قازاقستاندا بالالار قۇقىعى جونىندەگى ۋاكىل ينستيتۋتى قۇرىلدى

استانا. قازاقپارات - مەملەكەت باسشىسى نۇرسۇلتان نازاربايەۆتىڭ جارلىعىمەن قازاقستاندا ءوز قىزمەتىن قوعامدىق نەگىزدە جۇزەگە اسىراتىن بالالار قۇقىقتارى بويىنشا ۋاكىل ينستيتۋتى قۇرىلدى،

 دەپ حابارلاندى اقوردانىڭ باسپا ءسوز قىزمەتىنىڭ Facebook-تەگى رەسمي پاراقشاسىندا.

 ۋاكىلدىڭ نەگىزگى ماقساتتارى - مەملەكەتتىك جانە قوعامدىق ينستيتۋتتارمەن ءوزارا ءىس- قيمىل ارقىلى بالالاردىڭ قۇقىقتارى كەپىلدىگى مەن زاڭدى مۇددەلەرىن قامتاماسىز ەتۋ، سونداي- اق ولاردىڭ بۇزىلعان قۇقىقتارى مەن بوستاندىقتارىن قالپىنا كەلتىرۋ.

قازاقستان رەسپۋبليكاسى پرەزيدەنتىنىڭ جارلىعى

قازاقستان رەسپۋبليكاسىندا بالا قۇقىقتارى جونىندەگى ۋاكىل ينستيتۋتىن قۇرۋ تۋرالى

قازاقستان رەسپۋبليكاسىندا بالا قۇقىقتارىن قورعاۋدىڭ ۇلتتىق جۇيەسىن جەتىلدىرۋ ماقساتىندا، قاتىسۋشى مەملەكەتتىڭ بىرىككەن ۇلتتار ۇيىمىنىڭ بالا قۇقىقتارى تۋرالى كونۆەنسياسىنا بەيىلدىلىگىن راستاي وتىرىپ، الەمدىك قوعامداستىقتىڭ بالالار ءومىرى ءۇشىن قولايلى جانە مەيىرىمدى ورتانى قالىپتاستىرۋداعى كۇش- جىگەرىن قولداي وتىرىپ قاۋلى ەتەمىن:

 1. قازاقستان رەسپۋبليكاسىندا ءوز قىزمەتىن قوعامدىق نەگىزدە جۇزەگە اسىراتىن بالا قۇقىقتارى جونىندەگى ۋاكىل ينستيتۋتى (بۇدان ءارى - ۋاكىل) قۇرىلسىن.

 2. ۋاكىلدىڭ نەگىزگى ماقساتتارى بالالاردىڭ قۇقىقتارى مەن زاڭدى مۇددەلەرىنىڭ كەپىلدىكتەرىن قامتاماسىز ەتۋ، سونداي- اق مەملەكەتتىك جانە قوعامدىق ينستيتۋتتارمەن ءوزارا ءىس- قيمىلدا بالالاردىڭ بۇزىلعان قۇقىقتارى مەن بوستاندىقتارىن قالپىنا كەلتىرۋ بولىپ تابىلادى دەپ بەلگىلەنسىن.

 3. قازاقستان رەسپۋبليكاسىنىڭ ۇكىمەتى وسى جارلىقتان تۋىندايتىن شارالاردى قابىلداسىن.

 4. وسى جارلىقتىڭ ورىندالۋىن باقىلاۋ قازاقستان رەسپۋبليكاسى پرەزيدەنتىنىڭ اكىمشىلىگىنە جۇكتەلسىن.

 5. وسى جارلىق قول قويىلعان كۇنىنەن باستاپ قولدانىسقا ەنگىزىلەدى.

قازاقستان رەسپۋبليكاسىنىڭ

 پرەزيدەنتى ن. نازاربايەۆ

 استانا، اقوردا، 2016 - جىلعى 10- اقپان

 № 192