الماتى وبلىسىندا الما باقتارىنىڭ اۋقىمى كەڭەيىپ كەلەدى - فوتو
بۇل تۋرالى الماتى وبلىسىنىڭ اكىمى اماندىق باتالوۆتىڭ 5- اقپان كۇنى پانفيلوۆ اۋدانىنا جاساعان جۇمىس ساپارىندا بەلگىلى بولدى، دەپ حابارلايدى الماتى وبلىسى اكىمىنىڭ باسپا ءسوز قىزمەتى.
وبلىس اكىمى باق ءوسىرۋ ءىسىن دامىتۋعا ايتارلىقتاي ۇلەس قوسىپ وتىرعان «جاركەنت فرۋكت» ج ش س- نىڭ باعىندا بولىپ، جۇمىسىمەن تانىستى. ارالاۋ بارىسىندا وبلىس باسشىسى باستاعان دەلەگاتسيا المانىڭ جاس كوشەتتەرىن وتىرعىزدى.
باقتى ءوسىرۋ ءۇشىن جالپى كولەمى 1117 گەكتار جەر بولىنگەن. مۇندا المادان بولەك، 370 گەكتارعا - شيە، 61 گەكتارعا شابدالى، 32 گەكتار جەرگە ورىك ەگىلدى.
مامانداردىڭ ايتۋىنشا، جوبا ىسكە قوسىلعاندا 500 ادامعا تۇراقتى جۇمىس ورنى اشىلىپ، 1000 ادامعا ماۋسىمدىق جۇمىس بەرىلەدى. بۇگىنگى كۇنگە اۋىل شارۋاشىلىعىنا ارنالعان ءارتۇرلى 50 تەحنيكا ساتىپ الىنعان. الداعى جىلداردا قوسىمشا ينۆەستيتسيا تارتىلىپ، 20 مىڭ توننالىق جەمىس-جيدەك ساقتايتىن قويما قۇرىلىسىن سالۋ كوزدەلىپ وتىر.
- مەملەكەت باسشىسىنىڭ الدىمىزعا قويعان مىندەتتەرىنىڭ ءبىرى - الما باقتارىن قالپىنا كەلتىرۋ جانە دامىتۋ ءىسى بولاتىن. وسى تاپسىرماعا وراي اتقارىلىپ جاتقان شارالاردىڭ بىرىنە كۋا بولدىق. ينۆەستيتسيا تارتۋ ارقىلى جاڭا تەحنولوگيامەن جۇمىس ىستەيتىن وسىنداي زاماناۋي باقتاردى دامىتۋعا ءبىز مەملەكەت تاراپىنان تيىسىنشە قاجەتتى قولداۋلار كورسەتەتىن بولامىز، - دەدى ا. باتالوۆ.
ساپار بارىسىندا دەلەگاتسيا «بايسەركە اگرو» ج ش س- نىڭ «كيباناگرو» جىلىجايىنا باردى. 4 گەكتار جىلىجايدا جىلىنا مىڭ توننادان استام قىزاناق وسىرۋگە مۇمكىندىك جاسالعان. سونىمەن قاتار سەرىكتەستىك قۇلپىناي وسىرۋگە دەن قويىپ، ول ءۇشىن ارنايى 1 گەكتارلىق جىلىجاي سالعان.
60 جۇمىس ورنىن اشقان جىلىجاي جوباسىنىڭ جالپى قۇنى 1,9 ميلليارد تەڭگەنى قۇرايدى.
وبلىس اكىمى جۇمىس ساپارى بارىسىندا پانفيلوۆ اۋدانىنىڭ اكىمى ب. ابدۋلدايەۆتىڭ ەسەپ بەرۋ جيىنىنا قاتىستى.
