قازاقستان قۇراماسى ەۋروپا چەمپيونىن ۇتىپ، جارتىلاي فينالعا جولداما الدى
قازاقستان مۇنداي دوداعا العاش رەت قاتىسىپ جاتسا، يتاليا قۇراماسى ەۋروپا چەمپيونى عانا ەمەس، الەم بىرىنشىلىگىندە كۇمىس، قولا جۇلدەگەر اتانىپ جۇرگەن مىقتى كوماندا ەدى. وسىعان دەيىن قاقپاسىنا بىردە- ءبىر گول وتكىزبەگەن يتالياندىقتار (بۇل كوماندانىڭ دا نەگىزىن برازيليالىقتار قۇرايدى) قازاقستاننان مۇنداي تويتارىس الامىز دەپ كۇتپەسە كەرەك.
ەسەسىنە قازاقستاندىقتار باتىل قيمىلداپ، قارسىلاسىنىڭ قادامىن تۇساپ تاستادى. قازاقستاندىق قاقپاشى يگيتانىڭ شابۋىلعا قوسىلۋى دا يتالياندىقتاردى ابدەن ابدىراتتى. سونداي شابۋىلداردىڭ بىرىندە كوماندا كاپيتانى دىنمۇحامبەت سۇلەيمەنوۆتەن ءدال پاس العان لەو ءبىرىنشى گولدى سوقتى. كوپ ۇزاماي لەونىڭ قاتتى سوققىسىن الەمدەگى ۇزدىك قاقپاشىلاردىڭ ءبىرى دەلىنەتىن ستەفانو ماممارەللا قاقشىپ ۇستاي الماعاننان كەيىن ونى سەرىك جامانقۇلوۆ قاقپاعا سۇڭگىتتى. بۇل چەمپيونات مەرگەندەرىنىڭ ءبىرى سەرىكتىڭ ءتورتىنشى گولى ەدى.
ەكىنشى تايمدا ەرەكشە سىلكىنىپ شىققان يتالياندىقتاردان فورتينو 23-مينۋتتا ەسەپتى قىسقارتتى. ءبىراق 30 سەكۋند وتەر- وتپەستە يتالياندىقتاردىڭ قاتەسىن پايدالانعان شىڭعىس ەسەنامانوۆ ەسەپتى 3:1-گە جەتكىزدى. بۇدان كەيىن يتاليا قۇراماسى قاقپاشىسىن الىپ تاستاپ، ويناۋعا كوشتى. سونداي ساتتە س. جامانقۇلوۆ الىستان باعىتتاعان دوپ بوس قالعان قاقپادان قيىس كەتتى. 37-مينۋتتا كانال ەسەپتى قايتا 3:2-گە دەيىن جەتكىزدى. وسى ساتتە قازاقستان قۇراماسىنىڭ باس باپكەرى كاكاۋ ءۇزىلىس الىپ، ويىنشىلار الاڭعا شىققان مەزەتتە قازاقستاندىقتار تاعى ءبىر گولدى سوقتى. ۇزدىك ويىنشىلاردىڭ ءبىرى شىڭعىس ەسەنامانوۆ تەپكەن دوپ باعانادان كەرى قايتقانمەن، قاقپا الدىنداعى بۇل مۇمكىندىكتى داۋرەن نۇرعوجين ءمۇلت جىبەرگەن جوق. سوڭعى سەكۋندتاردا لەو الىستان بوس قالعان قاقپانى ءدال كوزدەپ، قوس گولدىڭ اۆتورى اتاندى.
وسىلايشا ەۋروپا چەمپيونىن قاپى قالدىرعان قازاقستان قۇراماسى جارتىلاي فينالعا شىقتى. جارتىلاي فينال كەزدەسۋلەرى بەيسەنبى كۇنى وتەدى. الدىمەن الاڭ يەلەرى سەربيا مەن رەسەي قۇرامالارى وينايدى. سودان كەيىن قازاقستان مەن الەمدەگى تاعى ءبىر مىقتى كوماندالاردىڭ ءبىرى يسپانيا كۇش سىناسادى. وكىنىشكە قاراي، يتاليامەن ويىندا چەمپيوناتتاعى ەكىنشى ەسكەرتۋىن العان قاقپاشى يگيتا يسپانيامەن كەزدەسۋگە قاتىسا المايدى.
اۆتور: ەلجان ەرالى
