بەنزيننەن گازعا اۋىسۋدىڭ كولىك قوزعالتقىشىنا زيانى بار ما؟

استانا. قازاقپارات -  داعدارىس قىستى ما الدە جانارمايدىڭ قىمباتتىعى ما سوڭعى كەزدەرى  ەلىمىزدە كولىگىنە گاز باللونى قۇرىلعىسىن قوندىرۋشىلار كۇرت كوبەيگەن.

 ءبىراق، اۋىستىرۋدىڭ دا قۇنى ارزان ەمەس. ال، جۇرگىزۋشىلەر شىعىننىڭ اقتالاتىنىنا سەنىمدى. سوندا گاز ورناتۋدىڭ قۇنى قانشا؟ بەنزيننەن گازعا اۋىسۋ - كولىكتىڭ قوزعالتقىشىنا زيانى بار ما؟    

سەرىك بولات ۇلى الماتىداعى گاز قوندىرۋ ورتالىقتارىنىڭ بىرىندە مەحانيك. ايتۋىنشا، كۇن سايىن كولىگىنە اۆتوگاز ورناتقىسى كەلەتىندەر كەزەككە تۇرادى. وتكەن جىلعا قاراعاندا تاپسىرىس بەرۋشىلەر ەكى ەسەگە ارتقان. گاز باللوندارىنىڭ قۇرىلعىلارى يتاليا، پولشا، تۇركيادان اكەلىنەدى. مەحانيك بەنزيندى گازعا اۋىستىرۋ اقشا ۇنەمدەۋدىڭ تاپتىرماس جولى دەيدى.

سەرىك بولات ۇلى، مەحانيك:

- ەگەر مىسالعا، تاكسي سياقتى رەجيمدە جۇرەتىن بولساڭىز، ءسىز جارتى جىلدا تۇگەلدەي قۇرىلعى باعاسىن اقتاپ الاسىز. سودان كەيىنگى ۋاقىتتا بەنزين مەن گازدىڭ ايىرماشىلىعىن ءوز قالتاڭىزعا سالىپ وتىراسىز.

اۆتوگاز ورناتۋ باعاسى كولىكتەردىڭ سيليندر سانىنا بايلانىستى. 4 سيليندرلى كولىكتەر ءۇشىن 200 مىڭ تەڭگە، ال 6 سيليندردى اۆتوكولىككە 270 مىڭ شىعىن شىعادى. ال ءدال وسىنداي كولەمى ۇلكەن، 8 سيليندرلى كولىكتەرگە گاز قوندىرۋ قۇنى 320 مىڭنان باستالادى.

ال كەيبىر جۇرگىزۋشىلەر جانارمايمەن جۇرەتىن كولىكتەرگە گاز ورناتىلسا، موتورىنا زيان كەلەدى دەپ بىلەدى. بۇل ماسەلە دە شەشىلىپتى. قازىرگى جاڭا تەحنيكالىق قۇرالدار تولىقتاي كومپيۋتەرمەن جۇمىس ىستەيدى ەكەن. دەگەنمەن ەندى بىرەۋلەر گاز زاۋىتتا ورناتىلماسا، قولدان قوندىرعانعا كۇدىكپەن قارايدى.

سونداي- اق، كولىك سالاسىنىڭ مامانى گاز باللونىن قولدان ورناتۋدىڭ تيىمدىلىگى جوق دەيدى. ءتىپتى ءوز تاجىريبەسىندە بايقاپ كورىپ، كەتكەن شىعىندى تەك 5-10 جىل كولەمىندە عانا اقتاۋعا بولاتىنىن ايتادى.

ەدۋارد ەدوكوۆ،  تاۋەلسىز اۆتوكولىك وداعىنىڭ ءتوراعاسى:

- بەنزينمەن جۇرەتىن اۆتوكولىك جۇيەسىنە گاز قۇرىلعىسىن ەنگىزۋ ەرەجەگە دە قايشى. زاڭ وعان جول بەرمەيدى. مىسالى، جاپوندىق كولىك وندىرۋشىلەرگە، جەرگىلىكتى وكىلدىكتەرگە گاز ورناتۋ تۋرالى ءوتىنىش جىبەرسەڭىز، رۇقسات ەتپەيدى. ويتكەنى، قاۋىپسىزدىكتى دە ەسەپكە الۋ كەرەك قوي.

مۇناي سالاسىنىڭ ساراپشىلارى قازاقستاندىق اۆتوكولىكتەر 2017 - جىلى جاپپاي گازبەن جۇرۋگە كوشەدى دەپ بولجاعان بولاتىن. بۇل ۇنەم مەن ەكولوگياعا وڭ اسەر بەرەتىنى انىق. الايدا ازىرگە ەل اۋماعىنداعى گاز قۇيدىرۋ بەكەتتەرى مۇلدەم ازدىق ەتەدى. ولاردىڭ جالپى سانى 2015 - جىلعى ەسەپ بويىنشا 500-دەن ەندى عانا اسىپتى.