شەشەنستان پرەزيدەنتىنە كومەكشى بولىپ جۇرگەن قازاق جىگىتى
ول شەشەنستان باسشىسىنىڭ تاپسىرماسىمەن رەسپۋبليكالىق «جاس قادىروۆشىلار» بالالار- جاسوسپىرىمدەر قوزعالىسىنىڭ جۇمىسىن قالىپتاستىرىپ جاتىر. ول ءوزىنىڭ تىكەلەي باسشىسىن «اعا» دەپ اتاپ، قادىروۆتى ساياسي ءپىرى سانايتىنىن ايتتى دەپ حابارلايدى «اق جايىق» باسىلىمى.
«جاس ۇلانعا» باسقالار كوڭىل اۋداردى
بۋحالتەرلىك ماماندىقتى مەڭگەرگەن، قازىر شەشەن رەسپۋبليكاسىنىڭ مەملەكەتتىك قايراتكەرى، 25 جاستاعى اقتوبەنىڭ تۋماسى شەشەن ۇكىمەتى مۇشەلەرىمەن قويان- قولتىق جۇمىس جاسايدى، ەلدىڭ مەكتەپتە ءبىلىم بەرۋ جۇيەسى تۇگەلىمەن ونىڭ شتاتىنا كىرەدى، ول سول ەلدە جاسوسپىرىمدەر قوزعالىسىنىڭ جەتەكشىسى رەتىندە تانىلىپ تا ۇلگەردى - ايان شەشەن رەسپۋبليكاسىنا سىڭىرگەن ەڭبەگى ءۇشىن مەدالىمەن ماراپاتتالدى.
باسىلىم ءتىلشىسى ونىمەن اتىراۋداعى تۋىستارىنا كەلگەن ساپارىندا اڭگىمەلەستى.
«مەن بالالارمەن قالاي جۇمىس جاساۋ كەرەكتىگىن بىلەمىن، كەز كەلگەنىن كەرەك باعىتقا تۇسىرە الامىن، مەن قازاقستاندا وسىنداي جۇمىسپەن اينالىستىم، - دەيدى ايان. - 16 جاسىمنان باستاپ «نۇر وتان» پارتياسى «جاس وتان» جاستار قاناتىنىڭ ەرىكتىلەر باعدارلاماسىندا جۇمىس جاسادىم. «جاستار پرەزيدەنتپەن بىرگە» پرەزيدەنتتىك باعدارلاماسىنا قاتىستىم. بۇل ەلباسىنىڭ كومەكشىلەرى دەپ ايتۋعا بولاتىن جاس تالانتتى قىز- جىگىتتەر جۇمىس جاسايتىن باعدارلاما ەدى. ءبىز جاستار قوزعالىسىنىڭ جوبالارىن، باعدارلامالارىن جازدىق. مەن وسى ۇيىمدا مەكتەپ باعىتىنداعى جۇمىستارمەن اينالىستىم.
2011 -جىلى ءبىز پرەزيدەنتكە (ن. نازاربايەۆ) قازاقستاندا «جاس ۇلان» بالالار جانە جاسوسپىرىمدەر ۇيىمىن قۇرۋ كەرەكتىگىن جەتكىزدىك. 2013 -جىلى ول ءبىزدى قولدادى. مەن وسى شارانىڭ ۇيىمداستىرۋشىسى بولدىم. ءبىز 1,5 ميلليون دوللار بولۋگە قول جەتكىزدىك، مۇنىڭ قانشالىقتى قيىن بولعانىن بىلمەيسىزدەر، ماعان «بۇل ەشكىمگە كەرەك ەمەس، بارلىعى زايا كەتەدى» دەۋشىلەر دە بولدى. الايدا سول كەزدەگى بەلگىلى ساياساتكەرلەر ماعان قولداۋ كورسەتتى، ماعان سەندى، ءبىز ءبىر دە ءبىر تيىن دالاعا كەتپەيدى دەگەن كەلىسىمگە كەلدىك. «جاس ۇلانعا» اقشا بولىنگەن بويدا قارجىلىق تۇرعىدا مۇددەلى ادامدار پايدا بولدى.
