ە. نۇرمۇحامبەتوۆتىڭ «جاڭعاق تال» فيلمى فرانسياداعى حالىقارالىق كينوفەستيۆالدە جۇلدەگە يە بولدى
رەجيسسەر ەرلان نۇرمۇحامبەتوۆتىڭ كينو كارتيناسى حالىقارالىق قازىلاردىڭ ارناۋلى جۇلدەسىنە جانە كينو سىنشىلارىنىڭ ارناۋلى جۇلدەسىنە يە بولدى.
بۇل تۋرالى «قازاق فيلم» ا ق باسپا ءسوز قىزمەتىنەن حابارلاندى.
ىرىكتەۋ كوميسسياسى كونكۋرستىق كورسەتىلىم ءۇشىن «جاڭعاق تال» فيلمىن ۇزدىك ازيالىق كينو تۋىندىلار اراسىنان تاڭداپ العان بولاتىن. فيلمنىڭ مازمۇنىنا كەلسەك، وندا قاراپايىم وتباسىنداعى قارىم-قاتىناستار سۋرەتتەلەدى.
فەستيۆال اياسىندا فرانسۋز كورەرمەندەرىنە ۇسىنىلعان فيلمنىڭ كورسەتىلىمىنە رەجيسسەر ەرلان نۇرمۇحامبەتوۆتىڭ ءوزى دە قاتىستى. ال كونكۋرسقا قازاقستاندىق تۋىندىعا باسەكە رەتىندە قىتاي، جاپونيا، وڭتۇستىك كورەيا، يران، فيليپپين جانە تۇركيا ەلدەرىنىڭ 8 كينو كارتيناسى ۇسىنىلعان بولاتىن. سولاردىڭ اراسىندا «جاڭعاق تال» فيلمى تالعامى بيىك كورەرمەندەردىڭ كوڭىلىنەن شىعىپ، كينو سىنشىلار مەن ماماندار اراسىندا جوعارى باعاعا يە بولدى. ايتا كەتەرلىگى، فەستيۆال اياسىندا باعدارلاما بويىنشا بارلىعى 90 نان استام فيلم كورسەتىلگەن بولاتىن.
نەگىزگى كونكۋرستا فيلمدەرگە وڭتۇستىك كورەيالىق رەجيسسەر يم سانگ-سۋ ءتوراعالىق ەتەتىن قازىلار القاسى باعا بەردى. قازىلار قۇرامىندا رەجيسسەر نان تريۆەني احناس (سينگاپۋر)، پروديۋسەر جانە اكتريسا مانيا اكباري (تەگەران)، رەجيسسەر ەۋتانا مۋكداسانيت (تايلاند) سەكىلدى تانىمال تۇلعالار بولدى. ۆەزۋلدەگى كينو فەستيۆال فرانسياداعى عانا ەمەس ەۋروپاداعى ءبىرتالاي ۋاقىت بويى وتكىزىلىپ كەلە جاتقان اۋقىمدى ازيالىق كينو فورۋمى بولىپ تابىلادى.
ەسكە سالايىق، قازاقستاندىق رەجيسسەر ەرلان نۇرمۇحامبەتوۆتىڭ «جاڭعاق تال» فيلمى بۇعان دەيىن كورەياداعى پۋسان فەستيۆالىندە الەمدىك پرەمەراسىن وتكىزىپ، وندا New Currents «جاڭا اعىم» سەكسياسى اياسىندا جۇلدەگە يە بولعان ەدى.
اۆتور: قانات مامەتقازى ۇلى
