قازاقستاندا بوراندى كۇندەرى جولعا شىققان جۇرگىزۋشىلەرگە ايىپپۇل سالىنۋى مۇمكىن
بۇل جايىندا توتەنشە جاعدايلاردىڭ الدىن الۋ جانە ولاردى جويۋ جونىندەگى ۆەدومستۆوارالىق مەملەكەتتىك كوميسسيانىڭ وتىرىسىندا بەلگىلى بولدى.
جيىن بارىسىندا ق ر ىشكى ىستەر ءمينيسترىنىڭ ورىنباسارى ۆلاديمير بوجكو اكىمشىلىك پوليتسيا كوميتەتىنىڭ ءتوراعاسى يگور لەپەحادان بوراندى كۇندەرى جولداردىڭ جابىلعانىنا قاراماستان جولعا شىعاتىن جۇرگىزۋشىلەر قاتارىنىڭ ازايماي وتىرعاندىعىن ايتا كەلە: «مۇنى تىيۋ ءۇشىن اكىمشىلىك كودەكسكە قانداي دا ءبىر وزگەرتۋلەر ەنگىزۋ كوزدەلگەن بە؟»، - دەپ سۇرادى.
«جالپى، بىزدە پوليتسيا قىزمەتكەرىنىڭ زاڭدى تالابىنا باعىنباعان جاعدايدا قولدانىلاتىن شارا بار. ءبىراق، ونى قولدانۋ وتە قيىن. ويتكەنى، ەڭ بىرىنشىدەن، جۇرگىزۋشىلەر وتىرىك ايتادى. ولار جاقىن ەلدى مەكەنگە بارامىن دەپ الداپ، ۇلكەن جولدارعا شىعىپ كەتەدى. ودان كەيىن ۇلكەن جولداردى جاۋىپ تاستاۋ مۇمكىن ەمەس»، - دەدى ي. لەپەحا.
«مەن بىرنەشە وبلىستاردا بولعانىمدا: «مۇنداي جاعدايلاردا ءبىزدىڭ ازاماتتارىمىزدى قۇتقارۋمەن بايلانىستى ماتەريالدىق شىعىنداردى تالاپ ەتۋ ماسەلەسىن قاراستىرۋ قاجەت شىعار»، دەگەن ساۋالدار قويىلۋدا. ارينە بۇل ماسەلەنىڭ وتە كۇردەلى ەكەندىگى تۇسىنىكتى. ءسىز دۇرىس ايتىپ وتىرسىز. دالەلدەۋ پروتسەسى وتە كۇردەلى»، - دەپ اتاپ ءوتتى ۆ. بوجكو ءوز كەزەگىندە.
وسى رەتتە ل. لەپەحا قار قۇرساۋىندا قالعان ازاماتتاردى قۇتقارۋعا كەتكەن شىعىن بيۋدجەتكە سالماق سالاتىن بولسا، وندا ازاماتتىق ءىس جۇرگىزۋمەن تارتىبىمەن شىعىندى ءوندىرۋ تۋرالى سوتقا جۇگىنۋگە بولاتىنىن ايتتى.
«ءبىزدىڭ باستى ماقساتىمىز جازالاۋ ەمەس، قۇتقارۋ. دەگەنمەن مۇنداي جاعدايعا بىرنەشە مارتە قاساقانا تۇسەتىندەر بولسا، وندا قاراستىرۋ قاجەت. مۇنى بارلىق مۇددەلى ۆەدومستۆولارمەن كەلىسۋ كەرەك»، - دەپ تۇيىندەدى ءسوزىن ۆ. بوجكو.
اۆتور: مارلان جيەمباي
