ماس كىسى حاليفا ومارعا (ر. ا.) قانداي وسيەت ايتتى؟

استانا. قازاقپارات - حاليفا ومار (ر. ا.) ەل باسقارىپ جۇرگەن شاعىندا كەش باتقاندا قالادا سەرۋەندەگەندى ۇناتاتىن، ءارى قالانى بارلاپ قايتاتىن.

بىردە ابدۋللا يبن ءماسعۋد ەكەۋى سەرۋەندەپ جۇرگەندە ءبىر ۇيدەن بىرەۋدىڭ ءان ايتىپ جاتقانىن ەستىپ قالادى. ۇيگە جاقىنداپ كەلىپ جارتىلاي اشىق تۇرعان ەسىكتەن ءبىر كۇڭ ايەلدىڭ ءان سالىپ، ال قوجايىنى سول انگە تەربەلىپ شاراپ ءىشىپ وتىرعانىن كورەدى.

بۇل كورىنىسكە قاتتى اشۋلانعان حاليفا ومار (ر. ا.) ءۇيدىڭ ارتقى ەسىگىنەن كىرىپ كەلىپ: «وسى تىرلىگىڭە ۇيالمايمىسىڭ؟» - دەيدى شالعا قاتقىل ۇنمەن. ءۇي يەسى ورنىنان تۇرىپ حاليفاعا: «و، مۇمىندەردىڭ باسشىسى! مەن تۋرالى تەرىس شەشىم شىعارماس بۇرىن، مەنى تىڭداپ ال» دەيدى. حاليفا «ايت» دەگەندەي يشارا جاسايدى.

الگى ماس ادام: «ەگەر دە مەن اللانىڭ الدىندا ءبىر عانا كۇنالى ءىس جاساسام، سەن ونىڭ بۇيرىقتارىنا 3 رەت قارسى شىقتىڭ». «قالايشا؟» - دەيدى حاليفا ومار (ر. ا.) تاڭ قالىپ.

- بىرىنشىدەن، جاراتۋشىمىز قۇراندا: «ءاي مۇمىندەر! كۇماننىڭ كوبىنەن ساقتانىڭدار. ويتكەنى، كۇماننىڭ كەيبىرى كۇنا. سىر تەكسەرمەڭدەر، بىرەۋدى-بىرەۋ عايباتتاماسىن. بىرەۋلەرىڭ ولگەن تۋىسىنىڭ ەتىن جەۋدى جاقسى كورە مە؟ انە، بۇدان تىكسىندىڭدەر. راسىندا، اللا تاۋبەنى قابىل ەتۋشى، ەرەكشە مەيىرىمدى» («حۋجۋرات» سۇرەسى، 12-ايات) دەگەن. ءبىراق تا سەن مەنەن كۇمانداندىڭ.

ەكىنشىدەن، اللا تاعالا قۇراندا: «(مۇحاممەد ع. س.)، ولار سەنەن جاڭا تۋعان ايدىڭ جاعدايىن سۇرايدى: «ول ادامدار جانە قاجىلىق ءۇشىن ۋاقىت بەلگىلەۋ» دە جانە ولار حاج كەزىندە ۇيگە ارت جاعىنان كىرۋدى جاقسى دەپ ويلايدى. ۇيلەرىڭە ارتىنان كىرۋلەرىڭ ءبىر جاقسىلىق ەمەس. ءبىراق كىم ساقسىنسا، سول جاقسىلىق. ەندەشە، ۇيلەرگە ەسىكتەرىنەن كىرىڭدەر ءارى اللادان قورقىڭدار. ارينە، قۇتىلاسىڭدار («باقارا» سۇرەسى، 189-ايات) دەگەن. سوعان قاراماستان سەن ارتقى ەسىكتەن كىردىڭ».

«ال ءۇشىنشىسى نە؟» - دەپ سۇرايدى حاليفا ومار (ر. ا.)

«ال ۇشىنشىدەن، راببىمىز ءوزىنىڭ قۇلدارىنا: «ءاي مۇمىندەر! ءوز ۇيلەرىڭنەن باسقا ۇيگە رۇقسات المايىنشا ءارى ءۇي يەسىنە سالەم بەرمەيىنشە كىرمەڭدەر. بۇل سەندەر ءۇشىن قايىرلى. ارينە تۇسىنەرسىڭدەر» («نۇر» سۇرەسى، 27-ايات) دەگەن. ءبىراق سەن ۇيىمە رۇقساتسىز كىردىڭ، ءارى امانداسپادىڭ» - دەيدى.

سوندا حاليفا ومار: «دۇرىس ايتاسىڭ، مەنى كەشىرەسىڭ بە؟» دەپ سۇرايدى.

«اللا كەشىرسىن!» - دەيدى شال.

ۇيدەن شىققان حاليفا كۇبىرلەپ: «اللا كەشىرمەسە نە بولادى؟» دەيدى كوزىنە جاس تولىپ.

كىم بولساق تا، قانداي بيىكتە بولساق تا اللا الدىندا دارمەنسىز قۇل ەكەنىمىزدى ۇمىتپايىق!

www.mazhab.kz