- سوسىن ءسىزدى شەتتەتۋ باستالدى ما؟
- ءيا، وسى ساتتە كوپتەگەن ادامداردى، سونىڭ ىشىندە جوبانىڭ اۆتورى مەنى دە شەتتەتۋ باستالدى. مەن جەتەكشى بولۋىم كەرەك ەدى، الايدا مەنى ورىنباسار ەتىپ سايلاپ، سىزبالارعا قاتىسىپ، كەڭسە قالامىن ساتىپ الۋعا 100 مىڭ دوللار بولگەن سمەتانى بەكىتۋىمدى سۇرادى. مەن بۇلاي جاساۋعا بولمايتىنىن، بۇل اقشالاردى بالالاردى دامىتۋعا جۇمساپ، بوسقا جويماۋ كەرەكتىگىن ايتتىم. مەن قول قويعان جوقپىن، وسىدان كەيىن بىرنەشە بەلگىلى ادام قاتىسقان ۇلكەن جانجال بولىپ، ءوزىم كەتىپ قالدىم. ويتكەنى، بۇل اقشالار ءۇشىن زاڭ الدىندا دا، ادامگەرشىلىك تۇرعىسىنان دا جاۋاپ بەرۋگە تۋرا كەلەتىنىن ءبىلدىم. كەيىن بىلگەنىمدەي، كەيىنگى جىلدارى قارجى پوليتسياسى قىلمىستىق ءىس كوتەرىپ، تەرگەۋ جۇرگىزىلىپتى.
...
«ۋاحابيلەر - مۇسىلمان ەمەس»
- ءسىز تاربيە تۋرالى تراكتاتتىڭ اۆتورىسىز، سول كەزدە نەشەدە بولدىڭىز: 22-23 جاستا ما؟
- مەن 13 جاسىمدا عىلىمي ىزدەنىسىمدى باستاپ، سەمەي پوليگونىنىڭ زارداپتارىنا ارنالعان «ادامدار تاعدىرىنداعى يادرولىق ىزدەر» تاقىرىبىندا العاشقى جوبامدى قورعادىم. وسى جوبامەن «ەۋرازيا جۇلدىزىندا» (بالالار مەن جاستاردىڭ حالىقارالىق بايقاۋى - ز. ب) جەڭىسكە جەتتىم. مەن بالانى ۇيدە قالاي تاربيەلەۋ كەرەكتىگى تۋرالى جازبايمىن، بۇل - اتا- انانىڭ شارۋاسى. مەن پاتريوت، ادامگەرشىلىگى مول، سپورتشى، زياتكەر، شىعارماشىل جاس قازاقستاندىقتى قالاي تاربيەلەۋ كەرەكتىگى تۋرالى جازدىم، ادام دۇنيەگە وسى قاسيەتتەرمەن كەلمەيدى عوي. ەڭ باستىسى، مەملەكەتتىك قولداۋ بولىپ، بەلگىلى ءبىر الاڭدار جاسالۋى كەرەك... وسىنىڭ بارلىعى، دالىرەك ايتساق، جاستارمەن جۇمىس جاساۋ مەحانيزمى، ازاماتتى قالاي تاربيەلەۋ كەرەكتىگى مەنىڭ كىتابىمدا جازىلعان. ءبىر مىسال كەلتىرەيىك. بارلىعىمىزعا بەلگىلى ءبىر ءىس- شارا - «كۇزگى بالدى» الايىق. قازاقستاننىڭ كەز كەلگەن مەكتەبىنە بارىڭىز، 20 جىل بۇرىن سىزدە دە وسىلاي بولعانىن كورەسىز.
- تۇراقتىلىق، داستۇرلەردى ساقتاۋ شىعار.
