الەۋمەتتىك جەلىدەگى ەڭ باي بالالار تىزىمىنە ەنگەن قازاق بالاسى - فوتو، كەسكىن
فيلمدە جەلى ارقىلى تانىمال بولعان ادامدار جايلى باياندالادى.
Instagram-داعى ەڭ باي جاستاردى كورسەتۋگە تىرىسقان دەرەكتى فيلمدە جەرلەسىمىز ءوزىنىڭ دۇنيەسىن اشىق كورسەتەدى.
ول الدىمەن ءوزىنىڭ قىمبات ساعاتتارىن كورسەتىپ، ءتىپتى سوفي ەسىمدى يتىمەن دە تانىستىرادى.
فيلمنەن الماتىلىقتىڭ ۇيىندە دجاكۋزيدەن باستاپ بارلىق يگىلىكتەر بارى، ال ەدەنىندە جولبارىستىڭ تەرىسى جايىلعانىن كورۋگە بولادى. ديماش دوسى اسقارمەن بىرگە شەتەلدىك ءتۇسىرۋشى توپتى شىمبۇلاققا ەرتىپ اپاردى.
سول جەردە 24 مىڭ جازىلۋشىسىنا ارنايى فوتوعا تۇسەتىن قالتالى جىگىت ءبىر مەزەتتە مىڭداعان اداممەن الەۋمەتتىك جەلى ارقىلى بايلانىسقا شىعۋدان ءلاززات الاتىنىن جاسىرمادى.
فيلمدە الماتىلىقتان وزگە سۋپەرياحتالاردا سەلفيگە ءتۇسىپ، اقشا تولى ۆانناعا شومىلاتىنىمەن ماقتاناتىن وزگە ەلدىڭ جاستارى دا بارشىلىق. ماسەلەن، موناكوداعى 20 جاسار لانا ەسىمدى قالتالى بويجەتكەن كەي كەزدەرى ءىشى پىسسا تىكۇشاققا وتىرىپ قىدىرعاندى ۇناتادى ەكەن. ديماش Instagram-عا وسىدان 4 جىل بۇرىن تىركەلگەن. باستاپقىدا كۇندەلىكتى سۋرەتتەرىن جۇكتەپ، ومىرىندەگى قىزىقتار مەن العان اسەرلەرىن ورتاعا سالىپ وتىرعان. ۋاقىت وتكەن سايىن جازىلۋشىلارى كوبەيىپ، تانىمالدىعى ارتا تۇسەدى. «تانىمال بولۋدى مۇلدەم ويلاعان جوقپىن. «كوپپەن كورگەن - ۇلى توي» دەمەكشى، ەلمەن بىرگە تىركەلدىم. ال پاراقشاما جازىلۋشىلاردىڭ سانى ارتقان كەزدە جەلىنى مۇلدەم باسقا ماقساتتاردا پايدالانۋعا بولاتىنىن ءتۇسىنىپ، بەلسەندىلىك تانىتتىم. اتاپ ايتقاندا، جارتى جىل بۇرىن جازبالارىمنىڭ فورماتىن وزگەرتتىم. ەندى تەك سۋرەتتەر عانا ەمەس، ءار ءتۇرلى تاقىرىپتا شاعىن اڭگىمەلەر جازىپ، جاريالاي باستادىم. ناتيجەسىندە، وقىرماندارىمنىڭ سانى بۇرىنعىدان دا ەسەلەنە ءتۇستى»، - دەيدى ديماش. بۇگىندە ول شۆەيتساريادا ءبىلىم الىپ ءجۇر. سوندىقتان وعان جازىلۋشىلاردىڭ قاتارىندا اعىلشىن تىلدىلەر وتە كوپ. سونى ەسكەرىپ ءوزى دە جازبالارىن ورىس جانە اعىلشىن تىلدەرىندە جاريالايدى.
