اسكەريلەر زاماناۋي بايلانىس قۇرالدارىن مەڭگەرۋدە - فوتو

استانا. قازاقپارات - قاپشاعاي قالاسىنداعى «قازبات» قازاقستاندىق بىتىمگەرشىلىك باتالونىنىڭ بازاسىندا قازاقستاندىق اسكەري قىزمەتشىلەر ءۇشىن «حارريس» راديوستانسيالارىن پايدالانۋعا جانە ولاردى «حاممەر» اۆتوموبيلدەرىنە ورناتۋ تارتىبىنە وقىتۋ بويىنشا كۋرس باستالدى.

بۇل تۋرالى قورعانىس مينيسترلىگىنىڭ باسپا ءسوز قىزمەتى حابارلادى.

وقۋعا «حارريس» بايلانىس قۇرالدارىن ورناتۋ، رەتكە كەلتىرۋ جانە پايدالانۋ قاعيداتتارى جونىندە ءوز بىلىمدەرىن جەتىلدىرەتىن «قازبات» بايلانىسىنىڭ ماماندارى تارتىلدى.

«راديوستانتسيالار قازاقستان مەن ا ق ش- تىڭ قورعانىس ۆەدومستۆولارى اراسىنداعى بەس جىلدىق ىنتىماقتاستىق جوسپارى جانە «بىتىمگەرشىلىك وپەراتسيالار بويىنشا جاھاندىق باستاما» (GPOI) باعدارلاماسى شەڭبەرىندە «قازبات» قازاقستاندىق بىتىمگەرشىلىك باتالونىن جاساقتاۋ ءۇشىن 2015-جىلى ا ق ش ۇكىمەتىمەن اقىسىز نەگىزدە جەتكىزىلگەن»، دەلىنگەن حابارلامادا.

راديوستانتسيالار «قازباتتىڭ» جاۋىنگەرلىك دايارلىعى ۇدەرىسىندە تاپتىرماس قۇرال جانە ناتو ستاندارتتارى بويىنشا تولىعىمەن ۇيلەسكەن. بۇل «دالا قىرانى» بىتىمگەرشىلىك وقۋ-جاتتىعۋى، ونىڭ ىشىندە 2014-جىلى گەرمانيادا وتكىزىلگەن وقۋ-جاتتىعۋ بارىسىندا بىرنەشە مارتە راستالدى.