- قازىرگى بالالار باسقا عوي. 21 - عاسىر، مودەرنيزاتسيا. كۇشتەر دە، اسەر ەتۋ شارالارى دا وزگەشە. جاۋلارىمىز وسىنى پايدالانىپ جاتىر. وسى اتىراۋدا دا، اقتوبەدە دە ءدىني ەكسترەميزم ماسەلەسى بار. ادام ساناسىن جاۋلاۋ ءۇشىن ءتۇرلى بەينەجازبالار، ماتىندەر، جوبالار، يدەيالار تاراتادى. مەملەكەتتە بۇل ءۇشىن كىم جاۋاپ بەرەدى؟ ۇلكەن عالامدىق وقيعالار بولىپ جاتىر، وسىلارمەن بىرگە بالالار دا كۇن سايىن وزگەرىپ وتىرادى. مەن وسى بىرنەشە جىلدا ۋاحابيزمنىڭ قانداي زۇلماتتار اكەلەتىنىن كوردىم، مۇنىڭ قانشالىقتى قاۋىپتى ەكەنىن ادامدار ءالى تۇسىنبەي ءجۇر.
- شەشەنستانداعى جاعدايدى ايتاسىز با؟
- شەشەنستاندا ەستىگەن وقيعالارىم تۋرالى ايتام. ءۋاحابيشىل- ەكسترەميستەر - اقىلدان اداسقان ادامدار، ولارعا ادامنىڭ ءومىرى، ماقساتى، جوسپارى تۇككە تۇرمايدى. ولاردى بۇل مۇلدەم قىزىقتىرمايدى. بۇل ادامداردىڭ ساناسىن ۋلايتىن جالعان ميسسيونەرلەر. مىسالى، سەن كەدەيسىڭ بە، باي ادامدار بار، سولاردى ءولتىرىپ، بايلىعىن تارتىپ الۋىڭ كەرەك.
- دەگەنمەن، قۇران ءبىر ەمەس پە، ولار ونى وزدەرىنشە تاپسىرلەي مە؟
- ءيا، بۇل - ۇلكەن كۇنا، اللانىڭ الدىنا بارعاندا وسىنىڭ بارلىعى ءۇشىن جاۋاپ بەرەدى، ويتكەنى، قۇراندا ءبارى انىق جازىلعان، ءار ءسوز ءوز ورنىندا تۇر.
- الايدا ۋاحابيلەر بارلىعىن اللانىڭ اتىمەن جاسايدى عوي.
- ولار وزدەرىن قالاي اتاسا دا، ولار مۇسىلمان ەمەس. مۇسىلماندار ونداي بولمايدى. بۇلار يسلامنىڭ اتىن جامىلۋشىلار. د ا ي ش- ءتى الايىق، مەن بۇلاردى شايتان دەپ ەسەپتەيمىن. الەمنىڭ بار شايتانى ءبىر جەرگە جينالعان.
«باستىسى، قازىر شەشەنستاندا سوعىس جوق»
- شەشەنستاندا ۋاحابيزم ماسەلەسى كۇردەلى مە؟
- جوق، ولاردى تۇبەگەيلى جويدى.
- كۇشپەن بە؟
- ولارمەن ەندى قالاي كۇرەسۋگە بولادى؟ الايدا تەك قانا كۇشپەن ەمەس. ءبىرىنشى كەزەكتە حالىقتى ساۋىقتىردى. ءدىني قايراتكەرلەردى، رەسمي ءدىني ۇستانىمدى دامىتتى، نەنىڭ دۇرىس، نەنىڭ بۇرىستىعىن ءتۇسىندىرۋ ءۇشىن مەشىتتەرگە ادامدار جيناي باستادى. بۇل ۋاقىتتا حالىقتىڭ ءوزى سوعىستان شارشاعان ەدى، قالاي ەكەنىن ءوز كوزدەرىمەن كوردى. حاتتاب، باسايەۆ سياقتى بەلگىسىز جاقتان كەلگەن جانسىزدار ەلدى ءبۇلدىرىپ، ادامداردىڭ اجالىنان ۇلكەن اقشا جاسادى...
