موڭعوليانىڭ تەلەارناسىندا بۇگىن تىكەلەي ەفيردە اقىنداردىڭ «جەكپە- جەك» ايتىسى وتەدى
بۇل شاراعا موڭعوليا جۋرناليستەرى بىرىككەن وداعىنىڭ بايان-ولگي ايماعىنداعى بولىمشەسى قولداۋ كورسەتىپ وتىر، دەپ حابارلايدى azaq-alemi.kz.
موڭعوليا جۋرناليستەرى بىرىككەن وداعىنىڭ بايان- ولگي ايماعىنداعى بولىمشەسىنىڭ باسشىسى ومىربەك بيقۇماردىڭ سوزىنە قاراعاندا، «جەكپە- جەكتىڭ» العاشقى جۇبىندا ۋلاانحۋس سۇمىنىنان حالىقارالىق اقىندار ايتىسىنىڭ جۇلدەگەرى سۇيەنىش جەڭسىكباي ۇلى مەن التاي سۇمىنىنىڭ تۋماسى ەرلان داۋلەت ۇلى باق سىنايدى.
«ايتىس ونەرىنىڭ ورەسىن كوتەرۋ، ايماق اقىندارىنىڭ ونەرىن شىڭداۋ، حالىقارالىق ايتىستارعا قاتىستىرۋ ماقساتىندا جۇرىلگەلى وتىرعان بۇل سايىستا جەڭۋ، جەڭىلۋ باستى ماقسات بولمايدى. جەكپە- جەك ايتىستىڭ قورىتىندىسى بويىنشا اقىنداردىڭ دارەجەسىن انىقتاپ، 10 اقىندى قىركۇيەك ايىندا وتەتىن «موڭعوليا قازاقتارىنىڭ تىرلىگى مەن بىرلىگى» اتتى حالىقارالىق اقىندار سايىسىنا قوسامىز. حالىقارالىق ايتىسقا قازاقستان، رەسەي، قىتاي ەلدەرىنەن بەلدى اقىنداردى شاقىرۋدى جوسپارلاپ وتىرمىز»، - دەيدى ب. ومىربەك.
