ن. نازاربايەۆ ءساۋىر ايىنىڭ سوڭىندا يرانعا رەسمي ساپارمەن بارادى
قازاقستان تاراپىنان ۇيىمداستىرىلعان بيزنەس-فورۋم جانە «ساۋدا ميسسياسى» الدىن الا كۇتىلگەن مەجەدەن دە ارتىق بيزنەسمەندەردىڭ باسىن قوسۋعا مۇمكىندىك جاسادى، تەگەران قالاسىندا وتكەن بيزنەس-كەزدەسۋلەرگە ەكى ەلدىڭ ىسكەر توپتارىنىڭ 1000 نان استام وكىلى قاتىستى، دەپ حابارلادى ۆەدومستۆونىڭ باسپا ءسوز قىزمەتى.
قازاقستان رەسپۋبليكاسى ينۆەستيتسيالار جانە دامۋ ءمينيسترى اسەت يسەكەشيەۆ ەكى كۇن ىشىندە يران يسلام رەسپۋبليكاسىنىڭ (ي ي ر) عىلىم جانە تەحنولوگيالار بويىنشا ۆيتسە-پرەزيدەنتى سۋرنا ساتتاريمەن، ي ي ر- ءدىڭ سىرتقى ىستەر ءمينيسترى مۇحامماد دجاۆاد زاريفپەن، ونەركاسىپ، كەنىشتەر جانە ساۋدا ءمينيسترى مۇحامماد رەزا زاريفپەن، اۋىل شارۋاشىلىعى جانە دجيحاد ءمينيسترى ماحمۇد حودجاتيمەن، شاستا يراندىق ءىرى حولدينگىنىڭ باسشىلارىمەن كەزدەستى، سونىمەن بىرگە، 13 سالاداعى يراندىق ءىرى كومپانيالاردىڭ وكىلدەرىمەن ماڭىزدى كەزدەسۋلەر وتكىزىلدى.
قورىتا ايتقاندا، جوعارى دەڭگەيدە وتكەن ساۋدا ميسسياسى ناتيجەسىندە قازاقستاندىق بيزنەس يران رىنوگىنان ۇلكەن باسىمدىقتاردى كورىپ وتىر. سونىمەن بىرگە، يران رىنوگى ارقىلى بولاشاقتا ەگيپەت، اۋعانستان، يراك سياقتى ەلدەردىڭ رىنوگىنا شىعۋعا تولىق مۇمكىندىك بار. ءوز كەزەگىندە يران قازاقستاندى رەسەي مەن قىتايدىڭ رىنوگىنا شىعاتىن حاب رەتىندە تانىدى.
يران يسلام رەسپۋبليكاسىنىڭ رەسمي وكىلدەرىمەن كەزدەسۋ بارىسىندا ۇستىمىزدەگى جىلدىڭ ءساۋىر ايىنىڭ سوڭىندا بولاتىن مەملەكەت باسشىسى نۇرسۇلتان نازاربايەۆتىڭ يرانعا رەسمي ساپارىنىڭ دايىندىق ماسەلەلەرى تالقىلاندى.
ي ي ر ۆيتسە-پرەزيدەنتى سۋرنا ساتتاري عارىش سالاسىنداعى، ستارتاپتاردى دامىتۋ، اقپاراتتىق- كوممۋنيكاتسيالىق تەحنولوگيالار سالاسىنداعى ىنتىماقتاستىقتى دامىتۋ مۇمكىندىكتەرىنە باسا نازار اۋداردى. وسى سالاداعى ماسەلەلەردى تالقىلاۋ ءۇشىن جۇمىس توبىن قۇرۋ تۋرالى كەلىسىمگە قول جەتكىزىلدى. بۇل جۇمىس توبى عىلىم، اقپاراتتىق تەحنولوگيا، عارىش قىزمەتى، بيوتەحنولوگيا جانە مەديتسينالىق قىزمەت كورسەتۋ سالالارى بويىنشا جۇمىس ىستەيتىن بولادى.