تەك بۇل ەلدەردى - قازاقستان مەن شەشەنستاندى سالىستىرۋعا بولمايدى، بۇل حالىقتار ءبىر- بىرىنە مۇلدەم ۇقسامايدى، تاعدىرلارى دا ءار ءتۇرلى. بۇل ۋاقىتقا دەيىن شەشەنستان حالقى ەكى سوعىستى باسىنان وتكىزدى. 2001 -جىلى ەل باسىنا شەشەن رەسپۋبليكاسىنىڭ العاشقى پرەزيدەنتى، رەسەي قاھارمانى احمات قاجى قادىروۆ (رامزاننىڭ اكەسى) كەلدى. ول تەك ساياساتكەر ەمەس، ءدىني قايراتكەر، ءمۇفتي ەدى. فەدەرالدىق كۇشتەر دە تارتىلدى، ول رەسەي پرەزيدەنتى پۋتينمەن جاقسى قارىم- قاتىناستا بولدى، ول ونىڭ جاقىن دوسى ەدى، ولار ءبىر- بىرىنە سەندى.
احمات قاجى قادىروۆ ءتارتىپ ورناتۋعا ءسوز بەردى. راسىمەن دە، بۇگىنگى شەشەنستاندى ۇلگى تۇتۋعا بولادى. قانداي قۇرالداردىڭ قولدانىلعانى ماڭىزدى ەمەس، ەڭ باستىسى، بۇگىن شەشەنستاندا سوعىس جوق، ادامدار تولىققاندى ءومىر ءسۇرىپ جاتىر: تىرشىلىگىن دە جاسايدى، قۇدايعا دا قۇلشىلىعى تولىق، ەركىن ءجۇرىپ- تۇرادى.. . قازىر ونىڭ ۇلى رامزان قادىروۆ وڭىردە بەيبىت ءومىر ورناتتى، بىردە- ءبىر شايتان گروزنىيعا كەلىپ، ءبىر نارسە ىستەي المايدى، قورقادى.
- بىزدە ۋاحابيزم ءدىني قوزعالىس رەتىندە بەلسەندى دامىپ جاتىر جانە ەڭ الدىمەن جاستاردىڭ ساناسىن ۋلاۋدا.
- جاستار ولارعا ەرمەس ءۇشىن اتا- انالار بالالارىنىڭ نەمەن شۇعىلدانىپ جۇرگەندەرىن ءبىلۋى كەرەك، تەلەفوندارىن، ۋاتساپتارىن قاراپ، قاداعالاۋى كەرەك.. .
«كەلەسى كۇنى تاڭدا ماعان تەلەفون سوقتى»
- وقىرمانداردى جالىقتىرىپ جىبەرگەن بولارمىز، ودان دا ءسىز قادىروۆتىڭ كومانداسىنداعى كۇرت كوتەرىلگەن مانسابىڭىز تۋرالى ايتىڭىزشى. لاۋازىمىڭىزعا الەۋمەتتىك جەلى ارقىلى قول جەتكىزگەنىڭىز راس پا؟ رامزان قادىروۆتىڭ پاراقشاسىنا جازىلۋىڭىزعا نە سەبەپ بولدى؟
- مەن ونىڭ ينستاگراممداعى پاراقشاسىنا جازىلدىم. ويتكەنى، مەنى ونىڭ تۇلعاسى قىزىقتىردى جانە مەن بالا كۇنىمنەن شەشەندەردىڭ ورتاسىندا ءوستىم، ولار ماعان ءوز حالقىنىڭ تاريحىن ايتاتىن، بارلىعى دا وتاندارىنا قايتۋدى ارماندايتىن ەدى. بىزدە ادامداردىڭ كوپشىلىگى شەتەلگە كەتىپ، كوپ اقشا تابۋدى ويلايدى، وزىمىزدەن باسقا جەرلەر جۇماقتاي كورىنەدى. ال شەشەندەردە باسقاشا: «اقشا تاۋىپ، ەلىمە ورالىپ، ءۇي سالامىن» دەگەن ماقسات قويادى.
