الماتىدا «كوكتوبە» تەلەمۇناراسى تۇندە جارقىراپ تۇراتىن بولادى - فوتو

الماتى. قازاقپارات - الماتىدا ارحيتەكتۋرالىق جارىقتاندىرۋ تۇجىرىمداماسى قولعا الىندى. تۇنگى ۋاقىتتا جارىقتاندىرۋ تەحنولوگياسىن قولدانۋداعى باستى ماقسات - ءتۇرلى-ءتۇستى جارىق ءتۇسىرۋ ارقىلى قالادا بەتكە ۇستار نىسانداردى ەرەكشە قىرىنان كورسەتۋ جانە الماتىنىڭ تۋريستىك تارتىمدىلىعىن ارتتىرۋ.

تۇجىرىمداما اياسىندا رەسپۋبليكا الاڭىنداعى ەكى ءزاۋلىم عيماراتقا جارىق تۇسىرگىش جۇيە ورناتىلادى. ال الماتى قالاسى اكىمدىگىنىڭ عيماراتىنا قازىر تۇنگى ۋاقىتتا ءتۇرلى-ءتۇستى جارىق تۇسىرىلەتىن بولدى.

كوپ ۇزاماي تاعى ەكى اكىمشىلىك عيمارات پەن تاۋەلسىزدىك مونۋمەنتىنە دە وسىنداي جۇيە ورناتىلادى.

ودان باسقا، «كوكتوبە» تەلە مۇناراسىنا ءتۇرلى-ءتۇستى جارىق ءتۇسىرۋ جۇيەسىن ورناتۋ بويىنشا جۇمىستاردىڭ العاشقى كەزەڭى اياقتالدى.

مۇنارانىڭ سەگىز دەڭگەيىنە 62 پروجەكتور ورناتىلدى. قۇرىلعىلاردى ورناتۋ بارىسىندا زاماناۋي جارىق ديودتى قۋات ۇنەمدەگىش تەحنولوگيا قولدانىلدى.

الداعى ءساۋىر ايىندا ەكىنشى كەزەڭ باستالادى. مۇندا مۇنارانىڭ ۇشار باسىن جارىقتاندىرۋ ءۇشىن قوسىمشا 22 مەتال گالوگەندىك پروجەكتور ورناتىلادى. ءۇشىنشى كەزەڭدە تەلەمۇنارانىڭ اينالاسى جارىقتاندىرىلادى. جۇمىستاردى اياقتاۋ مەرزىمى - 2016-جىلدىڭ تامىز ايى.

الماتىنىڭ ارحيتەكتۋرالىق جارىقتاندىرۋ تۇجىرىمداماسى بيىل 6-اقپاندا قالا اكىمىنىڭ قاتىسۋىمەن وتكەن قالا قۇرىلىسى كەڭەسىندە قابىلدانعان بولاتىن. سوعان سايكەس، قالادا 203 نىسانعا كومەسكى جارىق تۇسىرگىش جۇيە ورناتىلاتىن بولادى. ولاردىڭ اراسىندا ماڭگىلىك الاۋ، وفيتسەرلەر ءۇيى، اباي اتىنداعى مەملەكەتتىك اكادەميالىق وپەرا جانە بالەت تەاترى، ن. ساتس اتىنداعى تەاتر، ءا. قاستەيەۆ اتىنداعى ۇلتتىق مۋزەي، ق ر عىلىم اكادەمياسى، ءال-فارابي اتىنداعى قاز ۇ ۋ، قازاقستان- بريتان تەحنيكالىق ۋنيۆەرسيتەتى، ورتالىق ستاديون، مۇز ايدىنى، سيرك، «بالالار الەمى» دۇكەنى، «الماتى» قوناق ءۇيى، زاڭعار، «City Center» ساۋدا ويىن-ساۋىق ورتالىعى جانە «سايران» اۆتوۆوكزالى بار.

«جاڭا تۇجىرىمداما بويىنشا ءتۇرلى-ءتۇستى جارىق تۇسىرگىش جۇيەسىندە اق جانە سارى- قىزعىلت رەڭدەرگە باسىمدىق بەرىلەدى. زاماناۋي قۋات ۇنەمدەگىش تەحنولوگيالاردى قولدانۋ - ەلەكتر قۋاتىن ۇنەمدەۋگە مۇمكىندىك بەرەدى»، - دەدى ءوز سوزىندە الماتى قالاسىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ باستىعى ەركەبۇلان ورازالين.

ايتا كەتەلىك، قالادا وسىنداي جارىقتاندىرۋ جۇيەسىنىڭ ارقاسىندا جول-كولىك وقيعالارى مەن كوشە قىلمستارىن 25 پايىزعا ازايتۋعا بولادى ەكەن. بۇل جوبانى جۇزەگە اسىرۋعا بيۋدجەتتەن تىس 2 ميلليارد تەڭگە جۇمسالادى.