14:14, 12 - اقپان 2016 | GMT +5
رەسەيدىڭ جولاۋشىلار ۇشاعى دومينيكان ەلىنىڭ ۇستىندە ورتەندى
استانا. قازاقپارات - رەسەيدىڭ «بوينگ» ۇشاعى دومينيكان ەلىنىڭ ۇستىندە ورتەندى دەپ حابارلايدى 24- ارنا.
توتەنشە وقيعا استانا ۋاقىتى بويىنشا تاڭعى ساعات 06:00 شاماسىندا تىركەلدى. پۋنتا-كانا قالاسىنان تۋريستەردى ماسكەۋگە الىپ ۇشقان «بوينگ» بەس شاقىرىم بيىكتىككە كوتەرىلگەن كەزدە قوزعالتقىشتارىنىڭ ءبىرى كەنەتتەن ورتەنە جونەلگەن.
НТВ ارناسىنىڭ حابارلاۋىنشا، «ورەنبۋرگ اۋە جەلىلەرىنە» تيەسىلى لاينەردىڭ پيلوتى ۋاقىتىلى دۇرىس ارەكەت ەتىپ، لاۋلاعان ۇشاقتى امان-ەسەن جەرگە قوندىرىپتى. وقيعا ورنىنا كەلىپ جەتكەن شۇعىل ارەكەت ەتۋ قىزمەتتەرى جابىلىپ ءجۇرىپ، لاينەردىڭ ءورتىن ءسوندىردى.
Boeing 777 ۇشاعىندا 346 جولاۋشى ساپار شەگىپ، ولاردىڭ جيىرما بەسى جاستارى ەكىدەن اسا قويماعان بالالار بولعان. ۇشاق جولاۋشىلارى مەن ەكيپاجدان ءبىر دە ءبىر ادام جارالانعان جوق.
