قازاقستاندىق دزيۋدوشى قىز پاريجدە وتكەن جارىستا التىن الدى

استانا. قازاقپارات - موڭعوليادان قازاقستان قۇراماسىنا اۋىسقان گالبادراح وتگونسەگسەگ پاريجدە ءوتىپ جاتقان گراند سلام جارىسىندا التىن الدى، دەپ حابارلايدى الامان پورتالى.

ول فينالعا دەيىن تۋنيستىك ولفا ساۋوديدى، جاپونيالىق امي كوندونى، كۋبالىق داياريس الۆارەستى جەڭدى. ال جارتىلاي فينالدا بەلگيالىق چارلين ۆان سنيكتەن باسىم ءتۇستى.

فينالدا گالبادراح وتگونسەگسەگ بۇرىنعى كوماندالاسى موڭعوليا قۇراماسىنىڭ مۇشەسى مۋنحبات ۋرانسەسەگتى يۋكو ادىسىمەن جەڭدى. ەكى سپورتشى وسىعان دەيىن ءۇش رەت كەزدەسىپ، بارلىعىندا مۋنحبات جەڭىسكە جەتكەن ەدى.

بۇل - گالبادراح وتگونسەگسەگتىڭ گراند سلام جارىستارىنداعى العاشقى التىنى. ول وسىعان دەيىن دجەدجۋدە وتكەن گران-پري جارىسىندا التىن، تاشكەنت پەن سينباوداعى سىندا قولا العان.

پاريجدەگى جەڭىسى ءۇشىن گالبادراح وتگونسەگسەگ رەيتينگىنە 500 ۇپاي قوستى. ول ەندى 23-ورىننان 16-ورىنعا كوتەرىلەدى.