كۇنشىلدەردەن قورعانۋ جولى

نۇر- سۇلتان. قازاقپارات - «سەنىڭ قايعىڭا ەمەس، قۋانىشىڭا شىن ورتاقتاسا بىلەتىن ادام عانا ناعىز دوس» دەگەنگە كوبىمىز باس يزەيمىز.

راسىمەن، قايعىنى بولىسە ءبىلۋ وڭاي. ال ەش ءىشتارلىقسىز، قىزعانىشسىز سەنىڭ جەتىستىگىڭ مەن قۋانىشىڭا وزىڭدەي قۋانا بىلەتىن ادام كەمدە- كەم. ءومىر بار جەردە پەندە بار. پەندە بولعان جەردە ادام بالاسىن ەر، ايەل زاتى دەپ بولمەي- اق كورەالماۋشىلىق قاي- قايسىسىنا دا تيەسىلى قۇبىلىس بولۋى زاڭدىلىق. ال اينالامدا تاپ سونداي كۇنشىلدەر بار دەپ ۇنەمى قۋانىشىڭىزدى جاسىرىپ تاعى وتىرا المايسىز.

كوكتەن تىلەمەي- اق، وزگەدەن كەلگەن كورە الماۋشىلىق قاشان دا اركىمنىڭ تىرلىگىنە كەسەلىن تيگىزبەسە، وڭ ۇلەسىن تيگىزبەيتىنى انىق. ەڭ كەمىندە بۇل قاسيەت ادامنىڭ كوڭىل- كۇيىن بۇزىپ، ەڭ زورى دەگەندە كورە الماۋشىلاردىڭ كەسىرىنەن ادامزات نەشە ءتۇرلى ساتسىزدىككە ۇشىراپ جاتادى.

كۇنشىلدەردى ەنجار جانە بەلسەندى دەپ ەكىگە بولۋگە بولادى. ءبىرىنشىسى قىزعانىشىن ارامدىقپەن، سابىرلىقپەن ىشىنە جاسىرىپ تىنسا، ەكىنشى ءتۇرى قىزعانىشتان ءوز تەرىسىنە ءوزى سىيماي، ىشىندەگىسى كوزىندەگى ىزالى كوزقاراسىمەن، اۋزىنداعى ۋلى سوزدەرىمەن، نە وزىڭىزگە قارسى قاساقانا جاسالىنعان ارەكەتتەرىمەن سىرتقا شىعارىپ وتىرادى. ارينە، مۇنداي كەزدە ءوزىڭىزدى بۇل نارسەدەن بيىك ۇستاپ، ايتىلعان، جاسالعان نارسەگە كوڭىل اۋدارماۋ - ونى شەشۋدىڭ ەڭ ءتيىمدى جولى. ءبىراق، كەيبىر جاعدايدا ءسىزدىڭ وعان نازار اۋدارماسىڭىزدى قويماي، ءوزىڭىز ارالاسۋدى قاجەت ەتەتىن كەزدەر بولادى.

جاراتىلىستا وزگەگە مەيىرىم مەن قامقورلىق ەتۋمەن بىرگە، ءوز قاۋىپسىزدىگىڭ ءۇشىن وزگەدەن قورعانۋعا جول بەرىلگەن. ءوزىمىزدى مۇنداي ادامداردان قورعاۋ ءومىرىمىزدىڭ تىنىشتىعىن قامتاماسىز ەتپەك. سونىمەن، كۇنشىلدەردەن قورعانۋدىڭ تەكسەرىلگەن، ىسكە اساتىن ەكى جولىن ۇسىنامىز:

1. قىزعانىشتى جويۋ. وكپەلى ادام وزگەنى وكپەلەتۋگە قۇمار. جاماندىق كورگەن ادام جاماندىق جاساۋعا قۇمار كەلەدى. ءبىراق، بۇل جەردە، ەڭ باستىسى، ول ماعان ادەيى وسىلاي جاسادى ەكەن دەپ سول ادامنىڭ دەڭگەيىنە ءتۇسۋدىڭ قاجەتى جوق. بار بولعانى مۇنداي ادامنان الشاقتاۋ. ونىمەن ارالاسۋدى دوعارۋ. ءسىز - ءوز ءومىرىڭىزدىڭ قوجايىنىسىز. سول سەبەپتەن، قاي جولمەن جۇرسەڭىز دە، كىممەن ارالاسساڭىز دا وزىندىك تاڭداۋ قۇقىعىڭىز بار. ونىمەن ارالاسپاۋ - ءسىزدىڭ سانالى شەشىمىڭىز. سول سەبەپتەن، ول ءۇشىن ءوز شەشىمىڭىزدى ونىڭ الدىندا اقتاپ، ءوزىڭىزدى ىڭعايسىز سەزىنىپ قاجەتى جوق.

2. قىزعانىشتى بەيتاراپتاندىرۋ. ەگەر دە، كورە الماۋشىلىعىمەن ىلعي جولىڭىزدى وراپ جۇرگەن ادامنان ەش الشاقتاۋ مۇمكىن ەمەس، ول ءسىزدىڭ ارىپتەسىڭىز، كورشىڭىز بولعاندىقتان ونى كورمەۋدىڭ ەش جولى جوق بولسا، وندا ول اداممەن كەلەتىن قىزعانىشتى بەيتاراپتاندىرىپ وتىرۋ كەرەك. قالاي؟ ماسەلەن، جاي كۇندەرى ول «قالىڭ قالاي؟» دەپ سۇراعاننىڭ وزىندە، «شۇكىر! بارمىز عوي، ايتەۋىر» دەگەن فورمادا كوپپەن بىردەي شارشاپ جۇرگەندەي بولىڭىز. ءساتى كەلگەندە ونى ماقتاپ، جاقسى تۇستارىن اتاپ، كوتەرمەلەپ قويىڭىز.

ال قۋانىشىڭىزبەن بولىسەر ساتتە، سول جەتكەن جاقسىلىعىڭىزدىڭ تاپ ءسىز ويلاعانداي بولماي تۇرعاندىعىن، نە ءسىزدىڭ دە وزگەلەر سەكىلدى تار جول تايعاق كەشۋدەن ءوتىپ بارىپ جەتكەندىگىڭىزدى، بۇل مىنا جەردەگى جەڭىسىڭىز بولسا، ءومرىڭىزدىڭ باسقا تۇسى ءالى دە اقساپ تۇرعانىن ايتىپ، كورە الماۋشىنى قۋانتىپ، قىزعانىشىن ورتايتىڭىز. نەگە؟ سەبەبى، مۇنىڭ ءبارى «دوسىڭدى وزىڭە جاقىن ۇستا، ال جاۋىڭدى ودان دا جاقىن ۇستا» دەگەننەن شىعىپ وتىر. ول سىزگە جاقىن جۇرگەندە عانا ونىڭ ءار قادامىن كورىپ، نە جوسپارلاپ جۇرگەنىنەن حابارىڭىز بولادى. ءتىپتى، ونى تولىقتاي زەرتتەپ، ناعىز وزىڭىزگە قاۋىپ تونگەن كەزدە، ونىڭ جاندى جەرى ارقىلى دۇرىس ارەكەت جاساپ، قورعانا بىلەتىن بولاسىز.

massaget.kz