كولىك قۇرالدارى قاۋىپسىزدىگىن قامتاماسىز ەتۋدىڭ ماڭىزى زور - فوتو

ورال. قازاقپارات - قازىرگى زامانعى تالاپتارعا سايكەس كولىك قۇرالدارى قاۋىپسىزدىگىن قامتاماسىز ەتۋدىڭ ماڭىزى زور.

بۇل تۋرالى باتىس قازاقستان وبلىسى اكىمىنىڭ ورىنباسارى يگور ستەكسوۆتىڭ ءتوراعالىق ەتۋىمەن تەحنيكالىق رەتتەۋ ماسەلەلەرى تالقىلانعان وڭىرلىك شتابتىڭ كەڭەيتىلگەن وتىرىسىندا ايتىلدى.

ق ر ينۆەستيتسيالار جانە دامۋ مينيسترلىگى تەحنيكالىق رەتتەۋ جانە مەترولوگيا كوميتەتىنىڭ ءتوراعاسى ءبىرجان قانەشەۆ باستاعان جۇمىس توبى قاتىسقان وتىرىستا «قازاقستان ستاندارتتاۋ جانە سەرتيفيكاتتاۋ ينستيتۋتى» ر م ك تەحنيكالىق حاتشىلىق ءبولىمىنىڭ باسشىسى اقىلبەك تەڭىزبايەۆتىڭ ءمالىم ەتكەنىندەي، 2015 -جىلدىڭ 1 -قاڭتارىنان باستاپ كۇشىنە ەنگەن «دوڭگەلەكتى كولىك قۇرالدارىنىڭ قاۋىپسىزدىگى تۋرالى» كەدەن وداعىنىڭ تەحنيكالىق رەگلامەنتىنە سايكەس ەۋرازيالىق ەكونوميكالىق وداق اۋماعىندا بۇرىن قولدانىستا بولعان كولىك قۇرالدارىنىڭ قاۋىپسىزدىك ماسەلەلەرى كولىك قۇرالدارىن تەحنيكالىق تەكسەرۋ تۋرالى ۇلتتىق زاڭنامامەن رەتتەلەدى. تەحرەگلامەنت بويىنشا ءبىرىڭعاي ەكونوميكالىق كەڭىستىك پەن كەدەندىك وداققا مۇشە مەملەكەتتەر نارىعىندا ونىمدەردى ءبىرىڭعاي اينالىم بەلگىسىمەن ماركالاۋعا قويىلاتىن تالاپتار، كولىك قۇرالدارى تۇرلەرىنىڭ سايكەستىگىن باعالاۋ ۇردىستەرى، قاۋىپسىزدىك تالاپتارى، دوڭگەلەكتى كولىك قۇرالدارىن نارىقتا پايدالانۋعا بەرۋ نەمەسە ولاردىڭ اينالىمى ەرەجەلەرى بەكىتىلگەن.

سوندىقتان باستاپقى كەزەڭدە بەلارۋس جانە رەسەيدىڭ سىناق بازالارىن پايدالانۋ ارقىلى شەشۋ كوزدەلگەن. الداعى ۋاقىتتا ەلىمىزدە مەملەكەتتىك- جەكە ارىپتەستىك قاعيداتتارى بويىنشا دوڭگەلەكتى كولىك قۇرالدارىنىڭ سىناق پوليگوندارى بار تەحنيكالىق ورتالىقتار قۇرۋ كوزدەلۋدە. شاعىن سۋ كەمەلەرىنىڭ قاۋىپسىزدىگىن ساقتاۋ بويىنشا دا تەحنيكالىق رەتتەۋ تالاپتارى قولدانىلماقشى.

جيىندا سونداي-اق مۇناي ونىمدەرىن وندىرۋشىلەردىڭ وندىرىستىك نىساندارىنداعى سىيىمدىلىقتاردى جابدىقتاۋ، مۇناي ونىمدەرىن ساقتاۋ بازالارىنداعى جانە جانار- جاعارماي قۇيۋ ستانسالارىن (جىلجىمالى ۇلگىدەگى جانارماي قۇيۋ ستانسالارىنان باسقا) ەسەپكە الاتىن باقىلاۋ اسپاپتارىمەن جاراقتاندىرۋ تالاپتارى ءتۇسىندىرىلدى. ق ر ۇكىمەتىنىڭ وتكەن جىلعى 27 -ماۋسىمداعى №484 قاۋلىسىنا ساي اتالمىش نىساندارداعى باقىلاۋ قۇرالدارىن زاڭدىلىققا سايكەستەندىرىپ، بىرىزدەندىرۋ ماسەلەسىن جۇزەگە اسىرۋ جايى پىسىقتالدى.

جۇمىس توبى مۇشەلەرى ساپار بارىسىندا يندۋستريالاندىرۋ كارتاسى اياسىندا جۇمىستانىپ جاتقان «ورال ترانسفورماتور زاۋىتى» جانە «باتىس پاۋەر» ج ش س- نىڭ تىنىس-تىرشىلىگىمەن تانىستى.

 

اۆتور: ەلجان ەرالى