قىتايدا قايىرشى قوقىس اراسىنان تاۋىپ العان ءسابيدى اسىراپ، سول ءۇشىن ءومىر سۇرۋدە - فوتو

استانا. قازاقپارات - بۇل وقيعا قىتايدا بولعان. قايىرشى قوقىس تاستالعان جاشىكتەردى اقتارىپ، بوس بوتەلكەلەر ىزدەيدى.

ول ادەتتە قالدىق شىنىلاردى وتكىزىپ، تۇسكەن اقشاسىنا نان ساتىپ الاتىن. كەنەت ول قوقىس جاشىگىنەن جىلاعان ءسابيدىڭ داۋىسىن ەستيدى.

بۇل تۋرالى pyatimenutka.ru سايتى حابارلايدى.

قالدىقتاردىڭ اراسىنان ول جاڭا تۋىلعان نارەستەنى شىعارىپ الادى. ول ايقايلاپ جىلاپ جاتقان. ءسابي تۋعان جىلى مەن كۇنى جازىلعان جامىلعىعا وراۋلى بولعان.

ەگەر بۇل ءۇي-كۇيى جوق قايىرشى بولماعاندا، قىز ءولىپ تە قالار ەدى. ول ءسابيدى ايەلىمەن بىرگە تۇرعان لاشىعىنا الىپ كەلەدى. ەر كىسى ءوزىنىڭ الدىنا قىزدى تاربيەلەپ، وعان ادامگەرشىلىك پەن قايىرىمدىلىقتى ۇيرەتىپ، ادام ەتىپ شىعارۋ ماقساتىن قويىپتى. ول قىزعا يانيان دەگەن ەسىم بەردى.

 

ءبىراق، قىزدى قامقورلىقتارىنا العاننان كەيىن ەر كىسىنىڭ ايەلى ولاردى تاستاپ كەتىپ قالادى. قىرسىققاندا ۇيلەرى دە قۇلاپ ءتۇسىپ، ەكەۋى دالادا قالعان. ولاردىڭ ەندىگى ءۇيى كوپىردىڭ استى. ءبىراق، قايىرشى كىشكەنتاي قىزدىڭ باقىتى ءۇشىن توقتاۋسىز ەڭبەك ەتە بەردى. ول «قانداي قيىندىق بولسا دا، مەن ونى تاستامايمىن» دەپ ءوز- وزىنە سەرت بەرىپتى.

 

 سيۋن يانياننىڭ وتە اقىلدى قىز بولىپ كەلە جاتقانىن ايتادى. كىشكەنتاي قىز ولەڭدى وتە ادەمى، كوركەمدەپ وقيتىن. تەك ەر كىسى، قىز تۇراقتى تىركەۋدە تۇرماعاندىقتان مەكتەپكە بارا المايتىن بولدى دەپ الاڭدايدى. مۇنداي كەدەرگىلەرگە قاراماستان ول قىزعا ءبىلىمدى ۇيدە بەرۋدى جالعاستىرا بەرمەك.

 

ءار جىل سايىن قىزدىڭ تۋعان كۇنىندە (ناقتىراق ايتساق سيۋننىڭ قوقىس جاشىگىنەن قىزدى تاۋىپ العان كۇنى) سيۋن اقشاسىنىڭ ءبىر بولىگىن، قىزدى سۇيىكتى ويىنشىقتارىمەن سۋرەتكە تۇسىرۋگە جۇمسايدى ەكەن. بۇل شىنىندا كوڭىل تۇكپىرىندەگى قىلدى قوزعايتىن وقيعا. باسپاناسى جوق قايىرشىنىڭ، كىشكەنتاي قىزدى باۋىرىنا باسىپ، وسىنشاما قامقورلىق كورسەتۋى، ونىڭ بالالىعىنىڭ ءار ءساتىن سۋرەتكە اينالدىرىپ وتىرۋى، راسىندا كوڭىل تەربەيدى. قىز كوشەدە وسكەنىنەن قاراماستان، دەنى ساۋ بولدى. ال ول قىز ءۇشىن، سيۋن بارىنە دايىن. ءوزى اش قالسا دا، قولىنداعى سوڭعى نانىن سونىڭ اۋىزىنا توسادى.

 

قايىرشىنىڭ قايىرىمدىلىعى كوپشىلىكتى تاڭ قالدىرعان. جەر بەتىندە ءالى دە وسىنداي يگىلىككە مويىن بۇراتىن ادامداردىڭ بار ەكەنى قۋانتادى. ول كىشكەنتاي قىزىن بارىنەن دە ارتىق ەرەكشە جاقسى كورەدى!

Stan.kz