باياناۋىلدا تۋريستىك قىزمەتتىڭ دەڭگەيى كوتەرىلەدى

استانا. قازاقپارات - پاۆلودار وبلىسىنداعى باياناۋىل تۋريستىك باعدارىندا قىزمەت كورسەتۋ دەڭگەيى ارتادى.

بۇگىن ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا اتالعان ءوڭىردىڭ اكىمى قانات بوزىمبايەۆ وسىلاي ءمالىم ەتتى.

ونىڭ سوزىنە قاراعاندا، وبلىس اكىمدىگى تۋريستىك سالا بويىنشا ەرىكتىلەر مەن گيدتەردى دايارلاۋ، سونداي-اق تۋريستىك باعدارلاردى قۇرۋ شارالارىن جۇزەگە اسىرۋدا.

«جاسىباي» جانە «تورايعىر» كولدەرى سەكىلدى بىرەگەي جەرلەردىڭ مۇمكىندىگى شەكسىز ەمەس. ەگەر دە 150-200 ادام كەلسە، بۇل جاسىباي كولى ءۇشىن جەتكىلىكتى»، - دەپ اتاپ ءوتتى اكىم.

ق. بوزىمبايەۆتىڭ اتاپ وتۋىنشە، تاسقىن كەزىندە سۋ شايىپ كەتكەن باياناۋىل اۋدانىنداعى جولدار قالپىنا كەلتىرىلۋدە. ەندى بىرنەشە شاعىن ۋچاسكەلەرگە اسفالت توسەۋ جۇمىستارى قالدى جانە بۇل جۇمىستار كۇن جىلىعاننان كەيىن جالعاساتىن بولادى.

سونىمەن قاتار اۋدان ورتالىعىندا قازىرگى زامانعى كارىز جۇيەسىنىڭ قۇرىلىسى جوسپارلانۋدا. وسىنىڭ الدىندا تانىستىرىلعان 5 ميلليارد تەڭگەلىك جوبا قىمباتقا ءتۇسىپ وتىر. بۇگىندە بۇل جوبانى ارزانداتۋ ءۇشىن ءتيىستى جۇمىستار جۇرگىزىلۋدە.

اۆتور: رۋسلان عابباسوۆ