فۋتزال: قازاقستان قۇراماسى ەۋروپا چەمپيوناتىندا العاشقى تاريحي جەڭىسىنە قول جەتكىزدى
«قازاقستان» تەلەارناسىنان كورسەتكەنىندەي، ءبىرىنشى تايمدا 6-مينۋتتا قازاقستان قۇراماسىنان دۋگلاس مەرگەندىك تانىتىپ، ەسەپ اشتى. دەگەنمەن ءبىر مينۋتتان كەيىن قازاقستان قۇراماسىنىڭ كاپيتانى دىنمۇحامبەت سۇلەيمەنوۆتىڭ قاتەلىگىنەن كەيىن حورۆاتتار (ۆەدران ماتوشيەۆيچ) تارازى باسىن تەڭەستىردى. ىلە-شالا د. سۇلەيمەنوۆ حورۆاتتاردىڭ ويىنشىسىن ادەمى الداپ ءوتىپ، ەسەپتى 2:1 گە جەتكىزدى. 17-مينۋتتا سەرىك جامانقۇلوۆ قارسىلاستار قاقپاسىن ءدال كوزدەدى.
ەكىنشى تايمدا س. جامانقۇلوۆ ءوزىنىڭ ەكىنشى گولىن سالدى. بۇدان كەيىن حورۆاتتار قاقپاشىسىن الاڭداعى ويىنشىعا اۋىستىرىپ، شابۋىلداۋعا تىرىسىپ باقتى. ولاردىڭ بۇل تاكتيكاسى ءبىر رەت قانا جەمىسىن بەرىپ، سۋتون ەسەپتى 4:2 گە قىسقارتتى. وسىدان سوڭ س. جامانقۇلوۆتىڭ دا، شىڭعىس ەسەنامانوۆتىڭ دا گول سوعاتىنداي مۇمكىندىكتەرى بولدى.
ءسويتىپ قازاقستان قۇراماسى ەۋروپا چەمپيوناتىنداعى العاشقى دا ماڭىزدى جەڭىسىنە قول جەتكىزدى. س توبىندا ەندى ءبىر عانا ويىن قالدى. 7- اقپان كۇنى رەسەي مەن حورۆاتيا سوڭعى كەزدەسۋىن وتكىزىپ، وسى توپتان پلەي-وفقا جولداما العان قوس كوماندا بەلگىلى بولادى.
ەسكە سالا كەتەيىك، بۇدان بۇرىن كاكاۋدىڭ شاكىرتتەرى رەسەيلىكتەرگە 1:2 ەسەبىمەن ەسە جىبەرگەن بولاتىن.
اۆتور: ەلجان ەرالى