- سىزدەر الەۋمەتتىك جەلىدە الدىمەن «دوس» بولدىڭىزدار ما، الدە ءسىز بىردەن ءوز سۇراقتارىڭىزدى قويدىڭىز با؟
- مەن رامزان احمات ۇلىنا بىردەن «ءسىز شەشەندەردى پاتريوتتىققا قالاي تاربيەلەيسىز؟» دەگەن سۇراق قويدىم. ول تەلەفون ءنومىرىمدى جىبەرۋدى ءوتىندى. مەن جىبەردىم، ول ماعان تەلەفون سوعىپ، جارتى ساعاتتاي ءار ءتۇرلى تاقىرىپتا اڭگىمەلەستىك، ول سۇراعىما جاۋاپ بەرىپ، ءوز ەلى تۋرالى ايتتى. ماعان دا سۇراقتار قويدى، سودان كەيىن «ءبىز نەگە تەلەفونمەن سويلەسىپ وتىرمىز، سەن ماعان قوناققا كەلە الاسىڭ، كەز كەلگەن ۋاقىتتا كۇتەمىن» دەدى. مەن «بارا الامىن» دەدىم، الايدا قازاقتار سياقتى «ءبىر كۇنى كەلەرسىڭ» دەگەن شىعار دەپ ويلادىم... تاڭەرتەڭ ماعان تەلەفون سوعىپ: «ءسىزدى رەسپۋبليكا باسشىسى كۇتىپ وتىر، ءبىر اپتاعا كەلە الاسىز با، ماسكەۋدەن كۇتەمىز»، - دەدى. سول جەردەن مەنى شەشەنستانعا جىبەردى.
كەزدەستىك، سويلەستىك، ءار ءتۇرلى تاقىرىپتاردى تالقىلادىق. ول جاستار ءىسى جونىندەگى مينيستر مەن ءبىلىم ءمينيسترىن وزىنە شاقىرىپ، ولارمەن بىرگە رەسپۋبليكانى ارالاپ، كورگەن- بىلگەندەرىممەن ءبولىسۋدى ءوتىندى. «كەمشىلىكتەردى كوبىرەك قارا، جەتىستىكتەردى ءوزىم دە بىلەمىن»، - دەدى. كەلگەننەن كەيىن تاعى دا سويلەسىپ، يدەيالارمەن بولىستىك، وسى ەلگە العاش كەلگەن ساتتە وعان سىيلاعان كىتابىم تۋرالى پىكىرىن ايتتى. ەلىنە بالالار مەن جاسوسپىرىمدەر ۇيىمى كەرەك ەكەندىگى تۋرالى ويلانىپ جۇرگەنىن جەتكىزدى.
- رامزان سىزگە وسى ۇيىمدى ۇيىمداستىرۋدى ۇسىندى ما؟
- ءيا، مەن سول ەلدە قالىپ، وسى جوبانىڭ جەتەكشىسى بولدىم. بۇگىندە بۇل ۇلكەن قوزعالىسقا اينالدى. رەسپۋبليكالىق شتابتىڭ وزىندە ابدەن ىرىكتەلگەن 300 ۇزدىك وقۋشى جۇمىس جاسايدى. كۇن سايىن جاڭا يدەيالار پايدا بولىپ، جۇزدەگەن ءىس- شارالار، اكسيالار وتكىزىلەدى... ينستاگراممدى كۇندە جاڭارتىپ وتىرامىز. رەسپۋبليكا باسشىسى تەلەديداردان سويلەپ، يدەيالارىن ايتادى، ال كەلەسى كۇنى بارلىق مەكتەپتەردە قولداۋ شارالارى وتەدى. بىرنەشە ايدىڭ ىشىندە تازالىق كۇندەرى، سەنبىلىكتەر، ءتۇرلى ساياحاتتار، زياتكەرلىك جانە سپورتتىق وليمپيادالار سياقتى 600-دەن اسا ءىس- شارا ءوتتى.. . ۇيىمنىڭ قاتارىندا 50000-نان اسا جاسوسپىرىم بار. بولاشاقتا مەن وسى جەردە بولماسام دا، وسى بالالاردىڭ عىلىمي قىزمەتكەرلەر، پرەزيدەنت اپپاراتىنىڭ بىلىكتى ماماندارى، ۇزدىك بيزنەسمەندەر بولعانىن قالايمىن.. .
