الماتىدا «بالالار بەيبىتشىلىكتى بەينەلەيدى» قوعامدىق قورى قۇرىلدى - فوتو

الماتى. قازاقپارات - دۇيسەنبى كۇنى الماتىدا «بالالار بەيبىتشىلىكتى بەينەلەيدى» قوعامدىق قورىنىڭ اشىلۋ ءراسىمى بولىپ ءوتتى.

قوردىڭ ماقساتى - سۋرەت سالاتىن دارىندى بالالارعا قولداۋ كورسەتۋ، سۋرەتشى جاستاردىڭ شىعارماشىلىق الەۋەتىن ارتتىرۋعا ۇلەس قوسۋ. سونداي-اق، ماتەريالدىق جانە ماتەريالدىق ەمەس مادەني مۇرالاردى ناسيحاتتاۋ.  

قوردىڭ اشىلۋىمەن قاتار، رەسپۋبليكالىق «بالالار بەيبىتشىلىكتى بەينەلەيدى» اتتى بالالار مەن جاسوسپىرىمدەر بايقاۋىنىڭ باستالعاندىعى جاريا ەتىلدى. بۇل يۋنەسكو جوباسى ەلىمىزدە ءداستۇرلى تۇردە 1999 -جىلدان بەرى وتكىزىلىپ كەلەدى. بيىلعى بايقاۋ الماتى قالاسىنىڭ 1000 جىلدىعىنا ارنالىپ وتىر. وعان ەلىمىزدىڭ تۇپكىر- تۇپكىرىنەن 3 جاستان 17 جاسقا دەيىنگى ارالىقتاعى بالالار مەن جاسوسپىرىمدەر قاتىسا الادى. وتىنىمدەردى www.kazfuca.kz سايتىنا جىبەرۋگە بولادى. بايقاۋ قورىتىندىسى قىركۇيەك ايىندا جاريا ەتىلەدى.

«قازاقستان يۋنەسكونىڭ وسىنداي جوبالارىنا قاتىسۋى ارقىلى، ب ۇ ۇ- نىڭ يگىلىكتى شارالارىنا بەلگىلى ءبىر دارەجەدە ءوز ۇلەسىن قوسادى. ءبىزدىڭ باستاماشىل توپ وسى بايقاۋدىڭ بازاسىندا بيىل قور قۇرۋدى ءجون كوردى. بۇل كوپتەن بەرى كوكەيدە جۇرگەن وي بولاتىن. ويتكەنى، بۇل الەمنىڭ باستى تۇلعالارى - بالالار. بەيبىتشىلىكتى، تىنىشتىقتى جان- تانىمەن قالايتىن دا ەڭ ءبىرىنشى وسى بالالار. ءبىزدىڭ ەلىمىز ەڭ دامىعان 30 ەلدىڭ قاتارىنا ەنۋگە كۇش سالىپ جاتىر. بۇل تۇرعىدا ۇلتتىق ونەردى دامىتۋدىڭ ماڭىزى زور. اسىرەسە ونەردى بالالاردىڭ كوزىمەن كورسەتە ءبىلۋىمىز كەرەك. بالالار شىعارماشىلىعى - دامىعان ەل ەكەندىگىمىزدىڭ ءبىر كورىنىسى ىسپەتتەس»، - دەدى «بالالار بەيبىتشىلىكتى بەينەلەيدى» قوعامدىق قورىنىڭ قامقورشىلار كەڭەسىنىڭ ءتورايىمى ءبىرعانىم ءايتىموۆا.

اۆتور: جاپپاربەرگەن ايبوتا