دەنساۋلىق: اعزانى قالاي تازارتامىز؟

استانا. قازاقپارات - تەرىنىڭ بوزارۋى، تەز شارشاۋ، تەرى قابىنۋلارى، تىتىركەنۋ اسەرلەرى جانە ت. ب. نارسەلەردىڭ باستى بەلگىلەرىنىڭ ءبىرى، اعزانىڭ زيان ءارى ۋلى زاتتارمەن لاستانۋى بولىپ تابىلادى.

ءبىزدىڭ زيان تاعامدار مەن فاستفۋدتاردى جەۋىمىز، شامادان تىس ءتاتتى قولدانۋىمىز، كەيدە ءتىپتى سينتەزدىك قوسپالارى بارىن دا، كوپتەگەن ءدارى-دارمەكتەردى ءىشۋىمىز، سونداي-اق جيىرەك كەزدەسىپ جاتاتىن ارتىق تاماق جەگەنىمىزدىڭ سالدارىنان، اعزامىز بۇنداي اۋىرتپالىقتارمەن ءوزى كۇرەسە الماي جاتادى.

ءسويتىپ ءبىزدىڭ اس قورىتۋ پروتسەسىمىز بۇزىلادى، تاعام قاجەتتى تۇردە قورىتىلمايدى جانە قورىتىلماعان تاماق قالدىقتارى اعزادا قالىپ، جينالا بەرەدى. قورىتىلماعان ءونىم قالدىقتارىنان ءبىزدىڭ دەنەمىزدى ۋلاۋشى زارلەردى بولەتىن باكتەريالار، اشىتقىلار جانە پاتوگەندەر كوبەيدى.

ءى ق ج (ىشەك-قارىن جولىنىڭ) جاعدايى تەرىدە قابىنۋ نەمەسە تىتىركەنۋ اسەرلەرى ارقىلى كورىنەدى. ءبىزدىڭ اعزامىز ءجيى-ءجيى جەڭىل تاماقتاناتىن كۇندەر مەن تازالىققا ءزارۋ. ىشەكتەردى تازالاۋ ارقىلى ءبىز باۋىر، بۇيرەك، وكپە سياقتى مۇشەلەرگە، يممۋندىق جۇيەگە تۇسەتىن جۇكتەمەنى جەڭىلدەتەمىز، بۇكىل ىشەك-قارىن جولدارىنىڭ جۇمىسىن قالىپقا كەلتىرەمىز. ناتيجەسىندە اس قورىتۋ جۇيەسى، زاتتەكتەر الماسۋى جانە تەرى قالىپى جاقسارىپ، اعزا كەيبىر سوزىلمالى اۋىرۋلاردان ايىعادى.

بىزدەر الدىمەن جەيتىن تاعامىمىزدىڭ پايدالى، ساۋ، تازا بولۋىن جانە ەڭ ماڭىزدىسى مولشەرىن قاداعالاۋىمىز كەرەك، ارتىق جەۋدەن ساقتانۋىمىز قاجەت.

اعزانى قالاي تازارتامىز؟

پاتشالىق پىستە. پاتشالىق پىستە (اراب تىلىندە «حابباتۋل مۋليۋك») - بۇل ىشەك-قارىن جولدارىن جانە بۇكىل اعزانى، جىلدار بويى جينالىپ، دەنەمىزدى لاستايتىن زيان زاتتاردان جاقسى ءارى جىلدام تازارتاتىن وسىمدىك قۇرالى. ءوزى كىشىگىرىم بۇرشاق نەمەسە كوفە ءدانى ىسپەتتەس. بۇل پاتشالىق پىستەنى يسلامي دۇكەندەردەن تابا الاسىز. ونى كوبىنە ەگيپەتتەن اكەلەدى.

ىشەك جۇمىستارى مەن ءى ق ج بۇزىلىپ، ۇنەمى اۋىرلىق پەن ءىش قاتۋ كەزىندە تاپتىرماس قۇرال. گاستريت جانە مەرەز كەزىندە ساقتىقپەن قولدانعان ابزال.

اعزاڭىز جەڭىل قورىتا الاتىن، جەڭىل ديەتالىق تاعامنان باستاڭىز (كوكەنىس، جەمىس، بوتقا).

پىستەنىڭ 1/4 بولىگىنەن كوپ قولدانباڭىز (ياعني ونى 4 بولىككە بولەسىز).

پىستەنى جۇكتى ايەلدەرگە جانە بالالارعا قولدانۋعا بولمايدى.

شوپتەر. تاڭەرتەڭ ءىش جۇرگىزەتىن - پىشتەن، يتجومىرت (1 اس قاسىعى 1 ستاقان قايناعان سۋعا) قايناتپالارىن قابىلداڭىز. كۇننىڭ العاشقى بولىگىندە 4-6 ستاقان جاڭا سىعىلعان كوكونىس ءنارسۋلارىن: ءسابىز، قىزىلشا مەن ءسابىز، قىزىلشا - ءسابىز - قيار (بارلىعى بىردەي مولشەردە ارالاستىرىلادى) ءىشىڭىز.

سونىمەن قاتار، تازارۋ كەزىندە زىعىر، اسقاباق داندەرىن، وسكىن، جاڭعاق جانە ساپالى مايلاردى (ءزايتۇن، كۇنجىت، زىعىر، اسقاباق جانە باسقا) قولدانعان ابزال.

