سولتۇستىك قازاقستان قىتاي، رەسەي مەن اۆستراليادان ينۆەستيتسيالار اعىنىن كۇتەدى - وبلىس اكىمى - فوتو

استانا. قازاقپارات - سولتۇستىك قازاقستان وبلىسى قىتاي، رەسەي مەن اۆستراليادان اۋقىمدى شەتەلدىك ينۆەستيتسيالار اعىنىن كۇتەدى.

بۇل تۋرالى بۇگىن استانادا ديپلوماتيالىق كورپۋس وكىلدەرىمەن كەزدەسكەن سولتۇستىك قازاقستان وبلىسىنىڭ اكىمى ەرىك سۇلتانوۆ ءمالىم ەتتى.

وبلىس باسشىسىنىڭ ايتۋىنشا، بىلتىرعى جىلى وڭىردەگى جالپى ينۆەستيتسيالار 154,5 ميلليارد تەڭگەنى قۇراپ، ءوسىم 28,3 پايىزعا جەتكەن.

«ارينە، بىزدە ەشقانداي دا مۇنايگاز كەن ورىندارى جوق، سول تۇرعىدان الساق وسىنداي ءوسىم قارقىنى ءبىز ءۇشىن اسا جاعىمدى. ءبىز بۇل قارقىندى ساقتاپ قالاتىن بولامىز. بۇل ءۇشىن سولتۇستىك قازاقستاندا بارلىق جاعدايلار جاسالعان»، - دەدى اكىم. ونىڭ ايتۋىنا قاراعاندا، ينۆەستيتسيالىق تارتىمدىلىق ءبىرىنشى كەزەكتە اگرارلىق سەكتوردىڭ ۇلەسىنە، وسى سالاداعى وڭدەۋ شارۋاشىلىعىنا تيەتىن بولادى. «ەكىنشىدەن، ءبىزدىڭ وڭىردە پايدالى قازبالاردىڭ 227 كەن ورىندارى بار. بۇلار ءتۇستى جانە سيرەك كەزدەسەتىن مەتالدار. وسى باعىتتا ءبىرىنشى قادام جاسالدى. بىزبەن ءبىر جىلدان استام ۋاقىت بويى الەمگە تانىمال اۆستراليالىق «يليۋكو رەستارس» كومپانياسى ىنتىماقتاسىپ كەلەدى»، - دەدى ە. سۇلتانوۆ.

جالپى العاندا، اكىمنىڭ سوزىنشە، الداعى ءۇش جىلدا گەولوگيالىق بارلاۋ جۇمىستارىنىڭ ناتيجەلەرى كۇتىلەدى. وسىنىڭ ارقاسىندا ينۆەستيتسيالىق جوبالاردى جۇزەگە اسىرۋ قارقىن الا باستاماق. ايتا كەتەرلىگى، سولتۇستىك قازاقستان وبلىسى ءتۇستى مەتالداردىڭ باي قورىمەن ەرەكشەلەنەدى. ال شەتەلدىك ينۆەستورلار ءۇشىن پرەفەرەنتسيالار دا قاراستىرىلعان. بۇل رەتتە وبلىس باسشىسى شەتەلدىك ينۆەستيتسيالار اعىنىنىڭ ۇلكەن ۇلەسى قىتاي، رەسەي مەن اۆستراليا ەلدەرىنەن بولاتىنىن بولجاپ وتىر.

 

 

 

 

 

 


اۆتور: قانات مامەتقازى ۇلى