«شەشەنستاندا وتباسى ابىرويى ءداستۇرىن قاتتى ۇستايدى»
- سىزگە جالاقىنى شەشەنستان ۇكىمەتى، ءبىلىم بەرۋ مينيسترلىگى تولەي مە، الدە قادىروۆتىڭ ءوزى بەرە مە؟
- ماعان اكەلىپ بەرەدى.
- كوپ پە؟
- ءوزىم ريزامىن. كوپ اقشا تابۋ ماقساتىم ەمەس، بۇل - تەك جەتىستىككە جەتۋ قۇرالى. جەتكىلىكتى. مەن ءوزىم جاقسى كورەتىن، قولىمنان كەلەتىن ىسپەن اينالىسىپ جاتىرمىن.
- ءسىز قايدا تۇراسىز؟
- پاتەردە.
- سىزگە جالداپ بەرىپ وتىر ما؟
- جوق، ونى ماعان ول (رامزان قادىروۆ) سىيعا تارتتى. قالانىڭ ورتاسىندا، ءزاۋلىم ۇيدە، ۇلكەن - 100 شارشى مەتردىڭ ۇستىندە.
- كولىك بار ما؟
- ءيا، قىزمەتتىك.
- جەكە كولىك سىيلاعان جوق پا؟
- نەگە كەرەك، قىزمەتتىك كولىگىم بار. مەن قىمبات سىيلىق قابىلداي المايمىن، تاربيەم سونداي.
- بۇگىندە شەشەنستان قالاي، گروزنىي قالپىنا كەلتىرىلدى مە، قاۋىپسىز بە؟
- ءبارى قالپىنا كەلتىرىلدى: ءار اۋىلدا، ءار قالادا، ءتىپتى، تاۋلى اۋداندارداعى ۇيلەرگە جولدار، جارىق، سۋ، گاز قايتا تارتىلدى. تولىقتاي قاۋىپسىز، ءسىزدى قارسى الادى، قازاقتارعا ىقىلاستارى ەرەكشە - ءار شەشەن وتباسىنىڭ قازاقستانمەن بايلانىستى تاريحى بار. وتە جىلى، جاقىن قارىم- قاتىناس.
- ەكونوميكا قالاي دامىپ جاتىر؟ شەشەنستانعا ماسكەۋدەن ۇلكەن قارجى قۇيىلىپ جاتىر دەگەن اڭگىمەلەر بار.
- بۇل جالعان، اڭىز اڭگىمە، بەلگىلى ءبىر فەدەرالدىق كومەك بار، الايدا باسقا وڭىرلەردەن از دا ەمەس، كوپ تە ەمەس، بىردەي بولىنەدى. بۇل ەلدىڭ ءوز ءوندىرىسى، بيزنەسى بار، ورتا جانە شاعىن بيزنەسكە، اۋىل شارۋاشىلىعىنا، مال شارۋاشىلىعىنا ۇلكەن كوڭىل بولىنەدى، ءسۇت جانە قالبىر زاۋىتتارى بار.. . شيكىزات ءوندىرۋ بار.
