قىزدار ۋنيۆەرسيتەتىندە ەرەكشە زاتتار كورمەسى ءوتتى
مەكتەپكە دەيىنگى جانە باستاۋىش كافەدراسى تۇرمىستىق زاتتاردىڭ قالدىقتارىنان جاڭا زات جاساۋ ارقىلى ستۋدەنتتەردىڭ شىعارماشىلىعىن دامىتۋ، پەداگوگيكالىق ماماندىقتار ستۋدەنتتەرىنىڭ ەكولوگيالىق مادەنيەتى مەن كوركەم شىعارماشىلىق سالاسىنداعى كاسىبي قۇزىرەتتىلىكتەرىن قالىپتاستىرۋ ماقساتىندا ۇيىمداستىردى، دەپ حابارلادى وقۋ ورداسىنىڭ باسپا ءسوز قىزمەتىنەن.
مەكتەپكە دەيىنگى جانە باستاۋىش كافەدراسىنىڭ مەڭگەرۋشىسى تۇرسىناي باينازاروۆا: «كورمە وتكىزۋ يدەياسى ستۋدەنتتەردى شابىتتاندىردى. بۇگىن تاماشا جۇمىستارعا كۋا بولاسىزدار. قازىلار القاسى وسى جۇمىستاردىڭ اراسىنان ەڭ ۇزدىگىن انىقتايدى جانە ءار اتالىم بويىنشا ماراپاتتايتىن بولامىز. ءبىز ەڭبەككە باۋليتىن پاندەردە عانا جاڭا زاتتاردى جاساۋدى ۇيرەتەتىن بولساق، ەندىگى كەزەكتە كەز كەلگەن قىزىعۋشى جان ارنايى ۇيىرمەگە قاتىسا الادى. جاڭا «شەبەر قولدار» ۇيىرمەسىن اشاتىندىعىمىزدى حابارلايمىز»، دەپ، جاستاردىڭ قولونەرمەن اينالىسۋىنا شابىتتاندىراتىن ۇيىرمە تۋرالى ءسۇيىنشى حابارىن جەتكىزدى.
قيال جۇيرىكتىگى مەن جاڭاشا ويلاۋ قابىلەتتەرىن تانىتۋدى مىندەت دەپ تاپقان پەداگوگيكا جانە پسيحولوگيا فاكۋلتەتى مەن «قازنۇر» گۋمانيتارلىق كوللدجىنىڭ ستۋدەنتتەرى كورمەگە ەرەكشە اتسالىستى. ءوز ماماندىقتارى بويىنشا كاسىبي وسۋگە سەپ بولاتىن شاراعا پلاستيك بوتەلكەلەردەن، قاقپاقتاردان، لامپالاردان، گۇلشوعى ورالعان قاعاز، لەنتا، كارتون، ديسك سىندى پايدالانىلعان زاتتاردى قولدانا وتىرىپ جاڭا دۇنيەلەر جاساعان. ءار جۇمىستىڭ اتاۋى، اۆتورى كورسەتىلىپ، قازىلار القاسىنا ۇسىنىلدى.
«باستاۋىش ءبىلىم بەرەتى ماماندارى وتە جان-جاقتى ءارى ىزدەنىمپاز بولۋ كەرەك. بۇل سالانى تاڭداعان پەداگوگتار وتە امبەباپ مامان دەپ ايتۋعا بولادى. مۇعالىم وقۋشىلارعا تەك قانا ءارىپ تانىتىپ، ەسەپ شىعارتۋ عانا ەمەس، ءان دە ايتقىزىپ، سۋرەت تە سالدىرىپ ۇيرەتەدى. سوندىقتان دا وسىنداي شارالار ارقىلى كاسىبي دامىتۋعا ۇلەس قوسامىز. ءبىزدىڭ الدىمىزدان ءتالىم الىپ جاتقان بۇگىنگى ستۋدەنتەر ەرتە بالالاردى قىزىقتىرۋعا، قولونەرمەن اينالىسۋعا، ۇشقىر ويلاۋعا ۇيرەتەتىن شەبەرگە اينالۋ كەرەك»، دەيدى قىرىق جىلدان استام پەداگوگيكالىق تاجىريبەسى بار ۇلاعاتتى ۇستاز تاتيانا لەۆچەنكو.
