بريتاندىق فەرمەر تازا اۋانى جيناپ اۋقاتتى قىتايلارعا ساۋدالاۋدا

استانا. قازاقپارات - ۇلىبريتانيادا جەرگىلىكتى شارۋاشىلىق قوجايىنى لەو دە ۆاتتس اۋىلدىڭ تازا اۋاسىن ساتىپ ءجۇر. The Independent باسىلىمىنىڭ جازۋىنشا، اۋقاتتى قىتاي تۇرعىندارى بريتاندىق تاۋارعا ەرەكشە قىزىعۋشىلىق تانىتىپ وتىر.

تۇماندى البيوننىڭ تاۋلى شىڭدارىنان جينالعان اۋانىڭ ءبىر قۇتىسى 80 فۋنتقا ساتىلۋدا. كاسىپكەردىڭ ايتۋىنشا، بريتاندىق «ءونىمدى» اۋاسى لاستانعان شانحاي جانە بەيجىڭ تۇرعىندارى كوبىرەك ساتىپ الۋدا، اۋقاتتى تۇرعىندار بىرنەشە جۇتىم اۋا ءۇشىن قوماقتى سومانى تولەۋدى قيىنسىنباي وتىر.

ۆوتتستىڭ سايتىندا اۋانىڭ سومەرسەت ماڭىنان، ۋەلس پەن دورسەتتەن جينالاتىندىقتان، جۇپار ءيىستى ەكەنى اتالىپ وتىلگەن. جارنامادا «تۇمسا تابيعات تازارتقان اۋا، ول اعاشتىڭ اراسىنان ەسىپ، سىلدىراپ اققان بۇلاقتىڭ سۋىمەن تازارادى، جارتاستاردىڭ اراسىنان ءوتىپ كوركەم تابيعاتتىڭ ورتاسىنا ورالادى» دەپ كورسەتىلگەن.

 ءبىر قىزىعى كەيبىر تۇتىنۋشىلار اۋانى ساتىپ الىپ جيناۋدا، ولار ونىڭ باعاسى كەيىننەن قىمباتتايدى دەپ ەسەپتەيدى.