د. نازاربايەۆا: ءبىلىم بەرۋ جۇيەسىندەگى بىتپەيتىن تەكسەرۋلەر مەن مينيسترلىكتىڭ مىڭ توننا قۇجاتى تۋرالى ايتتى

استانا. قازاقپارات - ەگەر ءبىلىم بەرۋ جۇيەسىن تولىق اقپاراتتاندىرىپ الساق، ءبىلىم جانە عىلىم مينيسترلىگىنىڭ تاۋسىلىپ بىتپەيتىن ەسەپتەرى جويىلار ەدى، بىتپەيتىن تەكسەرۋلەرى توقتاپ، مىڭ توننا قۇجاتتى ارى- بەرى تاسىمايتىن ەدىك، - دەيدى بىلىم جانە عىلىم مينيسترلىگىنىڭ كەڭەيتىلگەن القا وتىرىسىنا قاتىسقان ق ر پرەمەر-ءمينيسترىنىڭ ورىنباسارى داريعا نازاربايەۆا.

 «ءبىز ءتورتىنشى - يندۋستريالىق رەۆوليۋتسيا، جەدەل اقپاراتتاندىرۋ تۋرالى ايتىپ ءجۇرمىز. بۇلارسىز قازىر ەشبىر ەل اياق اتتاپ باسا المايدى. وكىنىشكە قاراي، قازاقستان بۇكىل جۇيەنى، دەنساۋلىق ساقتاۋ جۇيەسىن دە، ءبىلىم بەرۋ جۇيەسىن دە، مەملەكەتتىك باسقارۋ جۇيەسىن دە اقپاراتتاندىرۋدا تىم ارتتا كەلە جاتىر. سوندىقتان، قارقىندى دامىپ، اقپاراتتاندىرۋ كوشىنە ىلەسۋىمىز كەرەك. قازىر بىزگە مىقتى IT- ماماندار كەرەك. جۋىردا عانا، وسى اپتانىڭ باسىندا مەن ماسكەۋگە بارعان ەدىم. ماسكەۋ - ءبىلىم سالاسىندا كوپ جاڭالىق اشىپ وتىرعان قالا. سوندا مەن روبوت قۇراستىرا الاتىن، عالامتوردا پروگراممانى مودەلدەي الاتىن ءبىرىنشى سىنىپ وقۋشىلارىن كوردىم. ءتىپتى فانتاستيكا دەرسىز. ءبىراق، بالانىڭ ءبارى بىردەي ەمەس پە!؟»، - دەگەن د. نازاربايەۆا كىنارات ءبىزدىڭ ءبىلىم بەرۋ جۇيەسىندەگى ولقىلىقتاردا دەپ اتاپ ءوتتى.

«ياعني، ايىرماشىلىق - ءبىلىم بەرۋ جۇيەسىندە، وقىتۋدىڭ ءادىس- تاسىلىندە جاتىر. وزدەرىڭىز ەلەستەتىپ كورىڭىزدەرشى، ەگەر ءبىلىم جۇيەسىن تولىق اقپاراتتاندىرىپ الساق، ءبىلىم جانە عىلىم مينيسترلىگىنىڭ تاۋسىلىپ بىتپەيتىن ەسەپتەرى جويىلار ەدى، اياقتالمايتىن تەكسەرۋلەرى توقتاپ، مىڭ توننا قۇجاتتى ارى-بەرى تاسىمالدامايتىن ەدىك. قازىر سول مىڭ توننا قۇجاتتى بىرەۋ كەرەك قىلىپ وقيدى دەگەنگە كۇمانىم بار. ياعني، بۇكىل اقپاراتىمىز جەلىدە بولادى، ءبىر جۇيەدە بولادى. وسىلاي جۇمىس ىستەۋ الدەقايدا جەڭىل ەمەس پە!؟»، - دەدى د. نازاربايەۆا.

اۆتور: كەنجەكەي توقتامۇرات قىزى