«كوڭىلدى فەرما»، «كيرا توراي»، «التىن بالىق» دەگەن اتاۋلاردى العان سان الۋان زاتتار كوزدىڭ جاۋىن الادى. بالانىڭ ويلاۋ قابىلەتىن دامىتۋعا اسەر ەتەتىن، وڭاي ءارى تەز جاسالاتىن زاتتار كورنەكىلىك قۇرال رەتىندە پايدالانۋعا دا ابدەن بولادى. كورمەگە قويىلعان زاتتاردى ءار توپتىڭ بەلسەندىلەرى تانىستىرىپ، قانداي زاتتاردى قولدانعاندىقتارىنا توقتالىپ ءوتتى. ءتىپتى، تۋىندىلارىن ولەڭ جولدارىمەن تانىستىرعان بەلسەندى ستۋدەنتتەر ءوز ماماندىقتارىن شىن ىقىلاسپەن تاڭداعاندىقتارىن كورسەتتى.
كورمەگە قويىلعان زاتتار وزىندىك ەرەكشەلىگى، ەستەتيكالىعى، ەكولوگيالىق قۇنىدىلىعى، پايدانىلعان ماتەريالداردىڭ ارتۇرلىلىگى بويىنشا ساراپقا سالىنىپ، ەڭ ۇزدىكتەرى انىقتالدى. قورىتىندىسى بويىنشا «باستاۋىش وقىتۋ پەداگوگيكاسى مەن ادىستەمەسى» ماماندىعىنىڭ 3-كۋرس ستۋدەنتتەرى: كارينا شابدان، اسەل ءابىلقايىروۆا، رۋشانا سادىقوۆانىڭ جۇمىستارى باس جۇلدەگە يە بولدى. ال «باستاۋىش وقىتۋ پەداگوگيكاسى مەن ادىستەمەسى ماماندىعىنىڭ 4-كۋرس ستۋدەنتى نۇرءبۇبى يماردجانوۆا، «مەكتەپكە دەيىنگى وقىتۋ جانە تاربيەلەۋ» ماماندىعىنىڭ 3-كۋرس ستۋدەنتى نۇرسۇلۋ جاقىباي 1- ورىن يەلەنسە، «مەكتەپكە دەيىنگى وقىتۋ جانە تاربيەلەۋ» ماماندىعىنىڭ 2 - جانە 3-كۋرس ستۋدەنتتەرىنەن 202، 302 توبى جاساعان جۇمىستار Ⅱ ورىنعا لايىق دەپ تانىلدى. «باستاۋىش وقىتۋ پەداگوگيكاسى مەن ادىستەمەسى» ماماندىعىنىڭ 2 -كۋرس ستۋدەنتتەرى، ياعني 205 -توپ پەن 2-كۋرس ستۋدەنتتەرى اياۋلىم ساعاتجان، انەل سۇلتانبەكوۆا، ولگا شەگاي Ⅲ ورىن الدى.
«ءبىز ساباقتا ءوز ماماندىعىمىزعا قاتىستى پاندەردىڭ بارلىعىن وتەمىز. ەڭبەككە باۋلۋ ءپانى بويىنشا شىعارماشىلىق جۇمىستارمەن اينالىسىپ كەلەمىز. وسىنداي بايقاۋعا قاتىسقانىمىزعا قۋانىشتىمىز. باسەكەلەسە وتىرىپ جاقسى ناتيجە شىعارا الامىز»، دەيدى پەداگوگيكا جانە پسيحولوگيا فاكۋلتەتىنىڭ 2-كۋرس ستۋدەنتى ەركەجان قايموللايەۆا.
ۇيىمداستىرۋشىلاردىڭ ايتۋىنشا ۇزدىك جۇمىستار اباي اتىنداعى قاز ۇ پ ۋ- دا وتەتىن كورمەگە اپارىلادى. بۇل تاجىريبە الماسۋعا، كاسىبي شىڭدالۋعا مۇمكىندىك بەرەرى ءسوزسىز.
اۆتور: مارلان جيەمباي