- شەشەنستاندا زاڭنامالار ءىشىنارا قولدانىلاتىن وتە باي ادامداردىڭ ەسىرگەن بالالارى بار ما؟
- جوق، بۇل ەلدە وتە باي دا، وتە كەدەي دە ادامدار بار، الايدا وتباسىلىق ابىروي ءداستۇرى قاتتى قالىپتاسقان. مىسالى، ەگەر بالا ءبىر نارسە بۇلدىرسە، بۇل تۋرالى الەۋمەتتىك جەلىدەن باسقالار، ءبىرىنشى كەزەكتە پرەزيدەنت ەستىسە، بۇكىل وتباسى ماسقارا بولادى، ال بۇل - ەڭ سوراقى نارسە. سونداي- اق، اراق ىشىلمەيدى، زاڭ بويىنشا الكوگولدىك ىشىمدىكتەردى تاڭعى 8-دەن 10-عا دەيىن ساتۋعا بولادى، الايدا ەلگە اراق اكەلىنبەيدى. نەگە ەكەنىن بىلمەدىم، سۇرانىس جوق شىعار. قورقور دا جوق.
- عالامتوردا قىز الىپ قاشقان نەمەسە رەسەيلىك زاڭنامالارعا قايشى كەلەتىن وتە جاس قىزعا ۇيلەنۋ تويلارىنا بايلانىستى داۋ- جانجالدار ءجيى شىعىپ جاتادى.
- ءجيى ەمەس قوي. وتكەن جىلى ءبىر رەت بولدى. الىپ قاشۋ جوق - ميلليون رۋبل ايىپپۇل تولەيدى. ەگەر قالىڭدىق ەركىنەن تىس الىپ كەتتى دەپ شاعىمدانسا.. .
- ال ولار شاعىمدانا ما؟
- نەگە شاعىمدانباسقا، بۇل دەموكراتيالىق قوعام. سىزدەر شەشەندەردىڭ سالت- داستۇرلەرىن تۇسىنۋلەرىڭىز كەرەك، بەينەجازبادا قىز جەرگە قاراپ تۇر، بۇل ەلدە ايەل ادامعا قۋانىشىن كورسەتۋگە بولمايدى، ۇيات بولادى. قالىڭدىق ءوز تويىندا سەلكىلدەپ بيلەپ جۇرەتىن ءبىزدىڭ تويلارداي دەپ ويلايسىز با؟ مەن مۇندايعا قاراي المايمىن، قالىڭدىق جىگىتتەن بەتەر قۋانىپ ءجۇر!
- شەشەنستاندا كوپ ايەل الۋعا رۇقسات بەرىلگەن بە؟
- تاعى ايتامىن، بۇل ءار ادامنىڭ جەكە ءىسى. اركىم ءار ءتۇرلى. جاسىرىن كوڭىلدەس ايەلگە بارعان دۇرىس پا؟! ال شەشەنستاندا، مىسالى، بالالار ءۇيى ەشقاشان بولعان ەمەس. مەن ءوزىمنىڭ جەكە پىكىرىمدى ايتسام، اللا تاعالا بىزگە 4 رەت ۇيلەنۋگە رۇقسات بەردى. ۇيلەنگەن جاقسى عوي، الايدا بارلىق ايەلىڭە تەڭ قاراۋىڭ كەرەك. ءجاي عانا ۇيلەنە سالساڭ، قۇدايدىڭ جازاسى دايىن عوي.
- رامزان قادىروۆتىڭ نەشە ايەلى بار؟
- ونىڭ مەدني قادىروۆا دەگەن ايەلى بار، 9 بالانىڭ اناسى، قالعان سۇراقتارعا مەن جاۋاپ بەرە المايمىن.
- بەلگىلى جۋرناليست تينا كاندەلاكي دە ونىڭ كەڭەسشىسى جانە مەدياعا قاتىستى كەڭەستەر بەرەدى دەگەن ءسوز راس پا؟
- جوق، ولار تەك دوس ادامدار. الەۋمەتتىك جەلىلەردەگى بارلىق اككاۋنتتاردى ءوزى جۇرگىزەدى، ەشكىم ول ءۇشىن ەشتەڭە جازبايدى.
- ۇلكەن بيزنەسمەن، قورعانىس ءمينيسترى يمانعالي تاسماعامبەتوۆتىڭ كۇيەۋ بالاسى كەڭەس راقىشيەۆتىڭ رامزان قادىروۆپەن جاقسى تانىس ەكەنى بەلگىلى. كەيبىر ادامدار ءسىزدى سونىڭ اعايىنى دەپ جاتادى.
