بايان ەسەنتايەۆانىڭ توبى «گۇل اپشە» ءۇشىن رۋمىن مادەني ورتالىعىنىڭ الدىندا جاۋاپ بەرەدى

بۇعان دەيىنگى اقپاراتتاردا بايان ەسەنتايەۆانىڭ پروديۋسەرلىگىندەگى «الاۋ» توبى «گۇل اپشە» ءانىن 30-جىلدارى رۋمىن ءانشىسى ماريا لەتەرەتسۋدىڭ انىنەن كوشىرىپ العاندىعى حابارلانعان. ناقتىراق ايتقاندا، «الاۋلىقتار» ءاننىڭ وزگەرتىلگەن نۇسقاسى «رو-مانيا» توبىنىڭ اۋەنىن العان. باستاپقىدا بۇل ۇقساستىقتى Gakku ارناسى بايقاپ، جىگىتتەردى «ۇرلىق جاسادى» دەپ جاريالاعان.

ال، بايان ەسەنتايەۆا بۇل جاعدايدى جاۋاپسىز قالدىرماي، ءان ۇرلىق ەمەس، كاۆەر نۇسقا ەكەنىن جەتكىزدى. جانە بۇل ايىپتاۋى ءۇشىن Gakku ارناسى كەشىرىم سۇراسىن دەپ سالدى. ال Gakku ارناسى كەشىرىم سۇراماق تۇگىل، بەينەباياندى ءوز «Youtube»  ارناسىنان الىپ تاستادى.

بۇعان سەبەپ تە جوق ەمەس، Gakku ارناسىنا رۋمىن مادەني ورتالىعىنىڭ نەگىزىندە قۇرىلعان «داكيا» ەتنوفولكلورلىق ءانسابلدىڭ ءسوليسى حابارلاسقان.

ءدال وسى انسامبل وسى ءاندى قازاقستان تەرريتورياسىندا شىرقاۋعا رۇقسات العان.

«ءبارىمىز قازاقستاننىڭ پاتريوتىمىز جانە مەملەكەتىمىزدىڭ زاڭدارىن ۇستانۋىمىز ءتيىس، باسقالاردىڭ قۇقىعىن تاپتاماۋىمىز كەرەك! بايان ەسەنتايەۆا باستاپقىدا كاۆەر دەپ ايتپادى، رۋمىن توبىنىڭ ارانجيروۆكاسىن تازا كۇيىندە الىپ العان. «رو-مانيا» توبىمەن ءبىز جاقسى قارىم-قاتىناستامىز. ءبىز قوعامدىق قاۋىمداستىق بولعاندىقتان كونسەرتتەرىمىزدەن ەش پايدا تاپپايمىز، ولاي بولسا نەگە قۇقىعىمىزدى قورعاماۋىمىز كەرەك؟!» - دەپ جازدى الەكس مۋراشيەۆ ەسىمدى انسامبل ءسوليسى Gakku ارناسىنىڭ جەكە پاراقشاسىنا.

سونىمەن بىرگە، بۇل ءاننىڭ پلاگيات ەكەنى انىقتالعاندا عانا بايان ەسەنتايەۆا كاۆەر حەشتەگىن قوسقاندىعى جايلى جازعاندار كوپ. وعان قوسا، كاۆەر نۇسقا ەشقاشان تازا نۇسقاسىن قايتالاماۋى كەرەك، وعان بەينەبايان تۇسىرىلمەيدى جانە ارنالارعا روتاتسياعا جىبەرىلمەيدى، تەك ورىنداۋشىنىڭ جەكە توپتاماسىندا تۇرۋى ءتيىس دەگەندەر دە تابىلدى.

ب. ەسەنتايەۆا بۇل ءاندى ءبىر كەزدەرى ەديت پياف تا ورىنداعانىن العا تارتقان، الايدا ءمالىم بولعانداي ەديت پياف وسى ءاندى ورىنداعان سايىن اۆتورعا گونورار تولەپ وتىرعان.

رۋمىن مادەني ورتالىعىنىڭ مۇشەسى جاقىندا وسى ءاننىڭ ارانجيروۆكاسىن جاساعان اۆتورلار قازاقستانعا كەلەتىنىن ءمالىم ەتتى. كەلگەن بويدا بايان ەسەنتايەۆامەن ديالوگ جۇرگىزبەك. جانە Gakku ارناسىنا ولاردى قولداعانى ءۇشىن العىس ءبىلدىردى.