03:09, 13 - اقپان 2016 | GMT +5
قازاق ويىنشىسى ەۋروپا چەمپيوناتىنىڭ سۇرمەرگەنى اتانۋى مۇمكىن
استانا. قازاقپارات - فۋتزالدان قازاقستان قۇراماسىنىڭ شابۋىلشىسى سەرىك جامانقۇلوۆ ەۋروپا چەمپيوناتىنىڭ ۇزدىك سۇرمەرگەنى اتانۋى مۇمكىن دەپ حابارلايدى 24- ارنا.
سەربيادا ءوتىپ جاتقان قۇرلىقتىق باسەكەدە وتانداسىمىز قارسىلاس قاقپاسىن بەس رەت ءدال كوزدەگەن. سوڭعى گولىن ول كەشە يسپانياعا سوققان بولاتىن. ازىرگە سۇرمەرگەندەر كوشىن پورتۋگاليالىق شەبەر ريكاردينيۋ باستاپ تۇر. ونىڭ ەنشىسىندە 6 گول.
ەكىنشى جانە ءۇشىنشى ورىندا يسپاندىق الەكس پەن سەربيالىق شابۋىلشى ملادەن كوتسيچ بار. ولار دا جامانقۇلوۆپەن بىردەي قاقپاعا 5 گولدان سالعان. الايدا ناتيجەلى پاس شىعارعانى ءۇشىن قارسىلاستار ازىرگە ءبىزدىڭ وتانداسىمىزدان الدا تۇر.
ەرتەڭ قازاقستان قۇراماسى تۋرنير قوجايىندارى سەربيامەن ەۋروپا چەمپيوناتىنىڭ قولا مەدالىن ساراپقا سالادى. بۇل ماتچتا دا سەرىك جامانقۇلوۆ كوزگە تۇسسە، «التىن بۋتسى» سىيلىعىن الىپ قالۋى دا عاجاپ ەمەس.
