قاراعاندىدا كيكبوكسينگتەن كاسىپقوي جەكپە-جەكتەر ءوتتى - فوتو
سپورت سۇيەر قاۋىمعا قۋانىش سىيلاعان بۇل شارانى قاراعاندى وبلىستىق كيكبوكسينگ جانە تاي بوكس فەدەراتسياسىنىڭ پرەزيدەنتى، WAKO-pro-نىڭ رەسمي وكىلى ەرلان سۇلتان ۇلى دوسماعامبەتوۆ ۇيىمداستىردى.
دودانىڭ اشىلۋ سالتاناتىنا ارنايى كەلىپ قاتىسقان قازاقستان كيكبوكسينگ فەدەراتسياسىنىڭ پرەزيدەنتى تاستانبەك قۇتجان ۇلى ەسەنتايەۆ مۇنداي سپورتتىق شارانىڭ سالاماتتى ءومىر سالتىن ناسيحاتتاۋعا زور ۇلەس قوساتىنىن اتاپ ءوتتى.
جالپى، كوماندالىق سايىس فورماتى بويىنشا وتكەن كاسىپقوي جەكپە-جەكتەر ەلىمىزدە تۇڭعىش رەت ۇيىمداستىرىلىپ وتىر. سپورت جاناشىرى ەرلان دوسماعامبەتوۆتىڭ ايتۋىنشا، بولاشاقتا كوممەرتسيالىق باعىتتاعى مۇنداي تۋرنيرلەر لايىقتى جالعاسىن تاۋىپ، ءداستۇرلى تۇردە وتەتىن سپورت شاراسىنا اينالماقشى.
جەكپە-جەكتەر اراسىنداعى ءۇزىلىس كەزىندە ۆوركاۋت سپورتىنىڭ «Bar bars pro» كومانداسى ءوز ونەرلەرىن كورسەتتى. سونداي-اق، رەسەيدىڭ ءبىرىنشى ارناسىنداعى «گولوس» شوۋ- باعدارلاماسىنا قاتىسىپ، تانىمال بولعان بەنازير ەرماعانبەتوۆا ءان سالىپ، جانكۇيەر قاۋىمدى جەلپىنتىپ وتىردى.
تارتىستى وتكەن جەكپە-جەكتەر ناتيجەسىندە قاراعاندى وبلىسىنىڭ سپورتشىلارى 4:1 ەسەبىمەن جەڭىسكە جەتىپ، قوماقتى سىياقىعا يە بولدى.
كاسىپقوي جەكپە-جەكتەر ناتيجەسى:
(جەڭىمپازدار ءبىرىنشى جازىلدى)
51 كەلى. لوۋ-كيك. ءجانالى سالىمگەرەيەۆ (اتىراۋ) - دانيار ورال (قاراعاندى)؛
57 كەلى. ك-1. سافار احمادوۆ (قاراعاندى) - جاندوس نازاربەكوۆ (اتىراۋ)؛
58,5-60 كەلى. فۋل- كونتاكت. رۋسلان بايازيتوۆ (قاراعاندى) - ازامات وتەمىسوۆ (اتىراۋ)؛
71 كەلى. لوۋ-كيك. باقىتبەك شىنتەمىر (قاراعاندى) - اسەت مەيىرلان (اتىراۋ)،
81 كەلى. لوۋ-كيك. ميحايل تاتكوۆ (قاراعاندى) - ساعىندىق قيزاتوۆ (اتىراۋ).
