وڭتۇستىك قازاقستاندا اكىمنىڭ باسپا ءسوز حاتشىسى كۇيەۋىنە توقال ىزدەپ، جۇرتشىلىقتىڭ جاعاسىن ۇستاتتى
اكىمدىك قىزمەتكەرى گاۋحار قابىلبەكوۆا كۇيەۋىنە جار ىزدەيتىنىن كوپشىلىككە جايىپ سالعان. بۇل تۋرالى qamshy.kz سىلتەمە جاساپ كوررەسپوندەنت باسىلىمى جازدى.
«پارلامەنتتە كوكەلەرىمىز بەن اپالارىمىز ەكى ايەل الۋعا رۇقسات بەرۋ تۋرالى زاڭدى ءالى تالقىلاپ كەلەدى. ءبىر مامىلەگە كەلە الماۋدىڭ باستى سەبەبى - كوكەلەرىمىزدىڭ ۇيدەگى جەڭەشەلەرىمىزدەن اسا الماۋىندا بولسا كەرەك. باسقالاي سەبەبىن كورە الماي تۇرمىن. ايەلدەرگە كەلسەك. ەكىنشى ايەل اپەرۋدەن نەگە قورقاتىندارىن استە تۇسىنبەيمىن (ءوزىمدى وندايلاردىڭ قاتارىنا قوسپايمىن). نازىك جاندىلارىمىزدىڭ وزىمشىلدىگى تۇتاستاي ۇلتتىڭ جويىلۋىنا اكەپ سوقپاسىن ءبىر كۇنى. ولاي ويلاۋعا دا نەگىز بار. بۇگىندە قازاق دالاسىن بەدەۋلىك جايلادى. ونى مەديتسينا سالاسىنىڭ ماماندارى دا راستاپ بەرە الادى. ال، بالا تۋعىزۋعا قابىلەتتى ەر ازاماتتارىمىز ايەلىنە 10 بالا تاپتىرا الماي ءجۇر. سەبەپ، زايىبىنىڭ «دەنساۋلىعى كوتەرمەيدى». دەنساۋلىعى جاراماسا، ءبىر كۇيەۋگە زار بولعان، وڭ بوساعادا وتىرعان قىزدارىمىز قانشاما، سولاردىڭ ءبىرىن اپەر. الدە، ەركەك ءومىر بويى ءبىر ايەلگە تابىنىپ ءوتۋى كەرەك پە؟! تابىنۋى قاجەت بولسا، اقىلىمىزبەن تابىندىرايىق، وزىمشىلدىگىمىزبەن ەمەس. السىن ەكىنشى ايەل، شاماسى كەلسە ءۇشىنشىسىن السىن، كوبەيسىن. ءاربىرىنىڭ نەسىبەسى وزىندە. بۇل ايتقاندارىمدى ايەلدەر قولدامايتىنىن بىلەمىن. ەرىكتەرى ءبىلسىن. ءبىراق كەتەم دەگەن ەركەكتى ەشكىم ۇستاپ تۇرا المايتىنىن دا ۇمىتپاڭىزدار. قىتاي ەلى ەكىنشى بالاعا رۇقسات بەرىپتى. ولاردىڭ كوبەيگەنىنىڭ كوكەسى ەندى بولادى. ءبىز قايدان كوبەيەمىز؟ ايەلدەر وتىرسا، بولىسپەيمىن دەپ. ەركەكتەر وتىرسا، ايەلىم كونبەيدى دەپ. زاڭنىڭ قابىلدانباي جاتىسى اناۋ /دەپۋتاتتاردىڭ دا ايەلدەرى بار ەمەس پە، ولاردىڭ كەلىسىمىنسىز زاڭ دا قابىلدانبايدى- اۋ»، - دەيدى جۇبايىنا ەكىنشى جار ىزدەگەن كەلىنشەك.
ءوز ويىن اشىق ايتۋدان قىمىسىنباعان پوست اۆتورى نەلىكتەن كۇيەۋىنە ەكىنشى ايەل الىپ بەرۋگە بەل بۋعانىن دا جاسىرماعان.
«كۇيەۋىمە ءبىر ۇل، ءبىر قىز سىيلادىم. قۇداي قانشا بەرسە دە، كوپسىنبەس ەدىم. ايتسە دە، بەرمەگەنىن تارتىپ الا المايسىڭ. ۇيلەن دەدىم. ازىلدەن تىس. ەكىنشى ايەلدى تاڭداۋدى وزىمە سالدى. سونىمەن، كاستينگ جاريالايمىن... قازاقتىڭ سانىن كوبەيتەمىن دەگەن قىزدار بولسا، كانديداتۋراسىن قاراۋعا ءازىرمىز. زاڭنىڭ قابىلدانعانىن كۇتىپ جۇرگەندە، ەلىمىزدى قىتاي قاپتاپ كەتەر» دەپ جازعان. مۇنى وقىپ، جۇرت قىزۋ تالقىعا سالدى. ءبىرى كەلىستى، قۇپتادى، «ورىندى ءۋاج» دەدى، ەندى بىرەۋلەرى گاۋحار قابىلبەكوۆانى سوككەندەي بولدى. «كاستينگ» جاريالاعان اپكەمىزدىڭ جازباسى كەيبىرىنىڭ جاعاسىن دا ۇستاتتى. ءتىپتى سايت ءتىلشىسى كۇيەۋىنە جار ىزدەگەن كەلىنشەكپەن جەكە تىلدەسىپتى. ءبىر قىزىعى، اكىمدىك قىزمەتكەرى بۇل ارەكەتىنە تاڭ قالۋدىڭ قاجەتتىگى جوقتىعىن ايتىپ، ءتىپتى تەرىس پىكىر بىلدىرگەندەرگە كادىمگىدەي رەنجىپ وتىرعانىن دا جاسىرماعان. «بالا- شاعامنىڭ باۋىرلارى كوپ بولسا، وعان نەگە مەن قارسى بولۋىم كەرەك؟ ...جىگىتتەردىڭ تاپشىلىعى سەزىلۋدە. سوندىقتان كەيبىرى بۇيىرعانى وسى دەپ، شەتەلدىكتەردىڭ ەتەگىنەن ۇستاپ كەتىپ جاتىر. وزگە ۇلتتىڭ كوبەيۋىنە اتسالىسىپ جاتقان قىزداردى جوق دەي المايتىن شىعارسىز. ەندەشە رۇقسات بەرۋ كەرەك، ەر ازاماتتارىمىز سانالى بولسا، ەكى ايەلدىڭ دە قادىرىنە جەتەر دەپ ويلايمىن ءوز باسىم»، - دەپ ويىن قورىتىندىلاعان گاۋحار قابىلبەكوۆا.
سونداي- اق، ول بۇگىندە جاس قىزداردىڭ كەيبىرى وتباسىلى ازاماتتارعا جابىسىپ، سونىڭ سالدارىنان ويناستاردىڭ كوبەيەتىنىن، بۇل جەتىمدەردىڭ ارتۋىنا سەبەپشى ەكەنىن دە جاسىرماعان.
دەرەككوز: Nur.kz
