قازاقستان مەن يراننىڭ اراسىندا ۆيزالىق رەجيمدى جويۋ قاجەت - ءامىر ابەدي
«يراننان سانكسيالاردى الىپ تاستاۋ جانە قازاقستاندىق- يراندىق ىسكەرلىك كەڭەسىنىڭ الداعى جۇمىسى ەكى ەلدىڭ ءوزارا ءتيىمدى ىنتىماقتاستىعىن جانداندىرۋ بيىلعى جىلى باستالاتىنىنا ۇمىتتەنۋگە مۇمكىندىك بەرىپ وتىر. ىسكەرلىك كەڭەس يران مەن قازاقستاننىڭ ساۋدا- ينۆەستيتسيالىق ىنتىماقتاستىعىنىڭ، عىلىمي- تەحنيكالىق ءوزارا ىقپالداستىعىنىڭ نىعايۋىنا كومەكتەسەدى»، - دەپ ءتۇسىندىردى قۇجاتقا قول قويىلۋىن «بايتەرەك» حولدينگىنىڭ باسقارما ءتوراعاسى قۋاندىق بيشىمبايەۆ.
ونىڭ ايتۋىنشا، بۇگىندە قازاقستان - ت م د ەلدەرىنىڭ اراسىندا تىكەلەي شەتەلدىك ينۆەستيتسيالاردى تارتۋ بويىنشا كوشباسشى. «سوڭعى 10 جىلدا مەملەكەت 215 ميللياردتان استام ا ق ش دوللارى سوماسىنا تىكەلەي ينۆەستيتسيالاردى تارتتى. اتالعان ءۇردىس مەملەكەت باسشىسىنىڭ تاپسىرماسىمەن شەتەلدىك كاپيتال ءۇشىن تارتىمدى جاعدايلار جاسالىپ وتىرعانىنان حابار بەرەدى»، - دەپ اتاپ ءوتتى قۋاندىق بيشىمبايەۆ.
ءوز كەزەگىندە، يراندىق-قازاقستاندىق ىسكەرلىك كەڭەسىنىڭ تەڭ ءتوراعاسى ءامىر ابەدي يراننىڭ بانك جۇيەسى قازاقستاندىق بانكتەرمەن كوررەسپوندەنتسيالىق قاتىناستاردى جۇرگىزۋ ءۇشىن اشىق بولىپ وتىرعانىن اتاپ ءوتتى. «بانكتەردىڭ ءوزارا ىقپالداستىعى ماسەلەسىن شەشۋ ماڭىزدى. ونسىز ساۋدا- ينۆەستيتسيالىق ءوزارا ىقپالداستىقتى دامىتۋ مۇمكىن ەمەس. بۇدان باسقا، قازاقستان مەن يراننىڭ اراسىندا ۆيزالىق رەجيمدى جويۋ قاجەت. قازىرگى كەزدە يراننىڭ 190 ەلمەن ۆيزانى اۋەجايلاردا الۋ جۇيەسى جۇمىس ىستەپ وتىر»، - دەدى ءامىر ابەدي.
«قارجىلىق جۇيە ءبىرىنشى كەزەكتە ساۋداعا قىزمەت ەتەدى. قازىرگى ۋاقىتتا يراننىڭ 9 بانكى SWIFT حالىقارالىق تولەم جۇيەسىنە قوسىلعانى تۋرالى اقپارات بار. ءبىزدىڭ دەلەگاتسيامىزدا يراندىق قارجىلىق ينستيتۋتتارمەن قاتىناستار ورناتۋعا قىزىعۋشىلىق ءبىلدىرىپ وتىرعان قازاقستاندىق بانكتەردىڭ وكىلدەرى بار»، - دەپ قوستى قۋاندىق بيشىمبايەۆ.
ىسكەرلىك كەڭەستىڭ قورىتىندىلارى بويىنشا يراننان سانكسيالار الىنعان سوڭ العاشقى كەلىسىمشارتقا قول قويىلدى. قازاقستاندىق «Meat Processing and Service» كومپانياسى يرانعا 30 ميلليون دوللارعا ەت ونىمدەرىن جەتكىزۋ تۋرالى كەلىسىمشارت جاساستى.
