قازاقستانداعى جىرتقىش قۇستارعا چيپ ورناتىلىپ، تىركەۋگە الىناتىن بولادى - ا. بەربەر
بۇل تۋرالى بۇگىن استانادا اڭشىلىق شارۋاشىلىعىن دامىتۋ جانە جانۋارلار دۇنيەسىن قورعاۋ ماسەلەلەرىنە ارنالعان دوڭگەلەك ۇستەلدە اڭشىلىق شارۋاشىلىعى سۋبەكتىلەرىنىڭ رەسپۋبليكالىق قاۋىمداستىعىنىڭ باس ديرەكتورى الەكساندر بەربەر ايتتى.
باسقوسۋدا بىلتىرعى جىلى قاۋىمداستىق تاراپىنان اتقارىلعان جۇمىستى قورىتىندىلاعان ا. بەربەر اعىمداعى جىلعى اتقارىلاتىن جوسپارمەن دە ءبولىستى.
«ءبىزدىڭ ۇيىم قازىرگى ۋاقىتتا ەلىمىزدەگى جىرتقىش قۇستار يەلەرىمەن جۇمىس جۇرگىزۋدە. قاۋىمداستىق وسىنداي قۇستارعا چيپ ورناتۋ مەن تىركەۋ جانە ولارعا پاسپورت بەرۋ جۇمىسىن قولعا الاتىن بولادى. وتكەن جىلى الماتى قالاسىنداعى وكىلدىكتە 2014، ال جالپى رەسپۋبليكا اۋماعىندا 261 قۇس تىركەلدى»، - دەدى ا. بەربەر.
ونىڭ ايتۋىنشا، قازىرگى تاڭدا ۇكىمەت دەڭگەيىندە شەشىمىن تابۋى ءتيىس وزەكتى ماسەلەنىڭ ءبىرى - قاسقىرلار سانىن دا رەتتەۋ. «الداعى كۇندەرى قاسقىردى اڭشىلاردىڭ وبەكتىسى رەتىندە، اڭشىلىق شارۋاشىلىعى سۋبەكتىلەرىنىڭ تىزىمىنە ەنگىزىپ، ارنايى ادىستەمەلەر ارقىلى ولاردىڭ سانىن رەتتەۋ كوزدەلەدى. وسى ارقىلى ءبىز الداعى ۋاقىتتا جىل سايىن ەلىمىزدەگى قاسقىرلاردىڭ سانى جايلى ناقتى مالىمەت جيناپ، ۆەتەرينارلىق-ەپيدەميولوگيالىق قاۋىپتەر جايلى اقپاراتتاردى ءتيىستى مەكەمەلەرمەن بىرلەسە شەشۋگە جاعداي جاساۋ قاجەت»، - دەدى ا. بەربەر.
اۆتور: قانات مامەتقازى ۇلى
