تۇركيا ءمينيسترى احمەت ياساۋي ۋنيۆەرسيتەتىنە باردى - فوتو

استانا. قازاقپارات - وڭتۇستىك قازاقستان وبلىسىنا تۇركيا رەسپۋبليكاسىنىڭ ەكونوميكا ءمينيسترى مۇستافا ەليتاش ءىس- ساپارمەن بولدى. ساپار بارىسىندا قۇرمەتتى قوناق كيەلى تۇركىستان شاھارىندا بولىپ، احمەت ياساۋي ۋنيۆەرسيتەتىنە ارنايى باردى.

ەكى ەلدىڭ ىنتىماعى مەن باۋىرلاستىعىنىڭ سيمۆولىنا اينالعان وقۋ ورنىنىڭ ۇجىمى مۇستافا ەليتاش مىرزانى زور قوشەمەتپەن قارسى الدى، دەپ حابارلايدى ۋنيۆەرسيتەتتىڭ باسپا ءسوز قىزمەتى.

مۇستافا ەليتاش احمەت ياساۋي ۋنيۆەرسيتەتى قالاشىعىنىڭ ماكەتىمەن تانىسىپ، «تۇركى حالىقتارىنىڭ مۇراجايىن» تاماشالادى. سودان كەيىن مينيستر ۋنيۆەرسيتەتتىڭ قۇرمەتتى قوناقتارىنا ارنالعان «لەبىز كىتابىنا» ءوز تىلەگىن ءبىلدىرىپ، قولتاڭبا قالدىردى.

 ۋنيۆەرسيتەتكە ارنايى كەلگەن مارتەبەلى مەيمانعا ۋنيۆەرسيتەت پرەزيدەنتى، پروفەسسور ءۋاليحان ابدىبەكوۆ العىسىن ءبىلدىرىپ، قازاقى داستۇرمەن ۇلتتىق شاپان جاۋىپ، سىي- سياپات تابىستادى.