سەمەيلىكتەر العىس ايتىپ، دۇكەننەن تەگىن تاۋار الۋدا
بۇل دۇكەندەردەن مۇقتاج جاندار وزدەرىنە قاجەتتى كيىم-كەشەك، بالالارعا ارنالعان ويىنشىقتار مەن كۇندەلىكتى تۇرمىسقا قاجەتتى زاتتاردى تەگىن الا الادى. تەك ساتىپ الۋشىلار مىندەتتى تۇردە «العىس» ايتۋى ءتيىس.
الەۋمەتتىك جوبا از قامتىلعان وتباسىلار مەن كوپبالالى جانۇيالارعا ارنالىپ وتىر. دۇكەن يەلەرى سورەگە شىعارىلعان زاتتاردىڭ سۋ جاڭا نەمەسە سىرى دا، سىنى دا كەتپەگەن ساپالى بۇيىمدار ەكەنىن ايتادى.
قايىرىمدىلىق كومەك كورسەتىپ، كوپشىلىكتىڭ ىستىق ىقىلاسىنا بولەنگەن الەۋمەتتىك جوبا «حالىقتىڭ سۇيىكتىسى» اتتى رەسپۋبليكالىق بايقاۋدىڭ ۇلتتىق جۇلدەسىن جەڭىپ العان بولاتىن.
بولاشاقتا مۇنداي دۇكەندەر جەلىسىن ەلىمىزدىڭ وزگە وڭىرلەرىندە اشۋ دا جوسپاردا بار.
«بۇل باستاماسى عانا، ءبىز بۇل جوبا اۋقىمىن ارى قاراي ۇلعايتا تۇسەمىز. ءالى قويمالاردا جينالىپ تۇرعان كوپتەگەن زاتىمىز بار. بالاسىن مەكتەپكە دايىنداۋعا شاماسى كەلمەي جاتقان وتباسىلارعا دا كوپ كومەك بولادى. مۇقتاج جانداردىڭ بارلىعى جىلدىڭ ءتورت ماۋسىمىنا ارنالعان كيىم-كەشەك، وزگە دە زاتتاردى تەگىن الىپ تۇرسا، ءبىزدىڭ ماقساتىمىزدىڭ ورىندالعانى دەپ ەسەپتەيمىز»، دەيدى الەۋمەتتىك جوبا اۆتورى ليۋدميلا ميحايلوۆا.