- مەن ونى تانيمىن جانە ءبىزدى رامزان احمات ۇلى تانىستىردى. كەڭەس راقىشيەۆ كوپتەن بەرى قادىروۆتىڭ دوسى جانە باۋىرى. ال، رامزان احمات ۇلىنىڭ باۋىرلارى - مەنىڭ باۋىرلارىم. قالعاندارىنىڭ بارلىعى - جالعان اقپارات.
«رامزان وتە تاقۋا ادام»
- قىزمەتىڭىزگە نە كىرەدى، كۇنىڭىزدى قالاي وتكىزەسىز؟
- جۇرتتىڭ بارىمەن بىردەي، ۇيقىدان تۇرامىن، مەكتەپتەردى ارالايمىن، قارايمىن.
- كىمگە باعىناسىز، تىكەلەي جۇمىس بەرۋشىڭىز شەشەن رەسپۋبليكاسىنىڭ باسشىسى ما؟ ەگەر كوڭىلىڭىزگە ءبىر نارسە ۇناماسا، تىكەلەي سوعان باراسىز با؟
- نەگە، مەنىڭ اكىمشىلىك رەسۋرستارىم بار عوي. مەن جەرگىلىكتى ورىندارعا تاپسىرما بەرەمىن. رامزان احمەت ۇلىمەن قارىم- قاتىناسىمىز «جۇمىس بەرۋشى- قىزمەتكەر» رەتىندە ەمەس. مەن ونىڭ كىشى ءىنىسىمىن، مەن وعان كوپ قارىزدارمىن، سوندىقتان ماعان سەنىپ تاپسىرعان ىستەرىن تىڭعىلىقتى ورىنداۋعا مىندەتتىمىن. ونىڭ ءوزىنىڭ كۇن ءتارتىبى بار، قولى كوپ بوساي بەرمەيدى، الايدا شۇعىل ماسەلەلەر بولسا، كەز كەلگەن ۋاقىتتا رەزيدەنسياسىنا، ۇكىمەت ۇيىنە، ۇيىنە بارا بەرۋىمە بولادى... ءبىز كەمىندە اپتاسىنا ءبىر رەت كەزدەسەمىز، الايدا بۇل كوبىنە جەكە اڭگىمەلەر.
- قادىروۆ ۇيىمداستىرۋشى رەتىندە قانداي ادام؟
- ءدىندار، ناقتى ىستەردى سۇيەدى، ماسەلەنى كەيىنگە قالدىرماي، سول بويدا شەشەدى.
- قادىروۆ سىن- پىكىرلەرگە قالاي قارايدى؟
- قالىپتى.
- ياعني، ەگەر ءبىر نارسە ايتقىڭىز كەلسە، بەتىنە تىكەلەي ايتا الاسىز با؟
- ول مەنىڭ اعام عوي، ول مەنەن ۇلكەن. مەن ونى ۇلگى تۇتامىن، مەن وعان ادال قىزمەت ەتەمىن. ول مەنىڭ العاشقى ۇستازىم، مەن سويلەۋ، ءوزىمدى ۇستاۋ مانەرىنە دەيىن سودان ۇيرەندىم. ول مەنى تابىستى بولۋعا، ءىستى قالاي جۇرگىزۋ كەرەكتىگىن، ادامدارمەن قالاي سويلەسۋ كەرەكتىگىن، باسقا ۇلت وكىلدەرىمەن قارىم- قاتىناس جاساۋدى ۇيرەتتى.
- اتا- اناڭىز ءسىزدى ودان قىزعانباي ما؟
- جوق، انام، ءتىپتى، «مەن سەنى رامزان ءۇشىن تۋعاندايمىن» دەگەن، - دەپ جىميدى ايان ءبىرىنشى رەت. ول ءوز بولاشاعىن جاراتقانعا تاپسىرىپتى: «ءبارى ءبىر اللانىڭ قولىندا!».
