الماتىدا «بابالار اڭساعان تاۋەلسىزدىك» اتتى سۋرەت بايقاۋى باستالدى
بۇل تۋرالى egemen.kz حابارلادى.
بايقاۋ قازاقستان رەسپۋبليكاسى تاۋەلسىزدىگىنىڭ 25 جىلدىعىنا ارنالعان جانە «ماڭگىلىك ەل» ۇلتتىق يدەياسى قۇندىلىقتارىنا سايكەس ءبىرتۇتاس مادەني كەڭىستىك قالىپتاستىرۋعا باعىتتالعان.
بايقاۋ سۋرەتشىلەرگە قازاقستان مادەنيەتى مەن قازاقستان بەينەلەۋ ونەرىنىڭ تاريحىنا ءوزىنىڭ جەكە سالماقتى ۇلەسىن قوسۋىنا جانە ونەردىڭ جەتەكشى جانرلارىندا كەسكىندەمە مەن ءمۇسىننىڭ قانات جايۋىنا ىقپالىن تيگىزەدى. سونداي-اق، كەلەر ۇرپاققا ەلىمىزدىڭ باستى كوركەمدىك ورداسىندا ماڭگىلىك ساقتالاتىن، كورنەكتى تۋىندى قالدىرۋىنا زور مۇمكىندىك اشىپ بەردى.
مادەني شارانىڭ ماقساتى مەن مىندەتتەرى - مەملەكەتىمىزدىڭ ماڭىزدى تاريحي وقيعالارى مەن تۇلعالارىن كوركەمدىك- بەينەلىك كورىنىستەردى زەردەلەۋ جانە ولاردى بەرۋ تاسىلدەرى ارقىلى پاتريوتتىق تاربيەگە ىقپال ەتۋ. سۋرەتشىلەر اراسىندا باسەكە تۋدىرىپ، بەينەلەۋ ونەرى شەبەرلەرىنىڭ كاسىبي كوركەمدىك دەڭگەيىن كوتەرىپ، جەتىلدىرۋ جانە الەم ونەرى تاريحىنداعى ماڭىزدى جانرلاردىڭ ءبىرى تاريحي جانردىڭ ودان ءارى دامۋىنا قوزعاۋ سالۋ.
بايقاۋ شارتىن باسپا ءسوز كونفەرەنتسياسىندا ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۇراجايىنىڭ ديرەكتورى، پروفەسسور گ. ك. شالابيەۆا تانىستىرادى. ول شارت ءابىلحان قاستەيەۆ اتىنداعى مۇراجايدىڭ سايتى مەن الەۋمەتتىك جەلىلەردە قوسىمشا جاريالانادى.
بايقاۋ 2016 -جىلدىڭ 15 -جەلتوقساندا ءابىلحان قاستەيەۆ اتىنداعى قازاقستان رەسپۋبليكاسىنىڭ مەملەكەتتىك ونەر مۇراجايىنىڭ زالدارىندا قازاقستان تاۋەلسىزدىگىنىڭ 25 جىلدىعىنا ارنالعان كورمەمەن اياقتالادى.
