ماڭعىستاۋ وبلىسىندا اقتاۋ تەڭىز پورتىن سولتۇستىك باعىتقا كەڭەيتۋ جوباسى جۇزەگە اسىرىلىپ جاتىر
وسى باعدارلاما شەڭبەرىندە وبلىسىمىزدا ينۆەستيتسيالىق قۇنى 157 ميلليارد تەڭگە بولاتىن 14 جوبا ىسكە اسىرىلىپ جاتىر، دەپ مالىمدەدى وبلىس اكىمى اليك ايداربايەۆ اقتاۋ قالاسىنىڭ اكىمى سەرىكباي تۇرىموۆتىڭ حالىق الدىندا قورىتىندى ەسەپ بەرۋ كەزدەسۋىندە. بۇل تۋرالى قالالىق اكىمدىكتىڭ باسپا ءسوز قىزمەتى حابارلادى.
وبلىس اكىمىنىڭ ايتۋىنشا 14 جوبانىڭ ىشىندە «بورجاكتى - ەرساي» تەمىر جولى، قۇرىق كەنتىندەگى پارومدىق كومپلەكس، «شەتپە - جەتىباي - اقتاۋ» اۆتوموبيل جولى جانە اقتاۋ تەڭىز پورتىن سولتۇستىك باعىتقا قاراي كەڭەيتۋ سياقتى ءىرى جوبالار بار.
وسى جۇمىستاردىڭ بارلىعى ماڭعىستاۋ وبلىسىنىڭ قازاقستاننىڭ وڭتۇستىك-باتىسىندا وڭىرلىك حاب رەتىندە قالىپتاسۋىنا ىقپال ەتەتىن بولادى.
- «بيزنەستىڭ جول كارتاسى 2020» باعدارلاماسىنىڭ اياسىندا وتكەن جىلى 5 ميلليارد تەڭگەگە 124 جوبا ماقۇلدانسا، ونىڭ ىشىندە اقتاۋ قالاسىنا تيەسىلى 79 جوبا. 2015-جىلدىڭ قورىتىندىسىنا سايكەس، ماقۇلدانعان جاڭا جوبالاردىڭ ءوسۋ قارقىنى بويىنشا ءبىزدىڭ ءوڭىر رەسپۋبليكادا العاشقى ورىندى يەلەنۋى جىل بويى اتقارىلعان جۇمىستاردىڭ جەمىسى دەپ ەسەپتەيمىن، - دەدى اليك سەرىك ۇلى.
وبلىس باسشىسى قالا اكىمىنە جۇمىستى ودان ءارى جانداندىرۋ باعىتىندا ءبىرقاتار ناقتى تاپسىرمالار بەردى. سونداي-اق، بالالاردى مەكتەپكە دەيىنگى تاربيەلەۋ جانە وقىتۋمەن قامتۋ ماقساتىندا كاسىپكەرلىك سەكتورىن تارتۋ جولىمەن كۇن تارتىبىندە تۇرعان وزەكتى ماسەلەنى شەشۋ قاجەتتىگىن ايتتى.
كەزدەسۋ ناتيجەسىندە تۇسكەن سۇراقتار مەن ۇسىنىستاردان ارنايى ءىس-شارالار جوسپارى جاساقتالىپ، جۇمىستار جۇرگىزىلەتىن بولادى.