ىشەكتى تازالاۋ. بارلىق بۇل جاعدايلاردى قاراپايىم سۋداعى زىعىر داندەرىمەن شەكتەتۋگە تۋرا كەلەدى: 1 شاي قاسىك زىعىر ءدانىن 1 ستاقان سۋعا قايناتىپ، سۋىتامىز. ەكى ساعاتتان كەيىن تۇندىرما دايىن بولادى، الايدا تەرموستا ءبىر كۇن بويى ۇستاعان ابزال. تۇندە جاتاردا 1 ستاقان سۇزىلمەگەن تۇندىرمانى دانىمەن ءىشۋ كەرەك. تۇندىرما 2-3 اپتا ىشىلەدى.

باۋىردى تازالاۋ. جارتى ليمون شىرىنى مەن جارتى گرەيپفرۋت ءنارسۋىن الىپ، 2 اس قاسىق ءزايتۋن مايىمەن ارالاستىرىڭىز. بۇل قوسپانى 5 كۇن بويىنا تاڭ ەرتەن اش قارىنعا، تاماقتان 1 ساعات الدىن ءىشۋ كەرەك. بۇل قۇرال ءوت تاستارىن جويىپ، ولاردى اعزادان شىعارۋعا كومەكتەسەدى. بۇل ءۇردىستىڭ جەڭىلدىگى ءۇشىن كۇن بويىنا يتمۇرىن قايناتپاسىن ءىشىڭىز.

بۇيرەكتەردى تازالاۋ.

ماۋسىم كەزىندە قاربىز، قيار، قاۋىندى جەڭىز.

بۇيرەكتەردى شىرىندارمەن تازالاۋدى دارىگەر ن. ۋوكەر ۇسىندى. ونىڭ ايتۋىنشا، نانداعى جانە باسقا دا كونتسەنترالعان كراحمالدى ونىمدەردەگى ورگانيكسىز زاتتار (نەگىزگىسى كالتسي) بۇيرەكتە دانەكتەردى قۇرايدى ەكەن. بۇيرەكتەردىڭ ساۋلىعى مەن تازالىعى ءۇشىن، ول كىسى مىنا شىرىندى ىشۋگە كەڭەس بەرەدى:

ءسابىز - 10 (بولىك)، قىزىلشا - 3، قيار - 3؛

بولماسا باسقا نۇسقاسى: ءسابىز - 9، بالدىركوك - 5، اقجەلكەن - 2.

قىزىلشا جانە قىرىققابات ءنارسۋى.  قىزىلشا اعزا تازالاۋشى ەڭ تاڭدالمالى ءونىم بولىپ تابىلادى. ول ازداپ ءىش ايدايتىن جانە نەسەپ ايدايتىن اسەرگە يە، اس قورىتۋدى جەڭىلدەتىپ، ىشەكتەردەن ۋلى زاتتاردى شىعارادى. جاڭا سىعىلعان قىزىلشا ءنارسۋىن ءىشىڭىز جانە دە قىزىلشانى سورپالارعا جانە سالاتتارعا قوسۋدى ۇمىتپاڭىز. ءى ق ج جانە باۋىرى اۋىراتىن ادامدارعا قىزىلشا ءنارسۋىن قولدانۋعا بولمايدى.

قىرىققابات ءنارسۋىنىڭ قۇرامىندا كۇكىرت پەن يود بار، ول ەكەۋى قوسارلاسىپ، اس قورىتۋ مۇشەلەرىنىڭ شىرىشتى قابىقتارىن تازارتادى. سونىمەن قاتار، قىرىققابات ءنارسۋى اقۋىز بەن كالتسيدىڭ قالىپتاسۋىنا كومەكتەسىپ، جۇيكە جۇيەسىنىڭ جۇمىسىنا وڭ اسەرىن تيگىزەدى.

ءيتمۇرىن شايى. ءيتمۇرىن جەمىسىن ۇساقتاپ، 2 اس قاسىق ۇساقتالعان ءيتمۇرىندى 2 ستاقان قايناعان سۋعا تەرموسقا تۇندىراسىز. 10 ساعاتقا قوياسىز. ءسۇزىپ الىڭىز. كۇنىنە تاماققا 30 مينۋد قالعاندا 0.5 ستاقانمەن 2-3 رەت قابىلداڭىز. دايىندالعان شايدى 2 تاۋلىكتەن ارتىق ساقتاماڭىز.

ساپالى تۇردەگى اعزانى تازارتۋ كەزىندە، اعزاعا زيان بولاتىن نارسەنىڭ تۇسپەۋىن جانە تۇسكەن نارسەنىڭ اعزادان شىعۋىن قاداعالاۋ كەرەك جانە اعزانى قاجەت بولعان زاتتارمەن جانە اعزاعا جەتىسپەيتىن (دارۋمەندەر، مينەرالدار جانە ت. ب.) نارسەلەرمەن بايىتۋ قاجەت.

سونىمەن قاتار، اس ۇلەسىڭىزگە قىشقىل ءسۇت ونىمدەرىن دە قوسۋدى ەستەن شىعارماڭىز. كۇنىنە 2 ليتر سۋ ءىشۋ قاجەت جانە جوق دەگەندە ايىنا جەڭىل تاماق جەيتىن كۇن جاساپ تۇرىڭىز.

اقپارات ينتەرنەتتەن الىندى.