزمەت ەتەتىن اۋدارما-دۋبلياج ورتالىعى العا وزىپ تۇر
سىيلىققا يە بولعان مەكەمە - «التاي ايماقتىق كينو-تەلەفيلم اۋدارما ورتالىعى». قىتاي تىلىندەگى تالاي كوركەم دۇنيەنى قازاقشا سايراتقان ۇجىمنىڭ ماراپات الۋى تەگىن ەمەس. سەبەبى، ولار اۋدارعان 86 سەريالى «سۋ بويىندا» (جاڭا نۇسقاسى) تەلەحيكاياسى «تاڭداۋلى تۋىندى» بولىپ باعالانسا، «بوسقىندار» سەريالى «قۇرمەت» سىيلىعىنا يە بولعان.
نەگىزى، قىتايدىڭ «سۋ بويىندا» اتتى ايگىلى تۋىندىسى قازاقستان كورەرمەندەرىنە «وزەن يىرىمدەرى» دەگەن اتپەن تانىس. ال، روماننىڭ تەلەسەريال تۇرىندە جاسالعان جاڭا نۇسقاسىن اۋدارىپ، قازاق كورەرمەندەرىنە جەتكىزۋدە «التاي ايماقتىق كينو-تەلەفيلم اۋدارما ورتالىعى» ۇلكەن كۇش شىعاردى.
اتالعان ورتالىق 2001-جىلى قىركۇيەك ايىندا التاي تەلەارناسى تەلەفيلم اۋدارما ءبولىمى رەتىندە قۇرىلعان.
العاشىندا 4 ادام جانە كونە تەحنيكالارمەن جۇمىس باستاعان ءبولىم، 2008-جىلى التاي تەلەۆيزياسىنان ءبولىنىپ، «التاي ايماقتىق كينو-تەلەفيلم اۋدارما ورتالىعى» بولىپ قۇرىلعان.
قازىرگى كۇنى كەمەلدى ۇجىمعا اينالعان ورتالىق، 2012-جىلى ايماقتىڭ اكىمشىلىگىنىڭ قولداۋىندا، 1100 شارشى مەترلىك جاڭا ستۋديا، تىڭ تەحنيكامەن قامتاماسىز ەتىلدى. قازىر ورتالىقتا جۇمىس ىستەيتىن 30 داي قىزمەتكەر جىلىنا 400 سەريادان استام تەلە ءونىم اۋداردى. ولار شىڭجاڭ تەلەارناسى مەن جەرگىلىكتى ارنالاردا كورسەتىلىپ، كورەرمەننىڭ وڭ ىقىلاسىنا يە بولۋدا. اتالعان تەلەحيكايالار شىنجاڭ تەلەارناسى ارقىلى قازاقستان مەن موڭعوليانىڭ شەكارالاس اۋداندارىنا دا تارالادى ەكەن.
ورتالىقتىڭ جەتىستىگى بۇل عانا ەمەس كورىنەدى. ولار 2015-جىلى ماۋسىم ايىندا «شىڭجاڭ اقپارات، باسپا ءسوز-راديو-كينو-تەلەارنا» مەكەمەسى وتكىزگەن «2014-جىلعى شىنجاڭ از ۇلتتار تىلىندەگى تاڭداۋلى اۋدارما كينو-تەلەفيلمدەردى باعالاۋ باسەكەسىندە دە توپا جارعان.
ياعني، «التاي ايماقتىق كينو-تەلەفيلم اۋدارما ورتالىعى» اۋدارىپ، دۋبلياجداعان «توڭكەرىس جىلدارى»، «الىستاعى ارپالىس» جانە «سيدنيگە ساپار» اتتى تەلەفيلمدەر جەكە-جەكە ەكىنشى، جانە ءۇشىنشى ورىندارعا قول جەتكىزگەن.
«اۋدارماشىلاردى، دۋبلياج اكتەرلەرىن، تەحنيكتەردى تاربيەلەۋدى جەتىلدىرىپ، جابدىقتاردىڭ سيفرلانۋ ورەسىن جوعارىلاتۋعا كۇش سالامىز. ورتالىعىمىزداعى قىزمەتكەرلەر تىنباي ەڭبەكتەنىپ، مۋلتفيلم، بالالارعا ارنالعان كينو جانە عىلىمي دەرەكتى فيلمدەردى اۋدارىپ، دۋبلياجداپ قازاق كورەرمەندەرىنىڭ رۋحاني سۇرانىسىن قاناعاتتاندىرۋ جولىندا قىزمەت ەتۋدە» دەيدى ورتالىق ديرەكتورى جەڭىس قىدىرموللا ۇلى «ءتاڭىرتاۋ» تورابى تىلشىسىنە.
بۇگىندە، «التاي ايماقتىق كينو-تەلەفيلم اۋدارما ورتالىعى» اۋدارىپ-دۋبلياجداعان تەلەفيلمدەردىڭ سارا تۋىندى جاراتۋ سالىستىرماسى 86 پايىزدان اسىپ، شىنجاڭداعى قازاق تىلىندەگى تەلەفيلم اۋدارىپ-دۋبلياجدايتىن ءتورت بازانىڭ بىرىنە اينالعان. قازاق كورەرمەندەرىنە ساپالى اۋدارما تۋىندىلار ۇسىنىپ وتىرعان ۇجىمنىڭ الداعى جوسپارى ءتىپتى دە ۇلكەن.
مۇرات الماسبەك ۇلى
فوتو: kazak.ts.cn
Baq.kz
