بيلىك كولىگىن تاستاپ، ۆەلوسيپەدكە وتىرعاندارعا اقشا بەرۋگە ءازىر
ميلان قالاسىنىڭ باسشىلىعى وسىلايشا اۋانىڭ لاستانۋىمەن كۇرەسۋدە. ءتىپتى ۆەلوسيپەدپەن جۇرگەن ءار شاقىرىمعا 25 تسەنتتەن باعا دا بەكىتىپ قويعان. وسىلايشا جەرگىلىكتى تۇرعىندار ءۇشىن ورتاشا ەسەپپەن العاندا ايىنا 50 ەۋرو كىرىس تابۋعا مۇمكىندىك بار. بۇل باستامانى يتاليانىڭ تۋرين، ريميني جانە باري سىندى قالالارى دا قولداپ وتىر.
تۇرعىن: - مەن جۇمىسقا ۆەلوسيپەدپەن بارۋعا دايىنمىن. ءبىراق ريمدىقتار ءۇشىن بۇل امال اسەر ەتپەيدى دەپ ويلايمىن. ويتكەنى قازىر ادامدار ەرىنشەك.
تۇرعىن: - مەن كولىكتەن باس تارتۋعا دايىنمىن، ارينە. مەن جۇمىسقا ۆەلوسيپەدپەن ءجيى قاتىنايمىن. ءتىپتى دەمالىس كۇندەرى دە كولىكپەن شىققىم كەلمەيدى. سەبەبى قوياتىن جەر جوق. ودان قالدى ايىپپۇلدار مەن وزگە دە كەدەرگىلەر جەتەرلىك. جەرگىلىكتى بيلىك قوسىمشا تابىستىڭ كوزى رەتىندە حالىقتى ۆەلوسيپەدكە وتىرۋعا شاقىرۋدا.
جاڭا جۇيە بويىنشا قالا اكىمشىلىگى مەن جۇمىس بەرۋشى ءوزارا كەلىسىپ، كەز كەلگەن قىزمەتكەردى ارنايى باعدارلاماعا قوسادى. سول ارقىلى ۆەلوسيپەدپەن جۇرگەن قاشىقتىق ەسەپتەلىنىپ، ءتيىستى اقشا تولەنەدى. پاولو بەللينو ريم جولدارىن ونداعان جىل بويى ۆەلوسيپەدپەن شارلاعان.
ول بۇل قادام قالاداعى قاپتاعان كولىكتەردەن قۇتىلۋدىڭ بىردەن-ءبىر امالى دەپ وتىر.
پاولو بەللينو، Ciclonauti قاۋىمداستىعىنىڭ ءتوراعاسى:
- يتالياداعى شەكسىز كەپتەلىستەر مەن مىڭداعان كولىكتەن قۇتىلۋ - وتە ماڭىزدى ماسەلەلەردىڭ ءبىرى. ءبىز بۇل باستامانى ارينە قولدايمىز. بۇلاي جالعاسا بەرۋگە بولمايدى. كولىك سانى بويىنشا يتاليا ەۋروپادا كوش باسىندا. ماسەلەن ريمدا 25 ادامنىڭ بىرەۋى عانا ۆەلوسيپەدپەن جۇرەدى. سونداي-اق ريم - ميلاننىڭ يگى باستاماسىن قۇپتاماعان بىردەن ءبىر قالا.
www.24.kz
