ەركەكتەرگە وسى نە جەتپەيدى؟
مەن وڭتۇستىكتىڭ قىزىمىن 2 جوعارعى وقۋ ورنىن ءبىتىرىپ، جۇمىس ىستەپ، 25 جاسىمدا باتىسقا كەلىن اتاندىم. مىنە، وتاۋ قۇرعانىمىزعا 3 جىلعا قارادى، اللاعا شۇكىر، 2 جاسار ۇلىمىز بار.
سىزدەرگە ايتپاعىم، مەنىن جولداسىمنىڭ قىلىقتارى. ۇيلەنگەلى ءبىر تاۋسىلمايتىن قىدىرىس. مىنەزى وتە اۋىر، اداممەن اشىلىپ سويلەسپەيدى دە. باسىندا قويار دەپ ءمان بەرمەي جۇرگەم، ۋاقىت وتە كەلە قينالىپ كەتتىم. ۇيگە قونباستان جۇرە بەرەدى. مەن ۇيدە بالامەن سونى كۇتۋمەن وتىرامىن. ۇيدەگى جاعدايعا كەلسەك، ءۇيىمىز بار، ەنەممەن بىرگە تۇرامىز، اتامىزقايتىس بولعان. مەن ۇيدەن تاماقتار ءپىسىرىپ، دۇكەندەرگە وتكىزەمىن جانە سۇلۋلىق كۋرستارىن ءبىتىرىپ الىپ، ۇيدە جۇمىس ىستەپ ءجۇرمىن. ءىس تىگەتىن دە كەزدەرىم بار. اپتا سايىن فيتنەس زالعا دا بارامىن. ءوز- وزىمە كوڭىل بولمەگەن كەزىم بولماعان. ەنەممەن ارامىز جاقسى.
كۇيەۋىم تەك قىدىرعاندى جاقسى كورەدى، تەلەفونىن ءوشىرىپ تاستايدى دا جۇرە بەرەدى. ماعان دا، بالاسىنا دا نازار اۋدارمايدى. كەشكە دەيىن ساندەنىپ كۇتىپ جۇرەسىڭ، ال ول بولسا ءبىر جىلى ءسوز ايتپايدى. سويلەسەيىك، قىدىرايىق دەسەم شارشاپ جاتىرمىن دەپ قاسىنا جولاتپايدى. مەن جالعىزدىقتان قاجىدىم، بۇل قالادا ءبىر جاقىنىم جوق شەرىمدى تارقاتاتىن. بار تاپقان اقشاسىن دالاعا شاشىپ كەلەدى، ماعان اقشا دا بەرمەيدى ءوزىڭ تاۋىپ جاتسىڭ عوي دەپ. كۇندە كەشكە ەسىككە قاراپ تەلمىرىپ وتىرامىز، ول كەلسە كەلدى، كەلمەسە ەرتەڭىنە ءبىر كەلەدى. ءبىر رەتتە ۇيىمە كەتىپ قالعان ەمەسپىن، ارامىز سۋىپ كەتەر دەپ شىداپ كەلەم. ەشقايدا اپارمايدى، نە ەشقايدا شىعارمايدى. ەركەكتى الداپ سويلەۋ كەرەك دەگەنگە تەك كۇلىپ سويلەۋگە تىرىسام، ءبىراق ءبىر قاباعى اشىلمايدى.
بارلىق جاعدايىن جاسايمىن، ارتىق سويلەي المايمىن، بىردەڭە دەسەم ۇرىپ جىبەرەدى دە، دالاعا قاراي قاشا جونەلەدى. ەكى كۇننىڭ بىرىندە ىشەدى دە جۇرەدى. ماعان نە قويار كىناڭ بار دەسەم، ەشقانداي ءبىراق مەن قىدىرۋىمدى، ءىشۋىمدى قويا المايمىن دەيدى. شىنىمدى ايتسام، ايەل بولعاسىن ەرىڭنەن جىلۋلىقتى كۇتەدى ەكەنسىڭ، ال مەن كۇندە كەشكە جىلاۋمەن وتكىزەم. جۇيكەم جۇقارعان. بالام بار سوعان شۇكىرشىلىك ەتەم. جاس كەزىمىزدە مىنداي بولىپ جاتىر، ەرتەڭ قارتايعاندا قالاي بولار ەكەن دەگەن سۇراق مازالايدى. جان جارىڭمەن قول ۇستاسىپ بىرگە جۇرمەگەسىن، نە ءبىر جىلى ءسوز ەستىمەگەسىن ونىڭ نەسى جانۇيا؟ مىنە، بۇگىن دە جوق، تەلەفونىن كوتەرمەيدى. جىلاپ، جىلاپ بالامنىڭ دا مازاسى كەتەدى. نەگىزى جانۇياداعى نارسەنى ايتۋعا بولمايدى دەيدى عوي ، ءبىراق مەنىڭ ىشىمە سيار ەمەس.
ۇيدەگى جاعدايدى ءوز اتا-اناما دا ايتا المايمىن، ۋايىمعا سالعىم كەلمەيدى. ءوزىم جىلىنا ءبىر رەت قانا بارا الام تۋعان جەرىمە. سىزدەر قالاي ويلايسىزدار؟ مۇنداي جاعداي سىزدەردىڭ باستارىنىزدان وتپەدى مە؟ قالاي كۇرەسۋگە بولادى. ءوزىمدى كەرەمەتپىن دەپ ايتپايمىن، مەنىڭ دە كەمدەۋ جەرىم بار شىعار، تەك ءبىر ماقتاناتىنىم وسىنىڭ بارلىعىنا ءتوزىپ، شاڭىراعىمدى شايقالتپاي وتىرعانىم. تالاي قىزدارمەن دە ۇستاعان كەزىم بولدى. كەشىردىم. بالامدى قالاي اكەسىز وسىرۋدەن قورقامىن. اينالىسىپ وتىرعان كاسىبىم دە، كولىگىم دە بار، ءبىراق كۇيەۋىمدى قيمايمىن.
Alashainasy.kz
