قازاقستاندا «شەپ» بەكەتتەرى جەتىسپەيدى

استانا. قازاقپارات - قازاقستاندا «شەپ» بەكەتتەرى جەتىسپەيدى. بۇل تۋرالى بۇگىن توتەنشە جاعدايلاردىڭ الدىن الۋ جانە ولاردى جويۋ جونىندەگى ۆەدومستۆوارالىق مەملەكەتتىك كوميسسيانىڭ وتىرىسىندا ق ر ىشكى ىستەر مينيسترلىگى اكىمشىلىك پوليتسيا كوميتەتىنىڭ ءتوراعاسى يگور لەپەحا ءمالىم ەتتى.

«وسى ءساتتى پايدالانىپ، جەرگىلىكتى اتقارۋشى ورگانداردىڭ نازارىن ەلىمىزدىڭ اۆتوجولدارىندا «شەپ» ستاتسيونارلىق بەكەتتەرىن سالۋ ماسەلەسىنە اۋدارعىم كەلەدى. ويتكەنى، بۇگىنگى كۇنگى تاجىريبە كورسەتىپ وتىرعانداي، قوزعالىستى شەكتەۋ، جولدى جابۋدىڭ بارىنشا ءتيىمدى ادىستەرىنىڭ ءبىرى «شەپ» بەكەتتەرى بولىپ وتىر. دەگەنمەن، ىشكى ىستەر ءمينيسترى بۇيرىعىمەن بەكىتىلگەن ورنالاستىرىلۋى ءتيىس 44 بەكەت بولۋى قاجەت. ال قازىرگى ۋاقىتتا 35 بەكەت جۇمىس ىستەپ تۇر»، - دەدى ول.

ونىڭ اتاپ وتۋىنشە، 9 بەكەت جوق نەمەسە بار بولعانىمەن ولاردا جۇمىس ىستەۋ مۇلدەم مۇمكىن ەمەس. مۇنان بولەك تاعى ءبىر ماسەلە بار. ول جولداردىڭ قارقىندى سالىنۋى. ياعني، جاڭا جولدار «شەپ» بەكەتتەرىن اينالىپ وتەدى.

«مۇنداي جايت جامبىل وبلىسىندا ورىن الۋدا. ول جاقتا جاڭا جول 2 بەكەتتى اينالىپ وتەدى. قاراعاندى وبلىسىندا دا جاڭا جول 2 بەكەتتى اينالىپ وتەتىن بولادى. ياعني، بۇل وتە كۇردەلى ماسەلە. وڭتۇستىك قازاقستان وبلىسىنداعى ءبىر بەكەت اپاتتى جاعدايدا، جۇمىس ىستەپ تۇرعان جوق. ەكىنشىسى دە باسقا جەرگە كوشىرىلەتىن بولادى. اقتوبە وبلىسىندا «شەپ» بەكەتتەرى مۇلدەم جوق»، - دەدى ي. لەپەحا.

وسىعان وراي كوميتەت باسشىسى جەرگىلىكتى اتقارۋشى ورگاندارعا بۇل ماسەلەگە ءجىتى نازار اۋدارۋ قاجەتتىگىن ەسكەرتتى.

 اۆتور: مارلان جيەمباي