قازاقستاندا ىسىراپشىلدىققا قاتىستى الەۋمەتتىك روليك ءتۇسىرىلدى - كەسكىن

الماتى. قازاقپارات - الەۋمەتتىك جەلىدە ىسىراپشىلدىقپەن ماقتانۋعا قۇمار ادامداردى ءاجۋالايتىن الەۋمەتتىك روليك پايدا بولدى.

ءبىر مينۋتتىق روليك «قازاقستاندىقتاردىڭ ۇنەمشىلدىككە كوزقاراسى» دەپ اتالادى. وندا وتانداستارىمىزدىڭ ۇنەمشىلدىككە بەيىم ەمەس ەكەندىگى كورسەتىلگەن. ياعني، داعدارىسقا قاراماستان ولار شاشىلىپ توي جاساۋعا، قىمبات باعالى كيىمدەر، بۇيىمدار الۋعا قۇمار. ءتىپتى سول ءۇشىن نەسيە الۋعا دا دايىن.

مۋلتفيلمنىڭ اۆتورلارى - الماتىلىق سۋرەتشىلەر، انيماتورلار مۋزىكانتتار توبى. توپ مۇشەلەرى قازاقستاندىقتاردىڭ اقشانى قايدا جۇمسايتىندىعىن ءبىلۋ ءۇشىن الدىمەن وزدەرىنىڭ ورىنسىز شىعىندارىن ەسەپتەپ كورگەن.

«گەرمانيادان كەلگەن دوسىمىز قازاقستاندىقتاردىڭ جالاقىنىڭ ازدىعىنا قاراماستان ءسان- سالتاناتقا، قىمبات بۇيىمدار ساتىپ الۋعا، ۇلكەن توي جاساۋعا قۇمار ەكەندىگىن كورىپ تاڭ قالدى. ول ءوزى قاراپايىم ءومىر سۇرەدى. ەكىنشى جوعارى ءبىلىم الۋعا قۇشتار»، - دەدى جوبا رەجيسسەرى دميتري شەگوليحين.

بۇل مۋلت فيلم قازاقستاندىقتاردى اقشانى ۇنەمدەۋگە، قارىزدانىپ ۇلان-اسىر توي جاساماۋعا شاقىرادى.

ءبىر تاۋلىككە جەتەر- جەتپەس ۋاقىت ىشىندە روليكتى 60 مىڭنان استام ادام كورگەن. دەگەنمەن، ينتەرنەت پايدالانۋشىلارىنىڭ ءبىر بولىگى مۋلتفيليمنىڭ ماڭىزدى تاقىرىپتى كوتەرگەندىگىن جانە جاقسى ازىلمەن جاسالعاندىعىن ايتسا، قالعانى بولىگى «تىم اسىرا سىلتەپ جىبەرگەن» دەيدى.

روليك اۆتورلارىنىڭ ايتۋىنشا، روليككە رەنجۋدىڭ قاجەتى جوق. ونى ءتۇسىنۋ كەرەك.

«ۇنەمشىل بولۋعا ۇيرەنەتىن ۋاقىت كەلدى. دامىعان ەلدەردە بۇل قالىپتى جاعداي. ال بىزدە «كەدەيشىلىكتىڭ» بەلگىسى دەپ قابىلدانادى. ەگەر بۇل روليك ادامدارعا وي سالسا، ءبىزدىڭ ماقساتىمىزدىڭ ورىندالعانى»، - دەدى ءوز كەزەگىندە يدەيا جانە روليكتە ايتىلعان سوزدەردىڭ اۆتورى تيمۋر شايتقاليەۆ.

 

اۆتور: جاپپاربەرگەن ايبوتا