تاراپتار بىرنەشە باعىتتار بويىنشا جۇمىستى بەلسەندى جۇرگىزۋ جونىندە كەلىستى. ونىڭ ىشىندە ساۋدا جانە ينۆەستيتسيا باعىتى بويىنشا جۇمىستارعا بارىنشا باسىمدىق بەرىلەتىن بولدى. ول ءۇشىن 6 قوسىمشا جۇمىس توبى: مەتاللۋرگيا جانە تاۋ-كەن مەتاللۋرگياسى كەشەنى، اۋىل شارۋاشىلىعى جانە تاماق ونەركاسىبى، ماشينا جاساۋ، تۋريزم، ينجەنەرلىك-تەحنولوگيالىق ىنتىماقتاستىق جانە قارجى سالالارىندا قۇرىلدى.
قازاقستان مەن يران ىسكەر توپتارىنىڭ كەزدەسۋى بارىسىنداعى ەكىنشى شەشۋشى باعىت - كولىك جانە لوگيستيكا سالاسىنداعى ىنتىماقتاستىق بولدى.
تەگەراندا وتكەن كەزدەسۋلەر بارىسىندا قازاقستان تاراپى يرانعا اۋىل شارۋاشىلىعى ونىمدەرى سالاسىندا جان- جاقتى ىنتىماقتاستىق بايلانىس جاساۋدى ۇسىندى. بۇل رەتتە وسىمدىك مايى ءوندىرىسىن قۇرۋ، يرانعا قازاقستاندىق استىق جانە ەت ونىمدەرىن ەكسپورتتاۋ ماسەلەلەرى تىلگە تيەك ەتىلدى.
سونىمەن بىرگە، كەزدەسۋلەردە اۋە باعىتتارىنىڭ جيىلىگىن ارتتىرۋ، ەكى مەملەكەت بانكتەرى اراسىندا شەتەل ۆاليۋتاسىمەن ءوزارا ەسەپ ايىرىسۋ جونىندەگى ماسەلەلەردى جەدەل شەشۋ، ۆيزالىق رەجىمدى جەڭىلدەتۋ جانە باسقا وزەكتى ماسەلەلەردى تالقىلادى. ساپار بارىسىندا اسەت يسەكەشەۆ يراننىڭ ەڭ ءىرى ونەركاسىپ كومپانيالارىنىڭ، قارجى حولدينگتەرىنىڭ باسشىلارىمەن كەزدەستى. ولاردىڭ ىشىندە SHASTA», «Hegta» «PhiliGroup», «SunirGroup», «MarnaGroup» «Ghadir Invest», «Sadid Industrial Group» سياقتى حولدينگتەر بار. بۇل جەتەكشى كومپانيالار التىن، جەز، تەمىر كەن ورىندارىن يگەرۋگە، تۋريزم سالاسىنداعى جوبالارعا مۇناي-حيميا ونىمدەرى ءوندىرىسى، ماشينا جاساۋ، فارماتسيەۆتيكا، ەت، وسىمدىك مايى، جەمىس-جيدەك جانە باسقا سالالارعا بىرلەسكەن ينۆەستيتسيالار سالۋعا قىزىعۋشىلىق ءبىلدىردى.
ەرەكشە اتاپ وتەتىن تاعى ءبىر ماسەلە يراننىڭ ءىرى اۆتوكولىك ديلەرلەرىمەن وتكىزىلگەن كەزدەسۋ بولدى. وسى كەزدەسۋ بارىسىندا يراندىق ديلەرلەر قازاقستاندىق 1000 اۆتوكولىكتەردى ساتىپ الۋعا ىنتا ءبىلدىردى. سونىمەن بىرگە، كەلىسسوزدەر قورىتىندىسىندا ەنەرگەتيكالىق جانە مۇناي- گاز، كوممۋنيكاتسيالىق جابدىقتاردى، ازىق-تۇلىك ونىمدەرىن جانە باسقالاردى جەتكىزۋ كەلىسىمدەرىنە قول جەتكىزىلدى.
قورىتا ايتقاندا، يران استاناسى - تەگەراندا وتكەن ەكى ەلدىڭ ىسكەر توپتارى اراسىنداعى كەزدەسۋلەر ناتيجەلى دە جەمىستى اياقتالدى.
